Athletic vs Mallorca, lehorteari amaiera emateko erronka

Athletic Clubek eta Mallorcak Errege Kopako finala jokatuko dute larunbat honetan Sevillan, Cartuja estadioan. Bi taldeentzat hitzordu historikoa izango da gaurkoa; hain zuzen, Ernesto Valverderen eta Javier Aguirreren taldeen 40 eta 21 urteko lehorteei amaiera emateko, hurrenez hurren. Partida 22:00etan hasiko da, eta ETB1ek eta eitb.eus-ek zuzenean emango dute. 

Bi estiloren arteko lehia izango dela aurreikusten da. Athleticen bizitasuna eta intentsitatea izango dira batetik (ezaugarri horiek egin dute euskal taldea faborito) eta blokea eta atzeko sendotasuna izango dira bestetik (horiek eramn dute Mallorca bere laugarren finalera).

Ia mende batez "Kopen errege" eztabaidaezina izan ondoren, Bilboko taldeak Sevillan bilatuko du bere koparik desiratuena, Cartujan berriro ere.

Estatistika ofizialen arabera, 24. garaikurra izango litzateke Athleticentzat; klubaren zenbaketaren arabera, aldiz, 25.a, 1902ko Koroatzearen Kopa ere zenbatzen baitu, Alfontso XIII.aren koroatzearen ospakizunak zirela-eta jokatu zen txapelketaren garaikurra. Ordutik, baina, abizen ezberdinak izan ditu kopa horrek. Kontuan hartu behar da Athleticek 1902ko lehen edizioa ere zenbatzen duela, nahiz eta Espainiako Futbol Federazioak garaikurra Bizkaiarena dela esan. Athleticen museoan dago ikusgai kopa hori.

Talde zuri-gorria bere 46. finalera iritsi da. Zalantzarik gabe, hauxe da Athleticek gehien desiratzen duen titulua; izan ere, jokatu dituen azken 6 finaletan ez du garaikurra altxatu: 1985ean lehena, bere azken titulua irabazi eta hurrengo urtean, eta azken hamarkada eta erdi honetan azken bostak, Leo Messiren Bartzelona garaitu ezinik.

Hala ere, Reala ere oztopo izan da zuri-gorrientzat; izan ere, inoiz izan den finalik luzeena irabazi zuten gipuzkoarrek, 2020koa, pandemiaren ondorioz programatuta zegoena baino urtebete geroago jokatu behar izan zena.

Bizkaiko taldeak 1984an lortu zuen azkena. Beraz, 40 urte pasatu dira Santiago Bernabeun izandako finalean Bartzelona 1-0 mendean hartu zuenetik. Javier Clementek zuzentzen zituen zuri-gorriak, eta Endika Guarrotxenak sartu zuen lehoei garaipena eman zien gola, lehen ordu laurdenean. Cesar Luis Menottik gidatutako Bartzelona ez zen gai izan emaitzari buelta emateko. Diego Armando Maradonak eta Bern Schusterrek jokatzen zuten orduan Kataluniako taldean.

Partida hura amaieran jokalarien artean izandako liskarrengatik ere gogoratzen dute askok, ostikoka, ukabilkadaka eta kolpeka bukatu baitzuten. Ordutik, Athleticek sei final galdu ditu. Guztira, 39 final jokatu ditu.

Mallorcarentzat, ordea, laugarren finala izango da honakoa. Lehen biak galdu egin zituen: 1991n, Atletico Madrilen aurka luzapenean, Santiago Bernabeun, eta 1998an, Bartzelonaren aurka penaltietan, Mestallan, partida bana amaitu ostean.

2003an, ordea, irabazi egin zuen Mallorcak, Elxen, Martinez Valero zelaian. Gregorio Manzanoren taldeak 3-0 irabazi zion Huelvako Recreativori. Walter Pandiani uruguaitarrak sartu zuen gol bat, penaltiz, eta Samuel Eto'o kamerundarrak egin zituen beste biak.

Gaurko hitzordu honetara, hala ere, indarberrituta iritsiko da Athletic, Kopan jokatutako partida guztiak irabazita (7); Bartzelonaren kontrako bat eta Atleticoren aurkako bi tartean.

Intentsitate, presio eta arima erasokorreko talde betearekin zelairatuko da, eta luxuzko aurrelariekin, Nico eta Iñaki Williams eta Oihan Sancet internazionalekin, eta Gorka Guruzetarekin, denboraldi honetan 15 gol sartu dituen aurrelariarekin.

