Realak sendo irabazi Osasunari (3-1)

Realak 3-1 irabazi du igande honetan Osasunaren aurka Anoetan jokatutako derbia, EA Sports Ligako 28. jardunaldiko partidan. Oyarzabalek penaltiz sartutako golak eta Guedesen beste biak txuri-urdinei eman die garaipena, Victor Muñozek aldea murriztu duen arren.

Osasunak izan du partidako lehen aukera, Rosierrek urrunetik egindako jaurtiketa batekin. Remirok ondo gelditu du hori. Hortik gutxira, Victor Muñozek zutoinera bota du baloia, buruz.

Egoera ikusita, Realak ikusi du suspertu beharra zegoela eta jokoaren agintea hartu du. Turrientesek jaurti du lehenengo, baina Herrerak erraz gelditu du baloia, eta Oyarzabalek aukera bikoitza izan du, ia ate barrutik bertatik, baina kapitaina ez da fin ibili punteriarekin.

22. minutuan, Guedesek erdiraketa jarri du, eta, Herrerak baloia desbideratzean, Boyomoren eskua ukitu du. Epaileak penaltia adierazi du, eta Oyarzabalek markagailua ireki du (1-0). 

Lau minutura, bigarren gola egin dute txuri-urdinek: Brais Mendezen autopaseak Guedesi ireki dio baloia, hutsunea aurkitu du area ertzetik, zartako aparta egin, eta baloia zutoin motzetik sartu du (2-0). 

Barrenetxeak eta Aimarrek izan dituzte lehen zatiko azken aukera argiak, baina bi atezainek ondo erantzun dute.

Bigarren zatia etxekoen mesedetan hasi da. Moncayolak eta Victor Muñozek aukera bana izan dute aldea murrizten saiatzeko, baina gola aurkitu duena, berriz, Guedes izan da. Turrientesen jokaldi bikain baten ondoren, baloia Guedesi heldu zaio, eta ezkerkada indartsu batekin Realaren hirugarren gola sartu du. Herrerak ezin izan du gelditu (3-0).

Gorritxoek ez dute amore eman eta bere joko zuzenarekin jarraitu dute. Hala, Braisek atetik bertatik atera behar izan du Victor Muñozen burukada. Budimir ere saiatu da, baina zorterik gabe.

Realaren albiste txarra Yangel Herreraren aldetik etorri da. Zelaian lau minutu besterik ez zeramatzanean, min hartu eta zelaia utzi behar izan du. Oskarsson sartu da haren ordez.

Aldaketek eragina izan dute jokoan, eta Osasunak aurkitu du hainbeste bilatu duen gola. Kike Barjarekin jokaldi konbinatua egin eta Victor Muñozek ezker hegaletik sartu du Remiroren atean (3-1).

Azken minutuetan dena erabakita egon arren, bi taldeek ez dute erritmoa jaitsi eta dena ematen jarraitu dute. Hala, Realak bereganatu du derbia, sendo-sendo jardun du eta, eta Osasunak lanean jarraitu beharko du Europako postuetara jo nahi badu.