Surne Bilbaok bigarren finala jarraian jokatuko du, Miribillan ere Szombathelyri irabazi ondoren (95-88)

Surne Bilbao Basketek FIBA Europako Kopako bigarren finala jokatuko du jarraian, bere historiako hirugarrena, Falco Vulcano Szombathely hungariarrari irabazita, Miribillan jokatutako itzuliko partidan (95-88). Finalean Greziako PAOK Salonika izango da aurkaria berriro, UCAM Murtzia kanporatu baitu beste finalerdian.

Partida hasiera hotz samar baten ondoren (0-4), Ponsarnauren taldea suspertu egin da, eta beltzezko gizonak sendo agintzen hasi dira jokoan zein markagailuan (23-17).

Bigarren laurdenean Hungariako taldeak ez du etsi, eta Bilbao Basketen errenta murrizteko ahaleginean lanean jarraitu du. Hala ere, Bizkaiko taldeak azeleragailua sakatzen jarraitu du beharrezkoa izan denetan, eta beti aurretik izan da markagailuan (48-37).

Momentu batzuetan, bazirudien ez zela Europako finalerdi bat, giroa hotza baitzen harmailetan, Hungarian lortutako errentaren eta neurketaren kontrolari esker. Pantzarrek erritmoa ezarri du kantxan eman dituen minutuetan, eta partidako saskiratzaile nagusienetakoa izan da lehen zatian, 8 punturekin aurreneko bi laurdenetan, Krampelj 9rekin batera.

Atsedenaldiaren ostean, beltzezko gizonak ondo hasi dira, baina hirugarren laurdenaren erdian lo-zorroan sartu dira, eta Hungariako taldea nagusitu zaie, eta partida 58na berdindu.

Ponsarnauk, haserre, norgehiagoka gelditu behar izan du hutsarte batekin, eta hori baliatu du jokalariak ohartarazteko eta animatzeko. Prestatzaile kataluniarraren estrategiak emaitzak eman ditu; izan ere, jarraian beltzezkoek 6-0eko partziala sartu diote Szombathelyri.

Baina hungariarrak ere suspertu egin dira, haien entrenatzaileak hutsartea eskatu, eta azken laurdenera markagailuan aurretik joateko zorian egon dira (69-67). Jaworskiren hiruko batek eragotzi du, laurdeneko azken jokaldian.

Azken laurdenean, Pantzar eta Hlinason berriro kantxan zirela, Surne Bilbaok partidaren erritmoa ezarri du berriro. Bi jokalariak ordezkatu dituztenean markagailuan 10 puntuko abantaila zuen Surnek, eta horrek kanporaketa itxi du, baina ez partida. Szombathelyren boskotea neurketa irabazten saiatu da azken unera arte, baina beltzezko gizonek eragotzi egin dute (95-88).

Jaume Ponsarnau Surne Bilbao taldeko entrenatzaileak finalerako txartela lortu ostean esan duenez, "ilusio handia" egiten die Miribillan jokatzeak finaleko bigarren partida erabakigarria. "Testuingurua ezberdina da aurreko denboraldiarekin alderatuta. Finaleko bigarren 40 minutuak Miribillan izateak apur bat gehiago kitzikatzen gaitu", onartu du prestatzaile kataluniarrak iragan denboraldiko aurkari beraren aurka garaikurra jokoan izango dutela jakin aurretik.

Halaber, Ponsarnauk nabarmendu du arrakasta berri honek agerian uzten duela Surne Bilbaok "aurrerapausoak ematen" jarraitzen duela, eta azpimarratu du duela urtebete zerbait "oso zaila" lortu zutela, baina oraindik "zailagoa" zela finalera "berriro iristea".