Surne Bilbaok Europako bigarren kopa irabazi du, biak jarraian irabazi ere, Miribillan finala iraulita (89-74)

Surne Bilbao Basketek FIBA Europa Kopa bigarrenez irabazi du jarraian, PAOK Salonika talde greziarrari Miribillan irabazita (89-74). Garaikur hori jarraian birritan irabazi duen lehen taldea da, baita finaleko itzulerako norgehiagokan aurkako emaitza bat irauli duen lehena ere. Beltzezko gizonek urtebetetze oparirik onena egin diote Jaume Ponsarnau entrenatzaileari, bigarren zatian talde greziarra xehatu eta sei puntuko desabantaila instant batean iraulita.

Joaneko partidan baino saskiratze erritmo handiagoarekin hasi da norgehiagoka. Beltzezko gizonek ez dute defentsa doitzen asmatu, eta greziarrek aprobetxatu egin dute. Gainera, PAOK gogor ari zen defentsan. Jokaldi horietako batean tentsioa ika-mika izan da, lehen laurdenean, Beverleyk Hilliardi falta egin dionean. Bi jokalariak nahastu dira, eta hori gutxi ez balitz, Omoruyi tartean sartu da. 

Une horretan, Ertzaintza greziar zaleen harmailetara sartu da, baretu nahian. Gauzak horrela, giroa berotuta iritsi da lehen laurdenaren amaiera, Ponsarnauren taldea markagailuan atzetik zela (19-23).

Bigarren laurdenak bide beretik jarraitu du, markagailuan eta kantxan pareko ibili dira eta. Epaileak falta batzuk adierazteko garaian berandu ibili dira, eta horrek zale bizkaitarren haserrea piztu du. Greziar taldeak euren defentsa oldarkorrarekin norgehiagoka gogortzen jarraitu du, eta Surnek gauza bera egin nahi zuen. 

Halako batean, lan asko eginda, talde bilbotarra aurretik jarri da markagailuan laurdeneko azken minutuetan. Kanpoko taldearen entrenatzaileak hutsartea eskatu du etxekoen bolada eten nahian. Jarraian, Omoruyik saskiratze erraz bat huts egin du, Surneren uztaia birrintzeko ahaleginean. Sufrimendu handiarekin, beltzezko gizonak markagailuan aurretik joan dira atsedenaldira (43-41).

Aldageletatik bueltan, Bilboko taldea suspertu egin da. Ponsarnauk zuzentzen duen taldeak are gehiago sakatu du, eta PAOKen sei puntuko aldea behin baino gehiagotan neutralizatu du finala berdintzeko. Petrasekek, Normantasek eta Pantzarrek, besteak beste, minutu oso onak egin dituzte, eta horri esker, talde bizkaitarrak sei puntuko kristalezko sabaia bota eta markagailuan aldea ireki du. Miribillak bultzatuta, 13 puntu goitik iritsi dira hirugarren laurdenaren bukaerara (70-57).

Azken laurdenaren hasieran, Beverleyri ezinean, etsita, ikusi zaio, erasoko errebotean falta egin eta bere entrenatzaileak ordezkatu behar izan du. Greziako zaleak isildu dira, lehen aldiz final osoan. PAOKen teknikariak berriro eskatu du hutsartea, jokalariei Hlinasonen laugarren falta behartzea eskatzeko. Eta hori handik gutxira lortu dute. Hlinason, Hilliard eta Bagayoko, hirurak, lau faltarekin zeuden, eta asko falta zen amaierarako. 

Normantas finaleko protagonista bilakatu da, beltzezkoen aldeko errentarik handiena jarri du eta (+22), eta hiruko bat jaurtitzen ari zenean falta bat jaso du (80-58). PAOK erantzuten saiatu da, baina beltzezko gizonek kontrolpean zuten partida, eta, ezustekorik gabe, itxi egin dute finala.