Jon Rahm bigarren izan da Filadelfian; Aaron Rai, garaile

Jon Rahm euskal golflariak bigarren amaitu zuen igande honen Aroniminkeko (Filadelfia) PGA Txapelketan. Aaron Rai ingelesak nagusitasunez irabazi zuen, lehen Grand Slama eskuratuta.

Euskal golflariak garaipena eskura izan zuen, baina azken hiru zuloetan ihes egin zion. Rahm bere hirugarren handiaren bila ari zen, eta lortzeko zorian izan zen, lehen bi zuloetan bi birdie eginez hasi ostean.

Barrikakoak Alex Smalley estatubatuarrarengandik bi kolpera hasi zuen azken jardunaldia. Azkenean, harekin berdinduta bukatu zuen bigarren postuan, Rairengandik hiru kolpera. 

Ingelesak 20 metroko putt batekin erabakita utzi zuen PGA, 17. zuloan. Hartara, txapelketa hori irabazten duen bigarren golflari ingelesa da; bera baino lehen, Jim Barnes nagusitu zen bitan, 1916an eta 1919an. 31 urterekin, Wombournekoak bere palmareseko seigarren txapelketa eta lehen Grand Slama lortu  zituen.

PGA Txapelketako lau jardunaldiak amaituta, Jon Rahmek, guztira, sei parraz azpitik egin du, eta bigarren tokian bukatu du, Alex Smalley estatubatuarrarekin berdinduta. Denboraldiko bigarren txapelketa handian, Rahmek lortu du bere ibilbideko emaitzarik onena; izan ere, 2028an, bertan aurrenekoz aritu zenean, laugarren tokia erdietsi zuen, eta horixe zuen orain arteko emaitzarik hoberena.

Rahmek 69, 70, 67 eta 68 kolpeko txartelak sinatu ditu (parra 70ekoa da). Igandean, lau birdie eta bi bogey egin zituen; Rai kolpe batera ere izan zuen, baina ezin izan zuen tarte hori murriztu azken zuloetan.

Emaitza bikain hau zenbatuta, golf jokalari bizkaitarra gero eta gorago dabil munduko sailkapenean, eta hamabigarren postura igo da. Erregulartasun handia ari da izaten denboraldian, eta zortzi toki aurreratu ditu, aurreko eguneratzearekin alderatuta; 2024ko urritik hona, Rahmen izan duen posturik onena da.