Bartzelona, Kopan ere nagusi

Bartzelonak hirugarren aldiz jarraian irabazi du Erreginaren Kopa, larunbat honetan Atletico Madrili 3-1 irabazita.

Kopako 12. titulua eskuratuz, Kataluniako taldeak pronostikoa bete du, eta lehen zatian erakutsi du bere nagusitasuna, Claudia Pina, Esmee Brugts eta Salma Paralluelo blaugranek egindako golen bidez.

Claudia Pinak 24. minutuan ireki du markagailua, area barrutik jaurtiketa bat eginez, defentsak urrundu ez duen baloi bat harrapatu ondoren.

Bigarrena Esmee Brugtsek egin du, eskuinetik area txikira Vickyk erdiratutako baloi bat errematatuz. Gol hori berrikusi egin behar izan dute, jokoz kanpo egon zitekeelakoan.

Salma Paralluelok sartu du hirugarrena, area barruan solte geratutako baloi bat aprobetxatuz. Gol horrek ere polemika eragin du, Andrea Medina zuri-gorria lurrean etzanda baitzegoen gola egin dutenean.

Bigarren zatiaren hasieran, Barçak nagusi izaten jarraitu du, eta baloi bat langara bidali du Patrik, buruz errematatuta.

Jose Herrerak aulkia mugitu du, eta bere taldeak aldea murriztu du, Boe Graciaren erremate indartsu batekin.

Neurketaren azken zatian, Madrilgo taldea finalean sartzen saiatu da, beste gol bat eginez, baina abagune onenak Bartzelonak izan ditu berriro.