Paul Seixasek nagusitasun handiz irabazi du Itzulia, eta Andrew Augustek bereganatu du azken etapa

Paul Seixas (Decathlon) 19 urteko txirrindulari frantziarrak nagusitasun handiz irabazi du 2026ko Itzulia, aurkari guztiak lehen egunetik azkeneraino menderatuta eta hiru garaipen eskuratuta. 

Podiumean, Florian Lipowitz (Red Bull-Bora) alemaniarra eta Tobias Halland Johannessen (Uno-X Mobility) norvegiarra izan ditu ondoan. Ion Izagirre (Cofidis) gipuzkoarrak, berriz, laugarren postuan bukatu du azkenekoz lehiatu duen Itzulia.

Antzuolan hasi eta Bergaran bukatu den azken etapa Andrew August (Ineos) txirrindulari estatubatuarrak irabazi du, ezustean. Asentzion gora jo du eraso erabakigarria, eta bakarka helmugaratu da. Handia egin du, bigarren aldiz lortu baitu garaipena World Tourreko lasterketa batean.

Negu giroan lehiatu da Itzuliko azken etapa, hotzak eta euriak hartu baitiote lekukoa gaur azken egunotako eguzki gozoari. Edonola ere, txirrindulariek dena eman dute, eta azken etapa ere zirraragarria izan da.

Eguneko ihesaldian, hiru txirrindulari handi izan dira: Marc Soler (UAE), Mattias Skjelmose (Lidl-Trek) eta Ben Healy (EF Education). Hainbat kilometrotan Peter Oxenberg (Ineos) eta Juanpe Lopez (Movistar) batu zaizkie, azkenerako pott egin badute ere.

Atzerago, iheslariak harrapatu nahian, 20 bat txirrindularik osatutako multzoa joan da, Tobias Halland Johannessen (Uno-X Mobility), Markel Beloki (EF Education) eta Igor Arrieta (UAE) tartean.

Paul Seixas liderraren taldeak, berriz, bidea egiten utzi die, eta tropelak 4 minutuko galera pilatu du.

Alabaina, Elosuan gora, helmugarako 58 kilometroren faltan, zalaparta piztu da faboritoen taldean, podiumerako lehian. Lehenengo, Javier Romok egin du ihes tropeletik, eta laster izan dira eraso gehiago. Florian Lipowitzek (Red Bull-Bora) bizpahiru aldiz jo du aurrera, baina Seixasek erraz erantzun dio, baita Ion Izagirrek (Cofidis) ere. Primoz Roglic (Red Bull-Bora), berriz, atzean gelditu da.

Horrela, Seixas, Lipowitz, Izagirre, Kevin Vauquelin, Javier Romo eta Clement Champoussin gelditu dira faborito nagusien taldetxoan. Halako batean, baina, liderrak erritmo aldaketa izugarria egin du, eta bere aukari guztiak atzean utzi ditu, helmugatik 56 kilometrora. Ez zuen horretarako beharrizanik, baina nahieran dabilela erakutsi du erasoa urrunetik jota. 

Bakarkako lan handia egin du txirrindulari gazteak, indarra eta kemena erakutsita. Hala ere, ezinezkoa izan zaio Tobias Halland Johannessenen taldetxoari tartea jatea, eta erdibidean gelditu da.

Bigarren multzo handi horretan, Uno-X Mobility taldeko txirrindulariak gogotik aritu dira, eta Seixasekiko aldeari eusteaz gain, ihesaldia ezerezean uztea ere lortu dute, helmugarako 23 kilometroren faltan. Lehendabizi, Marc Solerrek altxatu du hanka, eta ondoren Mattias Skjelmose eta Ben Healy harrapatu dituzte. 

Asentziorako igoera hasi eta berehala jo du erasoa Andrew August (Ineos) txirrindulari estatubatuarrak. Raul Garcia Piernak (Movistar) erantzun dio, eta biek egin dute aurrera. Mendatea bukatu orduko, baina, txirrindulari espainiarra atzean geratu da, eta Augustek Bergararako bidea hartu du ziztu bizian. 

Atzetik, Garcia Pierna, eta pixka bat atzerago, Tobias Halland Johannessen, Simone Velasco, Emiel Verstrynge eta Filippo Fiorelli txirrindulariek osatutako taldetxoa.

Edonola ere, ez da ezusteko gehiagorako tarterik izan, eta Andrew Augustek bere ibilbide profesionaleko garaipenik handiena lortu du: Itzuliko azken etapa, Bergaran. Raul Garcia Pierna izan da bigarren, eta Frank Van den Broek, berriz, hirugarren. 

Paul Seixas eta Florian Lipowitz elkarrekin sartu dira helmugan, etapako lehen sailkatutik 4 minutu eta 15 segundora, eta horiekin batera helmugaratu dira Ion Izagirre eta Pello Bilbao. Primoz Roglicek, ostera, 20 minutuko atzerapena izan du. 

Horrela, bada, Lipowitz eta Johannessen izan dira Seixasen ondoan podiumean, eta Ion Izagirrek laugarren tokian bukatu du 2026ko Itzulia.

Bestalde, aurtengo Itzulia berezia izan da Ion Izagirrerentzat eta Pello Bilbaorentzat, biek ala biek azkenekoz lehiatu baitute Euskal Herriko lasterketa. Txirrindulari gernikarrak azken etapa abiatu aurretik iragarri du denboraldiaren amaieran utziko duela txirrindularitza profesionala.