Athleticek gogotik ordaindu ditu bere akatsak Vila-realen aurka (1-2)

Athleticek 1-2 galdu du Vila-realen aurka, igande honetan, San Mamesen jokatu duen EA Sports Ligako 31. jardunaldiko partidan. Zuri-gorriak ez dira gai izan lehen zatian jasotako bi golei buelta emateko eta, Guruzetak aldea murriztu arren, galdu egin dute.

Bi taldeek bizi hasi dute partida, jokaldi oso bertikalekin areara ahalik eta azkarren heltzeko. Hala, lehen minutuetan bi aukera izan ditu Vila-realek, jarraian, eta beste bat, Athleticek.

Zuri-gorriak ondo kokatuta ibili dira zelaian, jokaldiak eginez eta baloia galtzen zutenean azkar berreskuratuz. Yurik izan du etxekoen lehen aukera argia, urruneko eskuinkada batekin aurkariak ezustean harrapatu ditu eta, baina jaurtiketa kanpora joan zaio.

Baina aurkarien kontraeraso batean berdinketa apurtu da. Pase sakona jaso du Oluwaseyik, eta arearaino iritsi da. Cardona bakar-bakarrik heldu da bigarren zutoinera eta hari eman dio erdiraketa, gola sar zezan (0-1).

Athletic ez da kikildu, eta erasoan jarraitu du. Yurik, berriz, ezkerkada ona lotu du, boleaz, baina defentsaren kontra jo eta kanpora joan zaio. Gauza bera gertatu zaio Jauregizarri, baloia kanpora irten zaio, zutoinetik oso gertu.

Bestalde, Laportek kolpe gogorra hartu du buruan Gerard Morenoren aurka. Bendak jarri behar izan dizkiete biei buruan, baina jokatzen jarraitu dute.

Atsedenaldira joan baino lehen, Alfonso Gonzalesek Vila-realen abantaila handitu du. Lekue lokartu egin da baloiarekin eta Gonzalesek lapurtu egin dio, ateraino eraman eta gola sartu du (0-2).

Guruzetak izan du lehen aukera bigarren zatian, baina berriz ere defentsa oztopo izan da, eta baloia langaren gainetik joan da. Laportek ere gol aukera ona izan du korner batean, baina burukada erditik joan zaio.

Aldaketak beharrezkoak ziren, eta Valverdek Gorosabel, Berenguer, Navarro eta Rego sartu ditu zelaian, freskotasun bila. Baina Vila-real ondo kokatuta zegoen bere area inguruan, eta zuri-gorriak eskas ibili dira azken metroetan.

Kosta egin zaio Athletici, eta une askotan hurbilago egon da aurkarien hirugarren gola etxekoen lehena baino. Baina, azkenean, heldu egin da bila eta bila ibili diren gola. Yurik erdiraketa jarri du ezkerretik eta Guruzetak sarera bidali du baloia (1-2).