Athleticek, bigarren zatian hamar futbolarirekin jokatuta, 2-2 berdindu du Getaferekin, San Mamesen

Athleticek berdindu egin du, 2-2, Getaferen aurka, asteazkenean, San Mamesen, 2023-24 denboraldiko EA Sports Ligako zazpigarren jardunaldian. Yuri Berchicek, aurreneko zatian, eta Iñaki Williamsek, bigarrenean, Athleticen golak egin dituzte; Gaston Alvarez eta Juanmi Latasa izan dira Getaferen golegileak. Bilboko taldea hamar jokalarirekin aritu da bigarren zatian; izan ere, lehen zatiko luzapenean, epaileak txartel gorria atera dio Oihan Sanceti.

San Mameseko zaleek partida bizi-bizia ikusi dute; bi taldeek izan dituzte gol aukera onak, eta aztertzeko moduko hainbat jokaldi izan dira. Athleticek erakutsi egin du zergatik eman dion hasiera ona Ligari, eta gertu izan du garaipena, lehen zatiko luzapenean hamar jokalarirekin gelditu bada ere. Ernesto Valverderen gizonak, Getafek banakoa sartuta, berriro ere jarri dira aurretik, eta ausart ibili dira lehian; aurkariak ere egin du neurketa ona. Azken emaitzak, 2-2ko horrek, berdegunean ikusitakoarekin bat egiten du; zuri-gorriak eta Jose Bordalasen taldea amaierara arte izan dira hiru puntuak eskuratzeko ahaleginetan.

Athletic-Getafe partidako laburpena (2-2)

Yuri Berchiche nabarmendu ahal da; izan ere, ezker hegaleko atzelariak denboraldiko aurreneko gola sartu du, falta jaurtiketa batean. Iñaki Williamsek partida oso ona egin du, eta Iker Muniainek, azken minutuetan zelairatuta, Athleticeko historiako bigarren jokalaria da, jokatutako partidei erreparatuta, Txetxu Rojorekin batera; nafarrak, dagoeneko, 541 neurketa ditu elastiko zuri-gorriarekin. Oihan Sancet ere izan da, asmo hori izan ez badu ere, protagonistetako bat, epaileak kanporatu egin baitu.

Herrera, zelai erdian

Aurreko ostiralean Mendizorrotzan hasieratik ateratako hamaikakoarekin alderatuta, Ernesto Valverdek aldaketa bakarra egin du: Ander Herrera sartu da zelai erdian, lesionaturik dabilen Iñigo Ruiz de Galarretaren ordez. Jose Bordalasek, aldiz, agian bere taldeak soilik bi atseden egun izan dituelako igandean Donostian galdu zuenetik, sei gizon aldatu ditu, hasierako hamaikakoan; besteak beste, Damian, Mitrovic eta Alderete aulkian hasi dira, San Mamesen.

Lehen zatiko aurreneko minutuetan sartu du Yurik 1-0ekoa, eta luzapenean izan da Sanceten kanporaketa. Gipuzkoar atzelariak gola egin aurretik, bazirudien Getafe sendo zegoela berdegunean; zarauztarraren ezkerkadak, baina, konfiantza eman dio Athletici. Indarrez eta abiaduraz jokatuz, eskuin hegaletik arriskua sortuz, zuri-gorriak ondo aritu dira, arin eta trebe. Oscar de Marcos eta Iñaki Williams nabarmendu dira, hainbat jokalditan, eskuinaldetik.

De Marcosek, 21. minutuan, Herreraren pase sakon bikaina baliatuz, gertu izan du bigarrena, eta Guruzetak, 35.ean, area barruan ondo mugituta, zutoinera jaurti du. Getaferen aldetik, Unai Simonek geldiketa bikaina egin dio Borja Mayorali. Zuri-gorriek kontrolpean zuten jokoa, eta aurkaria baino erosoago zebiltzan; lehen zatiko luzapenean, baina, Oihan Sancet, Diego Rico ere bila zebilen baloi batean, hanka asko altxatu du, eta Rico aurretik iritsi da. Mendillorriko jokalariak falta egin du, eta Diaz de Merak epaileak txartel gorria atera dio nafarrari.

