Albiste da:

Rafael Louzan da Espainiako Futbol Federazioaren presidente berria

Astelehenean, Batzar Nagusian, Salvador Gomarrek baino boto gehiago jaso ditu, eta, horrenbestez, 2028ra bitartean, RFEFeko presidentea izango da.

Rafael Louzan, RFEFeko hauteskundeak irabazita. Argazkia: EFE.

EITB

2024/12/16 - 19:11

Azken eguneratzea

2024/12/16 - 19:11

Rafael Louzan hautatu dute, astelehenean, Espainiako Futbol Federazioaren presidente, Madrilen egin duten Batzar Nagusian. Hala, Louzan 2028ra bitartean izango da RFEFeko presidentea.

Presidente berriak 90 boto izan ditu, eta Salvador Gomarrek, alegia, hauteskundeetan zegoen beste hautagaiak, 43. Aurreikuspena zen Louzanek irabaztea, kontuan izanik gainerako hautagaiek baino abal gehiago zituela aurkeztuta.

Louzan hamar urtean izan da Galiziako Federazioko presidente. RFEFren presidente izendatuta, nabarmendu du "gardentasunak" eta "jarduera onek" markatuko dutela bere agintaritza, "izen ona berreskuratze aldera", eta eskatu du "batasuna, eta kohesioa" izan daitezen.