Ernesto Valverdek zuzentzen duen hamaikakoa oso orekatua eta fidagarria da, eta ez du bere izarretako bat izango, Espainiako selekzioarekin titularra den Unai Simon, Koparako Julen Agirrezabala aukeratu baitu.

Kirol arloari dagokionez, Mallorca mendean hartzeaz gain, entrenatzaile zuri-gorriaren kezkak Nico Williams eta Yeray Alvarez izango dira, giharretako mina izan ostean zalantzan baitaude. Biak jokatzeko moduan daudela dirudien arren, Yeray Santiago Bernabeun lesionatu zen igandean, eta litekeena da hasieratik aulkian geratzea; beraz, erdiko atzelarien bikotea Dani Vivianek eta Aitor Paredesek osatuko lukete.

Hegalekoak Oscar de Marcos eta Yuri Berchiche eskarmentudunak izango dira, eta pibote bikoitzerako Iñigo Ruiz de Galarreta eta Beñat Prados dira faboritoak. Ezusteko bi opari izan dira horiek Athleticentzat denboraldi honetan, espero baino askoz gehiago igo baitute taldearen joko-maila.

"Mallorcak dena emango du"

Aguirreren Mallorca oso gustura dago aurkariarentzat faborito nagusia izatearekin, baina taldeak badaki aukerak dituela, eta zerua ukitzeko borrokatuko da bere historiako bigarren garaikurra altxatzeko, 2003an Elxen irabazi zuenaren ondoren.

"Mallorcak dena emango du"; horixe da jokalarien, teknikarien eta zuzendaritzako kideen eta 21.000 jarraitzaileen sentimendua laburbiltzen duen esaldia.

Aguirrek ez ditu bere kartak erakutsi nahi izan partida erabakigarriaren aurretik. Son Bibiloniko instalazioetan egindako azken entrenamenduan, euskal jatorria duen entrenatzaile mexikarrak jokalari guztiak izan zituen erabilgarri, baita Martin Valjent erdiko atzelaria eta Omar Mascarell erdilaria ere. Zalantzan zeuden biak, baina litekeena da entrenatzailearen esanetara egotea, hark egoki baderitzo.

Aguirrek bere defentsa bloke klasikoa errepika dezake finalean, erasorako bokazioa duten hiru erdiko eta bi alboko dituena, hala nola Gio Gonzalez uruguaitarra (Reale Arenan, Realaren aurkako 1-1ekoan gola sartu zuena) eta Jaume Costa valentziarra.

Atean, Dominik Greif eslovakiarrak esku-hartze erabakigarriekin irabazi du titular izateko eskubidea, eta Martin Valjent, Antonio Raillo eta Jose Copete izango ditu ziurrenik ondoan.

Bermiloi taldea bi aurrelarirekin (Muriqi, Larin edo Abdon Prats) zelairatzen bada, Samu Costa, Sergi Darder eta Dani Rodriguez izango dira zelai erdia osatzen; Muriqik bakarrik jokatzen badu goian, eremu zabala erdiko laurden batekin indartuko da, Manu Morlanesekin ziurrenik.

Estatistikak

Athleticek eta Mallorcak aurtengo Kopan izandako estatistikei erreparatzen badiegu (Bilboko taldea izango da etxekoa, aurkariak baino antzinatasun handiagoa baitu), argi ikus dezakegu zergatik sailkatu diren finalerako, zer dela eta jokatuko duten titulua euren artean. Atxikitako irudian ikusten denez, Valverderen gizonek gol gehiago sartu dituzte, partidako (2,6; Aguirrerenek 2,1), eta batez beste 0,4 gol jaso dute biek partidako; Athleticek erremate gehiago egin ditu aurkariaren atera (7,1 partidako; Mallorcak 5,4), eta gehiago jokatu du aurkariaren arean: batez beste, 29,3 aldiz jo dute zuri-gorriek baloia aurkariaren area horretan, eta Mallorcak 22,3 alditan.

Balizko hamaikakoak:

- Athletic Club: Agirrezabala, De Marcos, Vivian, Paredes, Yuri, Prados, Galarreta, Iñaki Williams, Sancet, Nico Williams eta Guruzeta.

- RCD Mallorca: Greif, Gio González, Valjent, Raillo, Copete, Jaume Costa, Samu Costa, Sergi Darder, Manu Morlanes, Dani Rodriguez eta Muriqi.

Epailea: Jose Luis Munuera Montero.

Estadioa: Cartuja (Sevilla).

Ordua: 22:00.