Osasuna loriatik amesgaiztora igaro da Levanteren aurka (3-2)

Osasunak 3-2 galdu du Levanteren aurka ostiral honetan, Valentzian jokatu den EA Sports Ligako 35. jardunaldiko partidan. Lehen 10 minutuetan 0-2 jarri arren, defentsako akatsek eta Herrerak jasotako txartel gorriak partida baldintzatu dute, eta gorritxoek porrot mingarria jaso dute.

Partida ezin hobeto hasi da gorritxoentzat. 3. minutua jokatzen ari zirenean, Osasunak kontraeraso bat egin du, Moncayolak baloia areara erdiratu du,  eta Toljanek bere atean sartu du baloia, alderatzen saiatu denean(0-1).

Handik gutxira, beste kontraeraso batean egin du Nafarroako taldeak 0-2koa. Pazientzia handiz ondo landutako jokaldia egin ondoren, Budimirrek egin du gola.

Abantaila hori lortu ondoren, Osasunak martxa bat jaitsi du, eta baloiaren jabe izaten jarraitu du, presarik gabe. Levante, bere aldetik, hasiera txarrari buelta ematen saiatu da. Urruneko jaurtiketekin min egiten saiatu da, Pablo Martinez bereziki, baina Sergio Herreraren atean arrisku gehiegi sortu gabe.

Espiren bi burukada izan dira etxekoen aukera argienak, baina kanpora joan dira. Lehen ordu erdia pasatuta, korner batean, Levantek aldea murriztu du Victor Garciaren golarekin (1-2).

Handik minutu batera, Victor Garciak bere bigarren gola sartu du emaitza berdintzeko. Urrunetik erdiraketa-jaurtiketa bat eginda, gol ikusgarria egin du, Herrera aurreratuta zegoela baliatuz (2-2).

Egoera okertzeko, lehen zatia amaitzear zegoenean, Sergio Herrera kaleratu du epaileak. Baloi baten bila irten da, distantziak gaizki neurtu ditu, eta areatik kanpo eskuarekin eman dio baloiari. Epaileak txartel gorria atera dio zuzenean.

Levante gogotsu itzuli da aldageletatik, eta bere arean itxi du Osasuna. Gehiago gerturatzen hasi da, eta Bruguek langara bidali du baloia buruz. Partidak itxura onik ez zuela ikusita, Liscik aldaketa bikoitza egin du: Torro eta Raul Garcia de Haro zelairatu ditu Iker Muñoz eta Budimirren ordez.

Hala ere, Levantek jokoaren agintea izaten jarraitu du, eta Aitor Fernandezek askotan atera behar izan ditu eskuak bere geldiketekin taldea salbatzeko.

Azken minutuetan, Eyongek bakarrik errematatu du buruz area barruan, eta partida iraultzeko balio izan duen gola eman dio Levanteri (3-2).

Osasunak ez du jakin bi goleko abantaila aprobetxatzen, eta jokalari bat gutxiago izatea pisu handiegia izan da. Hartara, punturik gabe itzuli da Valentziatik.