Banakoa, eta Athleticen bigarren gola

Jokalari bat gehiago zuela, Getafek anbizio handiagoa izan du bigarren zatiaren hasieran. Seigarren minutuan, korner batean, Gastonek buruz jo du, Athleticeko aterantz, eta baloiak Iñaki Williams jo du. Maksimovicek ere errematatu du, baina 1-1ekoa Gaston uruguaiarrak egin du, baloia barruan baitzegoen.

Bizkaiko taldea, nolanahi ere, ez da atzean geratu. Mikel Vesga eta Herrera, beste behin, zelai erdian kalitatea jartzen ahalegindu dira, Athletic berdegunean berriro hobeto kokatze aldera. Partida parekatu egin da, bi taldeak zebiltzan indartsu; orduan, 62. minutuan, Yerayk pase polita eman dio, luzean, De Marcosi, azken horrek bikain kontrolatu du baloia, eta Iñaki Williamsi laga dio. Bilbotarra atzetik zetorren, arean sartu da, eta, ezkerrez egindako jaurtiketa eder baten bidez, zuri-gorrien bigarren gola lortu du.

Madrilgo taldeak, baina, gogor jo du aurrera. 70. minutuan, Unai Simonek eta langak eragotzi diote gola Latasari; hiru minutu lehenago, murgiarrak geldiketa ederra egin dio Oscarri, azken horrek urrutitik jaurti ostean. 83. minutuan, Jose Angel Carmona oso ondo sartu da eskuinaldetik, erdiraketa bikaina egin du, eta, gertutik, Juamni Latasak, 1,91ko aurrelaria bera, burukada hobeezina egin eta neurketa berriro ere berdindu du.

Azken luzapena luzea izan da, eta polemika apur bat ere izan du; Bordalas bera kanporatu du epaileak, eta hainbat jokalari sartu dira eztabaidan, neurketa amaitzen ari zela. Ez da markagailua berriro ere aldatu, eta Athleticek Liga honetako 14. puntua batu du; oraingoz, BIlboko taldea laugarren dabil sailkapenean.

Fitxa teknikoa

2 - Athletic: Unai Simon; De Marcos, Vivian, Paredes (Yeray, 46. min), Yuri; Vesga (Dani Garcia, 65. min), Ander Herrera (Prados, 82. min); Iñaki Williams, Sancet, Berenguer (Muniain, 85. min); eta Guruzeta (Raul García, 65. min).

2 - Getafe: David Soria; Iglesias (Carmona, 77. min), Duarte, Gaston, Diego Rico; Aleña (Latasa, 65. min), Maksimovic (Mata, 85. min), Arambarri (Djene, 77. min), Angileri (Oscar Rodriguez, 65. min); Greenwood eta Mayoral.

Golak: 1-0, 6. min: Yuri. 1-1, 50. min: Gaston. 2-1, 62. min: Iñaki Williams. 2-2, 83. min: Latasa.

Epailea: Isidro Díaz de Mera Escuderos (Gaztela-Mantxako Batzordea). Sancet kanporatu du, lehen zatiko luzapenean, Diego Ricoren aurrean hanka gehiegi altxatzeagatik, eta Jose Bordalas Getafeko entrenatzailea, 96. minutuan. Gainera, jokalari hauei atera die txartel horia: Paredes (2. min), Guruzeta (58. min), Yeray (92. min), Raul Garcia (96. min), Athletice, eta Damián (6. min), Djene (94. min) eta Gaston (96. min).

Gertakizunak: EA Sports Ligako zazpigarren jardunaldiko partida. San Mamesen 43.091 zale izan dira.