Lointek Gernikak erakustaldia emanda garaitu du Gyor (77-41)
Lointek Gernika aise gailendu zaio Hungariako Uni Gyor taldeari asteazken honetan, Eurokopako multzoen ligaxkako faseari dagokion bigarren jardunaldian.
Hartara, bizkaitarrek lehen garaipena erdietsi dute F multzoan, eta, hurrengo fasera sailkatzeko bidean, aurkari zuzena izan daitekeen taldeari etorkizunean garrantzia izan dezakeen puntu ugariko tartea atera dio.
Gernikarren aldetik, taldeko jokalari gehienen ekarpena positiboa izan bada ere, Nikolina Milicen jarduna bereziki distiratsua izan da 27 puntu sartu eta 24ko balorazioa lortu baitu. Bosniarrari laguntza bikaina eman dio Blake Dietrick joko-antolatzaile estatubatuarrak (11 puntu eta 17ko balorazioa).
Neurketa ez da batere ikusgarria izan lehen laurdenean, talde biek oso jario urria erakutsi baitute lehen hamar minutuetan, eta horren isla zuzena izan da markagailuko emaitza (13-10).
Ondoren, baina, etxekoek bizitu egin dute jokoa, eta zuloa zabaltzen hasi dira apurka-apurka. Bigarren partziala 12 puntuko aldearekin bereganatu dute (26-14), eta, ondorioz, atsedenaldian, 15ekoa zen markagailuko tartea (39-24).
Neurketako bigarren 20 minutuak jokatzera bi taldeak bueltatu dira, baina, kantxa gainean talde bakarra zegoela zirudien, Lointek Gernika jaun eta jabe izan baita amaierara iritsi arte. Mario Lopezen jokalariak 23 eta 7ko emaitzarekin bereganatu dute hirugarren laurdena eta 15 eta 10koarekin, azkena.
Horrenbestez, garaipen honekin Lointekek berdindu egin du sailkapenean Hungariako taldea, bakoitzak partida bana irabazi baitu.
Fitxa teknikoa:
77- Lointek Gernika (13+26+23+15): Ocete (8), Dietrick (11), Wojta (5), Mazionyte (5), Milic (27) -hasierako bostekoa- Ariztimuño (1), Arrojo (8), Nogaye Lo (9), Molina (-) eta Díez (3).
41- Uni Györ (10+14+7+10): Dombai (9), Hruscakova (10), Ygueravide (8), Devaughn (4), Torok (-) -hasierako bostekoa- Barnai (6), Czank (-), Dul (-), Mansare (2) eta Varga (2).
Epaileak: Van Slooten (Herbehereak), De Lange (Belgika) eta Maret (Frantzia). Mazionyte kaleratu dute bost falta egin ostean.
Zure interesekoa izan daiteke
Lointek Gernikak agur esan dio Europari Villeneuven, partida estu baten ostean (83-81)
Lointek Gernika Bizkaia emakumezkoen Eurokopatik at geratu da final-zortzirenetako itzulerako partidan Villeneuve-d'Ascqen, egungo txapeldunaren pistan 83-81 galdu ostean.
Villeneuve d 'Ascqek nagusitasunez irabazi dio Lointek Gernikari (62-85)
Lointek Gernika Bizkaiak Emakumezkoen egungo txapeldunaren aurka jokatu du Eurokopako partida gogor batean. Joaneko partidan kanporaketa oso aldapa gora jarri zaio talde bizkaitarrari.
Aaronette Vonleh pibotak Lointek Gernikaren barneko jokoa indartuko du
Estatu Batuetako jokalaria Hozono Global Jairis taldetik dator, denboraldia amaitu arte.
Lointek Gernika nagusitu da 2025eko azken euskal derbian, IDK Euskotren 80-75 garaituta
Bizkaiko taldeak, atzetik aurrera eginda, partida irauli, eta mendean hartu du Gipuzkoakoa, Endesa Ligako 13. jardunaldiko partidan.
Lointek Gernikak Villeneuve d 'Ascq txapeldunaren aurka neurtuko ditu indarrak final-zortzirenetan
Frantziako taldea egungo txapelduna eta berriro irabazteko hautagai nagusia da. Joaneko partida urtarrilaren 15ean jokatuko da, ostegunean, Malosten, eta itzulikoa 22an, ostegunean, Frantzian.
Lointek Gernika 19 puntuko errenta galtzeko zorian izan da Pecsen aurka Hungarian, baina sailkatzea lortu du, ozta-ozta
Lucas Fernandezen jokalariak markagailuan atzetik ibili dira partida osoan zehar, eta ikaragarri sufritu dute hurrengo faserako txartela lortzeko.
Lointek Gernikak lehen fasean bere borreroa izan zen Pecs garaitu du kanporaketako lehen partidan (62-43)
Bizkaitarrek aise irabazi dute kanporaketako lehen neurketa, datorren asteazkenean Hungariako Lauber Dezso Sport Hall kantxan jokatuko den itzulerako norgehiagokarako 19 puntuko abantaila lortuz.
Lointek Gernikak Universitas Pecsen aurka jokatuko du Eurokopako play-offeko lehen kanporaketan
Lucas Fernandezen taldeak etxean jokatuko du joaneko partida, Malosten, abenduaren 11n, eta itzuliko neurketa, Pecsen, abenduaren 18an izango da. Lointek Gernikak eta Universitas Pecs bi aldiz aritu dira nor baino nor gehiago, fase erregularrean.
Lointek Gernikak sufritu eta galdu egin du Ramlaren aurka, baina averageari eutsi dio eta bigarren sailkatu da
Lucas Fernandezek zuzentzen duen taldea atzetik izan da markagailuan ia norgehiagoka osoan zehar eta une batzuetan abantaila galtzetik gertu egon da, baina azkenean bere sailkapena ziurtatzeko adina hurbildu da.
Lointek Gernikak aurreneko kolpea eman du Sofian eta Elitzur Ramlari irabazi dio lehen neurketan (65-81)
Talde bizkaitarra atzetik joan da markagailuan lehen laurdenaren amaieran, baina gainerako partzialetan nagusi izan da sailkapenaren helburuan lehen urratsa emateko.