Goikok eta Lekerikak bi setetan menderatu dituzte Erik eta Minvielle, Eusko Label Winter Serieseko hasieran
Iñaki Osa Goikoetxeak eta Unai Lekerikak bi setetan menderatu dituzte Erik Mendizabal eta David Minvielle, 15-8 eta 15-9, astelehenean, 2023-24 denboraldiko Eusko Label Winter Series txapelketako lehen jardunaldiko partidan, Gernika-Lumoko Jai Alai pilotalekuan. Hala, Goikoetxeak eta Lekerikak lau puntu lortu dituzte A multzoan, eta Erikek eta Minviellek ez dute punturik eskuratu. Bikote irabazlea gehiago izan da, eta merezita bereganatu du garaipena.
Beteta zegoen Gernikako Jai Alai pilotalekua partida hasi denean, eta giro bikaina zegoen harmailetan; are gehiago, kontuan izanik Gernika-Lumon jaieguna izan dela (Urriko Azken Astelehena). Testuinguru horretan, Goikok eta Lekerikak eta Erikek eta Minviellek estreinaldian ohikoa izaten den tentsioa zuten kantxaratu direnean. Beraiek ziren protagonistak 2023-24ko Eusko Label Winter Serieseko aurreneko jardunaldian, eta A multzoan lehenengo puntuak batzeko aukera zuten, goiko postuetan tokia hartzen joateko. Zesta-puntako neguko txapelketa handiari hasiera emateko erantzukizuna izan dute, eta zale guztien begiradapean zeuden.
Erikek eta Minviellek aurkariek baino zailtasun askoz ere handiagoak izan dituzte presio horri aurre egiteko norgehiagokaren hasieran, eta Goikok eta Lekerikak espero baino erosoago eskuratu dute aurreneko jokoa. Erik Mendizabalek egin du hirugarren Winter Serieseko lehenengo sakea, baina aurrelari zumaiarrak eta atzelari gernikarrak berehala erdietsi dute 5-0eko aldea, eta horrek asko baldintzatu du partidaren hasiera. Erik eta Minvielle 4-5 jarri dira, baina ez dute berdintzerik izan, eta aurkariek 10-4ko emaitza jarri dute gero markagailuan; Goikok eta Lekek oso ondo bideratu dute lehenengo jokoa, eta, azkenean, 15-8 gailendu dira.
Neurketa ez da gehiegi aldatu bigarren jokoan, horretan ere argi nagusitu baitira Goikoetxea eta Lekerika. Aurkariak 4-2 aurreratu dira, baina, hortik aurrera, hamar tanto jarraian egin dituzte, seiko aldea eskuratuta (10-4), eta ez dute oztoporik izan seta irabazteko. 15-9 gailendu dira, eta emaitzak ondo erakusten du kantxan zer gertatu den.
Erkiaga-Ibarluzea eta Johan-Lopez bikoteak arituko dira nor baino nor gehiago bigarren jardunaldian, datorren astelehenean. B multzoko lehenengo partida izango da, eta atzelari txapelduna arituko da bertan, Imanol Lopez hain zuzen.
Hasi da Eusko Label Winter Series, eta asteleheneko gauak zesta-puntarakoak izango dira, otsailera bitartean.
Zure interesekoa izan daiteke
Eusko Label Winter Series txapelketaren finalerdietako ligaxkaren 3.jardunaldiko hiru tanto onenak
Johan Sorozabalek eta Eñaut Urreistik egin dituzte Eusko Label Winter Serieseko finalerdietako ligaxkako hirugarren jardunaldiko tanto onenak.
Eraman enpresak BAR sistema bertan behera uztea erabaki du Winter Series "txapelketa hau bukatu arte"
Honenbestez, hurrengo jardunalditik aurrera, lau epaile beharrean hiru egongo dira eta kantxako erdiko epaileak izango du azken erabakia. Gainera, enpresak babesa erakutsi nahi izan die Urreistiri eta Lopezi, epaileen azken erabakiak “beraien kaltetan” izan direlako.
2025-2026ko Eusko Label Winter Series txapelketako sailkapenak, emaitzak eta egutegia
Txapelketak 18 jardunaldi izango ditu, eta urriaren 27an hasiko da. Partida guztiak astelehenez jokatuko dira, finala izan ezik (otsailaren 15ean, igandez). Topaketak ETB1en eta eitb.eus izango dira ikusgai.
Johan Sorozabal: "Ez dakit pilota barruan edo kanpoan zegoen; epaileak barruan zegoela esan du eta berak du arrazoia"
Johan eta Gorka Sorozabalek garaipena lortu dute Urreisti eta Lopezen aurka. Azken tantoaren polemikaren ostean, Johanek esan du ez dakiela pilota kanpoan edo barruan zegoen, baina Gorkak kanpoan zegoela uste du. Hala ere, anaiak pozik daude irabazi dutelako.
Azken tanto polemiko batek garaipena eman die Johan eta Gorkari
Johan eta Gorkak hiru setetan irabazi diete Urreisti eta Lopezi (15-11, 11-15 eta 4-5). Azken tantoa polemikoa izan da, 4-4 joanda, ez baitute jakin Johanek botatako bi paretakoa balekoa zen ala ez. Azkenean, epaileek lapurtarrei eman diete garaipena.
Urreistik eta Lopezek hiru jokotan galdu dute berriro Johanen eta Gorkaren aurka, eta sailkatzeko aukera gutxi dituzte
Hirugarren jokoan azken tanto polemiko batek erabaki du berriz norgehiagoka. Bigarren porrotak (15-11, 11-15 eta 4-5) hanka eta erdi txapelketatik kanpo utzi dio bikote gipuzkoarrari, baina oraindik bizirik jarraitzen dute lehian. Ligaxkako azken partida 2-0 irabazi eta gainerako emaitzen menpe egotea geratzen zaie.
Eusko Label Winter Series txapelketaren finalerdietako ligaxkaren 2.jardunaldiko hiru tanto onenak
Johan Sorozabalek, Xabi Barandikak eta Gorka Sorozabalek egin dituzte Eusko Label Winter Serieseko finalerdietako ligaxkaren bigarren jardunaldiko tanto onenak.
Barandika: "Partida nahiko txukuna egin dugu"
Xabi Barandikak eta Thibault Basquek hiru jokotan (15-11, 12-15 eta 5-2) gainditu dituzte Johan eta Gorka Sorozabal Eusko Label Winter Series txapelketako finalerdietako ligaxkaren bigarren jardunaldian, Gernikako Jai Alai pilotalekuan.
Barandika-Basque vs Johan-Gorka neurketaren azken tantoa
Xabi Barandikak eta Thibault Basquek hiru jokotan (15-11, 12-15 eta 5-2) gainditu dituzte Johan eta Gorka Sorozabal Eusko Label Winter Series txapelketako finalerdietako ligaxkaren bigarren jardunaldian, Gernikako Jai Alai pilotalekuan.
Barandikak eta Basquek sufritu baina hiru jokotan irabazi diete Johan eta Gorkari
Garaileek aurkarien hasiera kaskarra aprobetxatu dute lehen jokoa nahiko erraz irabazteko. Bigarrenean, ordea, Sorozabal anaiek nabarmen hobetu dute euren jokoa, hirugarren jokoa behartuz. Hirugarrenean, ordea, gernikarra eta bidartarra sendoagoak izan dira.