Villarejok iradoki du Real Madril partidetan iruzur egiten saiatu zela; klubak akzio judizialak iragarri ditu

Jose Manuel Villarejo Espainiako Poliziaren komisario ohiak esan du Real Madril Bartzelona egiten saiatu zen gauza bera egiten saiatu zen "nolabait" aldeko arbitrajeak izateko; Negreira auziak eman zituen argitara ahalegin horiek. Villarejok RAC1 Kataluniako irratian egin ditu adierazpen horiek, asteartean, eta, horien berri jasotakoan, Real Madrilek iragarri du Florentino Perez presidenteak akzio judizialak hasiko dituela, segituan, "akusazio faltsuak egiteagatik".

Villarejok Sandro Rosell Bartzelonako presidente ohia zuen hizpide adierazpen horiek egin dituenean; izan ere, Rosell ikertu zuen, independentismoarekin lotuta zegoelakoan, nahiz eta gero ikusi zuen ez zela espero zuen hori, onartu duenez: "Sandro Rosell eztabaida batzuetan agertu zen, eta horregatik sartu nintzen horretan; izan ere, Rosell eta Kataluniako beste pertsona ospetsu batzuk independentziaren aldeko mugimenduarekin lotuta omen zeuden. Nik soilik ikusi nuen presio talderen bateko kidea zela, eta, gainera, epaileen kontuari dagokionez, partidetan iruzur egite aldera, ekintzaren bat zuen egina".

"Sandro Rosellek?", galdetu diote, eta erantzun du: "Bueno, presidente guztiek". Eta jakin nahi izan dute ea Florentino Perez ere ahalegindu zen iruzur egiten: "Nolabait, Real Madrilen, hori hasi aurretik (Negreira auziaz ari zen), gauza bera zegoen antzemanda".

"Ulertu behar duzu nire lana inteligentzia lana dela. Nik nire informazioak inteligentzia txostenetan jartzen ditut, eta informazio horiek baliteke judizializatzea ala ez, kontuan izanik baieztatu egin direla ala ez direla baieztatu", gehitu du.

Galdetu diote, orduan, ea zergatik judizializatu duten Bartzelonaren auzia, eta Real Madrilena, aldiz, ez: "Herrialde honetan, ezinezkoa da judizializatzea Florentino jaunari eragiten dion ezer. Hori egiten ausartzen dena suizida izango litzateke".

Real Madrilen akzio judizialak

Testuinguru horretan, handik gutxira, Real Madrilek iragarri du Florentino Perez klubeko presidenteak akzio judizialak hasiko dituela, segituan, Villarejo komisario ohiaren aurka, Negreira auzia hasi baino lehen partidetan ustez iruzur egin izana leporatzeagatik.

Ohar batean, Madrilgo klubak baieztatu duenez, presidenteak "dagokion akzio judiziala segituan aurkeztuko du", Villarejo komisario ohiaren kontra, RAC1en egindako akusazio faltsuengatik.