Narvaez izan da indartsuena Cosenzako esprintean, eta Cicconek eraman du maglia arrosa

Latinoamerikako txirrindulariek protagonista izaten jarraitu dute Italiako Giroan, eta Jhonatan Narvaez (UAE) ekuadortarrak irabazi du Catanzaro eta Cosenza artean jokatu den 138 kilometroko laugarren etapa. Orluis Aular (Movistar) venezuelarraren aurretik helmugaratu da txirrindulari ekuadortarra. Bestalde, Giulio Ciccone (Lidl Trek) italiarrak maglia arrosa kendu dio Guillermo Thomas Silva uruguaitarrari.

Helmugan Jhonatan Narvaez (Playon de San Francisco, 29 urte) izan da indartsuena esprintean, eta azken metrora arte izan da lehian Aular venezuelarrarekin. Aularrek bigarren postua eskuratu du, Giulio Ciccone lider berriaren aurretik.

Ekuadorko txapeldunak 2020ko eta 2024ko Giroetan altxatu zituen besoak. Gaur esprint estuan bere hirugarren etapa garaipena lortu du Giroan, 3 ordu 8 minutu eta 47 segundoko denborarekin. Saria bere taldeak eraman du, Adam Yates eta Jay Vine liderrek Bulgarian izandako erorikoen ondorioz lasterketa utzi ostean.

Sailkapen nagusian Guillermo Thomas Silvak agur esan dio maglia arrosari Italian jokatutako lehen etapan. Uruguaitarra laster atzean geratu eta irabazlearengandik 12 minutu baino gehiagora helmugaratu da.

Maglia arrosa Giulio Cicconek jantzi du, Jan Christen suitzarrari, Florian Stork alemaniarrari (Tudor) eta Egan Bernal kolonbiarrari (Netcompany Ineos) 4 segundoko aldea ateratzen baitie. Enric Mas zortzigarren da sailkapen nagusian, 10 segundora, eta Markel Beloki (EF Education) hamabigarren, denbora berdinera.