Pogacarrek Pantaniren marka ondu du Alpe d'Huezen Tourra erabakita uzteko

Tadej Pogacar esloveniarrak 2026ko Frantziako Tourraren bosgarren garaipena lortu du, Alpe d'Huezen amaitu den etapa entzutetsuan, Parisera iristeko bi egun falta direnean. UAE Team Emirates taldeko txirrindulariak Tourra bosgarrenez jarraian irabazteko pauso handia eman du.

Igoerako azken kilometroan gainditu ditu Lenny Martinez frantziarra eta Richard Carapaz ekuadortarra, aurreko eguneko etaparen irabazlea eta ihesalditik azkenera arte iraun duen txirrindularietako bat. Gainera, Alpe d'Huezko igoeran Marco Pantanik 1995ean jarri zuen marka hobetu du.

Richard Carapaz (EF Education-EasyPost) izan da eguneko protagonista nagusietako bat. Ekuadortarra hasierako ihesaldian sartu da, eta behin eta berriz saiatu da erasoa jotzen Alpe d'Huezko igoeran. Hala ere, Pogacarrek helmugatik 1,8 kilometrora harrapatu du. Carapaz hirugarren izan da helmugan, eta mendiko sailkapeneko lidergoa sendotu du. 91 puntu ditu, Pogacarrek baino bat gehiago eta Valentin Paret-Peintrek (Soudal Quick-Step) baino zazpi gehiago.

Sailkapen orokorrean, Remco Evenepoelek (Red Bull-BORA-Hansgrohe) bigarren postua sendotu du, liderrarengandik 7 minutu eta 11 segundora. Isaac del Torok (UAE Team Emirates-XRG) ere podiumerako pauso handia eman du, Paul Seixasi (Decathlon CMA CGM Team) 5 segundo atera baitizkio.

Etapa gogorra izan da hasieratik, ihesaldia osatzeko eta maillot berdea zein mendiko sailkapena eskuratzeko borroka bizia izan baita. Mads Pedersen (Lidl-Trek) ihesaldian sartu da berriro, eta Le Perierren tarteko esprintean gailenduta, 25 puntu lortu, eta Jasper Philipsenekiko (Alpecin-Premier Tech) aldea handitu du maillot berdea eskuratzeko lehian.

Carapazek helmugatik 9 kilometrora jo du lehen erasoa, eta Lenny Martinezek (Bahrain-Victorious) eutsi egin dio. Atzetik, Pogacarrek zaila zirudien jazarpenari ekin dio, ihes egindakoek 2 minutu baino gehiagoko aldea baitzuten. Adam Yates taldekidearen laguntzarekin, Tourreko liderra aldea murrizten hasi da abiadura handian, eta 3 minutu baino gehiago berreskuratu ditu 12 kilometroan.

Helmugara iristeko 3 kilometro pasatxo falta zirenean, Carapazek erasoa jo du berriro, eta Martinez atzean utzi du, baina Pogacar gertu zuten ordurako. Esloveniarrak frantziarra harrapatu du lehenengo, eta ekuadortarra gero, eta hirurek elkarrekin egin diete aurre azken kilometroei. Azken kilometroan, Pogacarrek beste eraso bat jo du, tarte txiki bat ireki du, eta etapa beste erakustaldi bat emanda bereganatu du.