Egungo txapeldunak, PSGk, Arsenalekin hitzordua du finalean, Bayern kanporatu ondoren (1-1)

Joaneko (5-4) neurketan bi taldeek emandako ikuskizunaren ondoren, munduko futbolzaleek asko espero zuten itzuliko partidan, baina Municheko norgehiagoka oso bestelakoa izan da. Dembelek bi minutu eta 20 segundora sartutako golak baldintzatu du neurketaren bilakaera, eta Paris Saint Germainek une oro kontrolpean izan du. PSG defentsan ere trebea dela erakutsi du gaur, Arsenalekin Txapeldunen Ligako finalean hitzordua ixteko, nahiz eta Harry Kanek markagailuan banakoa jarri amaieran.

Egungo txapelduna, finalean da berriro. Duela urtebete Milango Interri 0-5 irabazita erakustaldia eman zuen txapelketako azken partidan, Europako txapelketa nagusiaren historiarako emaitza. Orain Budapestera bidean, maiatzaren 30ean, larunbata, Puskas Arenan, hurrengo erronkari aurre egin beharko dio: Arsenali.

Erdiko sakeak Bayernen asmoen berri eman du. Paris Saint-Germainen lehen baloi jabetzak ere bai. Era berean, Doueren lehen erasoaldiak eta Michael Oliseren lehen jokaldiak neurketa hasiera markatu dute. Bitartean, Joao Pinheiro epaileak jokatzen utziko zuela agerian geratu da hasieratik, baimendu baitu jokalarien arteko kontaktua. Baina, guztiaren gainetik, PSGren eraginkortasun izugarria nabarmendu da lehen minutuetan, 0-1eko golarekin.

Kavaratskheliak partida ikaragarria jokatu du berriro. Georgiarrak aurkariaren zelai erdia zeharkatu du, ziztu bizian, eta Luis Enriqueren eskeman titularra izan den Fabian Ruizekin hormarena egin du ezker hegalean. Kanarietako erdilaria erabakigarria izan da pase guzti-guztietan, eta lehen gola aktibatu duen jokaldian funtsezkoa izan da.

Bat eta bikoa egin ondoren, Kavaratskheliak erraz izan du, Upamecano urrun zuen eta. Dembeleri pasea eman eta eltxoak gola egin du. Bi minutu eta 20 segundo igaro dira, besterik ez. Eta bi goleko abantaila lortu du PSGk.

PSGren atzelariek meritu handia izan dute Munichen. Ez da samurra izan lepo zegoen Allianz Arenan etxeko taldea modu horretan kontrolatzea, baina kanpokoek lortu dute. Bayernek ia ez du aukera argirik sortu. Bloke sendo, solidario eta, batez ere, irabazle batekin egin dute talka. Bigarren zatiko aukerarik onenak PSGk izan ditu kontraerasoan. Aldea areagotzeko abagune argiak izan ditu. Hala ere, Harry Kanek berdinketa jarri du markagailuan, 94. minutuan. Oso berandu zen ordurako. Beste final baten zain, PSG.