Hauteskunde-prozesua
Gorde
Kendu nire zerrendatik

Jon Uriartek bere hautagaitza ofizial egin du: “Athletic askoz handiagoa egitera gatoz"

Bilboko taldearen bulegoetan aurkeztutako hautagaitzak oraingoz beste zortzi kide ditu: Jon Salinas, Xabi Alvarez, Ibon Naberan, Nacho Uriguen, Roque Echaniz, Jon Ruigomez, Laura Ruiz de Azua eta Josetxu Urrutia.

uriarte_jon_athletic_EFE

Jon Uriarte, Athleticen presidente ohia. Artxiboko argazkia: EFE

Jon Uriarte Athleticen presidente ohiak ofizialki aurkeztu du astelehen honetan talde zuri-gorriaren presidente izateko eta Zuzendaritza Batzorderako bere hautagaitza, "kirol, ekonomia eta gizarte" arloan Athletic "askoz handiagoa" egiteko helburuarekin, baina klub zuri-gorriaren "baloreei, filosofiari eta estiloari" zintzo eutsita.

Bilboko taldearen bulegoetan aurkeztutako hautagaitzak, oraingoz, beste zortzi kide ditu: Jon Salinas, Xabi Alvarez, Ibon Naberan, Nacho Uriguen, Roque Echaniz, Jon Ruigomez, Laura Ruiz de Azua eta Josetxu Urrutia.

"Lau urte geroago, umiltasunez, autokritikaz, baina anbizio berarekin gatoz, Athletic askoz handiagoa egitera, kirol arloan ez ezik, arlo ekonomikoan eta sozialean ere. Beti bere balioe, filosofia eta estiloarekin leial", adierazi du presidentegaiak sareetan argitaratutako bideo batean.

Uriartek adierazi du duela lau urte "ilusioz beteta" iritsi zirela Athleticera, eta bere horretan dagoela Athleticen alde lan egiten jarraitzeko asmo hori bera, azken ureetan "ikasitakoarekin eta hartutako eskarmentuarekin". "Horregatik aurkeztuko gara berriro Athleticeko hauteskundeetara, eta zuen babesa eskatzen dizuegu, klubaren alde indarrak batzen eta erabakietan asmatzen jarraitu ahal izateko, eta noski, gaizki hartu ahal izan ditugun erabakiak zuzentzeko", gaineratu du.

Bilbotarrak aitortu du Athleticera iritsi zirenean klubaren zenbakiei begiratuta "bertigoa" izan zutela, baina azken lau urteetan "buelta ematea" lortu dutela nabarmendu du. "Orain balantze sendoa duen klub bat dugu, bankuan dirua duena, zorrik gabekoa, eta hainbat urtez jarraian superabita izan duena. Baina uste dugu ildo horretan lanean jarraitu behar dela kirol mailarik handiena lortu ahal izateko", gaineratu du.

Orain arte, Jon Uriarte da Athleticen presidentetzarako eta Zuzendaritza Batzorderako maiatzaren 8ko hauteskundeetarako hautagai bakarra. Hala ere, presidente izateko hautagaiek babesa lortzeko izapideak apirilaren 9ra arte egin ditzakete, orduan irekiko baita hautagaitzak formalki eta osorik aurkezteko epea (hilaren 18an amaituko da).

Zure interesekoa izan daiteke

Gehiago ikusi
Publizitatea
X
Publizitatea
X