Chourraut eta Echaniz Oklahomako Munduko Txapelketako kayakeko finalerdirako sailkatu dira

Oklahomako Munduko Txapelketan kayakeko sailkapen txanda jokatu da goiz-eguerdian bai gizonezkoetan eta baita emakumezkoetan ere. Maialen Chourrautek eta Pau Echanizek modalitateko lehen oztopoa gainditu dute, eta Leire Goñik, aldiz, agur esan dio banakako txapelketari, Basque Team Fundazioak ohar baten bidez jakitera eman duenez.

Maialen Chourrautek jaitsiera ona egin du, eta une batzuetan sailkapeneko hirugarren postuan jarri du bere jardun on horrek. Lehen zatia oso garbia izan da, baina ibilbidearen bigarren zatian pixka bat trabatu da, 18. atean ukitu bat egin baitu, eta horri dagokion zigorra ezarri zaio. Azkenean, hiru domina olinpikoren jabeak 92:34ko denbora egin du, +02:96 txandako onenarekin erkatuta (Rikarda Funk alemaniarra da hori, 89:38ko denbora egin du).

Leire Goñik akats bat egin du ibilbidearen hasieran, kanalaren barruan ezkutatuta geratu den euskarri batekin talka egin baitu. Ezbehar horren ondoren, ez du lortu piragua hasierako abiadurara itzultzea, eta mentalki zein nabigazioan pisu handiegia ekarri du horrek. Gainera, ukitua egin du 17. atean. Guztira 01:04:92ko denborarekin, 46. postuan geratu da sailkapenean. Lehenengo hogeita hamrrak sailkatu dira finalaurrekorako.

Pau Echaniz izan da kayak modalitatean lehiatu den azken euskal palista. Parisko jokoetan brontzezko domina irabazi zuen piraguistak ez du hutsik egin eta finalerdietan sartzeko sailkatze txanda gainditu du. 12. atean akats txiki bat egin duen arren, donostiarrak 83:80ko denborarekin eta 27. postuarekin amaitu du ibilbidea.

Taldekako kayak probak

Taldekako lehiari dagokionez, batetik, Maialen Chorrautek, Leire Goñik eta Laia Sorribesek osatzen duten hirukoteak zazpigarren bukatu du, 104.68ko denborarekin, eta bi ukitu eginda 9. eta 13. ateetan.

Bestetik, gizonezkoen taldea (Pau Echaniz, David Llorente eta Miquel Trave) 13. lekuan geratu du, ibilbidearen hasieran egindako akatsen ondorioz.