Arbizuk Ezkurdia izango du bikotekide apirilaren 8an egingo duen debutean

Aaron Arbizuk debuta egingo du profesional mailan, apirilaren 8an (ostirala), Irurtzungo Bi Aizpe pilotalekuan. Joseba Ezkurdia izango du bikotekide Arbizuk; aurkariak, aldiz, Aitor Elordi eta Julen Martija izango dira.

Aspe Pelotak martxoaren 10ean iragarri zuen Aaron Arbizuren fitxaketa. Etxarri-Aranatzeko pilotariak 24 urte ditu, eta bi denboraldirako kontratua sinatu zuen.

"Egia esan, ez nuen espero. Urduri eta oso pozik nago aldi berean. Ezustean harrapatu nau Asperen deiak. Dena oso azkar gertatu da, eta ez dit barneratzeko denbora eman", adierazi zuen Arbizuk Asperekin kontratua sinatu ostean.