17. zuloko bogey hirukoitz batek Carlota Cigandaren jardunaldi ona zapuztu du

17. zuloan egindako bogey hirukoitz batek Carlota Cigandak Erresuma Batuko Irekiaren hirugarren jardunaldian lortutako emaitza ona zapuztu du, Saint Andrewsko Old Course zelaian.

Cigandak +4ko txartelarekin pasatu zuen kortea, eta larunbata bikain hasi du. Bost birdie zeramatzan (7., 9., 11., 13. eta 14. zuloetan) eta behin-behineko sailkapeneko 20. postuan zegoen, bogey hirukoitza egin duenera arte. Azkenean, 70 kolpe (-2) behar izan ditu jardunaldia amaitzeko, eta 218 kolpe (+2) daramatza guztira.

Jiyai Shin hegokorearrak 67 kolpe txartela (5 parearen azpitik) aurkeztu du gaurkoan, eta Nelly Korda estatubatuarraren jardunaldi txarrak lehen postura igotzea ahalbidetu dio.