Osasunak bi aldiz irauli du markagailua Oviedori irabazteko (3-2)

Osasunak 3-2 menderatu du Oviedo larunbat honetan, Sadarren jokatu den EA Sports Ligako 20. jardunaldiko partidan. Bi aldiz berdindu behar izan dute markagailua gorritxoek, Budimirren bi golekin, eta Victor Muñozek luzapenean sartu du Osasunari garaipena eman dion gola.

Gorritxoek eraman dute jokoaren gidoia, eta hasieratik izan dira nagusi. Baloia une oro ibili da Oviedoren area ingurutik, baina talde nafarrari kosta egin zaio azken metroetan arriskua sortzea, defentsa gehiegi baitzeuden arean sartuta.

Victor Muñozek izan du lehen aukera argia, baina Escandellek geldiketa ona egin du. Aimar Orozek langa gainetik bidali du baloia, eta Budimirren jaurtiketa ere kanpora joan da, gutxigatik. Horiek izan dira aukerarik argienak, partidako lehen gola iritsi aurretik.

Atsedenaldira joan baino lehen, Viñak markagailua ireki du. Korner batean, buruz bidali du baloia sarera, eta Herrerak ezin izan du ezer egin eragozteko (0-1).

Hala ere, gorritxoak ez dira kikildu, eta erdiraketa bat aprobetxatu dute Budimirrek buruz berdinketaren gola sartzeko (1-1).

Bigarren zatia hasi eta gutxira, Budimirrek aukera aparta izan du, berriz ere buruz, baina langarekin egin du topo. Kontrara, Oviedok bai aurkitu du golerako bidea. Korner batean, Osasunako defentsek ez dute baloia urruntzea lortu, eta Reinak jaurtiketa indartsu batekin sartu du gola (1-2).

Osasunak, baina, egoerari buelta ematen jakin du berriro, eta falta batean Budimirrek berriz jarri du berdinketa markagailuan (2-2).

Azken minutuetan, Oviedok penaltia eskatu du baloiak Boyomoren eskua jo baitu, baina epaileak ezerezean utzi du, jokaldia VARean berrikusi ondoren.

Luzapenean, errebote asko izan dituen jokaldi batean, Victor Muñozek garaipenaren gola sartu du (3-2), hiru puntuak etxeko taldeari emateko.

Azken minutuetan, Catenak txartel gorria ikusi du, falta gogor bat egin ostean.