Ion Izagirre nagusitu da Arraten, eta Daniel Felipe Martinezek eskuratu du Itzulia
Daniel Felipe Martinezek (Ineos) bereganatu du 2022ko Euskal Herriko Itzulia, Eibarren hasi eta Arraten amaitu den azken etaparen ostean. Eguneko garaipena Ion Izagirre (Cofidis) ormaiztegiarrak eskuratu du, indartsuen taldeko esprintean azkarrena izan eta gero. Izagirrek sailkapen nagusiko bigarren postua eskuratu du azkenerako, Martinez kolonbiarrarengandik 11 segundora. Pello Bilbao gernikarrak, bere aldetik, bosgarren tokian bukatu du nagusia, 32 segundoko atzerapenarekin.
Davide Formolo (UAE), Nelson Oliveira (Mistar), Tony Gallopin (Trek Segafredo), Cristian Rodriguez (TotalEnergies) eta Xabier Mikel Azparren (Euskaltel Euskadi) izan dira eguneko ihesaldi nagusiko lehen protagonistak. Dena den, lehendabizi Donostiako txirrindulariak eta, gerora, mendiko liderrak amore eman behar izan dute ibilbidearen gogortasunak behartuta, eta Formolo, Oliveira eta Gallopin baino ez dira geratu buruan.
Azurki (1. maila) eta Gorla (2. maila) elkarrekin pasatu dituzte, baina Krabelinera heldu direnean, Formolok atzean utzi ditu Gallopin eta Oliveira, eta buruan pasatu du mendate gaina.
Tropelean egun osoan Ineos ibili da buruan kontrol lanetan, batez Omar Fraile eta Geraint Thomasen eskutik. Hala, faboritoek elkarrekin egin dute etapa, haiek ere Krabelinera heldu diren arte.
Orduan, Roglicek sua piztu du helmugarako 41 kilometrora, eta berarekin batera eraman ditu Daniel Felipe Martinez (Ineos), Enric Mas (Movistar) eta Vlasov (Bora). Gerora heldu dira Ion Izagirre (Cofidis) eta Evenepoel (Quick-Step) liderra; Pello Bilbao (Bahrain), berriz, aldenduta geratu da.
Ondoren, Masek jo du erasoa, eta harekin batera egin dute Vingegaardek (Jumbo), Martinezek, Izagirrek, Vlasovek eta Marc Solerrek. Eraso horri ezin izan dio erantzun Evenepoelek, eta seiek bidea egin dute. Seikotea, zazpikote bihurtu da berehala, Nelson Oliveirarekin bat egin dutenean, eta hura lanean jarri da Mas taldekidearen mesedetan helmugarako 37 kilometroren faltan.
Krabelinen jaitsieran, Pello Bilbaok abiadura bizian jardun du, eta eurekin bat egiteko gai izan da. Ez hori bakarrik, jotzen jarraitu du asko arriskatuz, eta, halako batean, bere gurpilean zihoan Mas erori egin da. Horren eraginez, nahasmena sortu da, eta Pello Bilbao, Izagirre, Vlasov eta Vingegaard geratu dira buruan. Handik gutxira Formolorekin bat egin dute.
Urkaregiko aldapetan, boskotearen aldea 30 segundo ingurukoa zen liderraren, Daniel Felipe Martinezen, eta Roglicen taldetxoarekiko. Bertan, Ineoseko kolonbiarra eta Evenepoel baino ez zeuden lanean, baina tartea murrizteko gai izan dira, batez ere belgikarraren jo ikusgarriaren bultzadarekin. Hala, 19 kilometroren faltan, Urkaregin behera, 15 segundoko tartea egon da bi taldetxoen artean.
Behin Elgoibar atzean utzita, helmugarako 14,5 kilometrora, Evenepoelek eta Martinezek aurreko bostak harrapatu dituzte. Hain zuzen ere, une horixe baliatu du Ion Izagirrek aurrera egiteko, eta harekin batera joan dira Marc Soler eta Daniel Felipe Martinez. Saiakera hori ere Evenepoelek bota du behera, eta orduantxe iritsi da geldialditxoa Itzulia jokatzen ari zirenen taldera, Eibarko esprintera heldu diren arte. Hor denbora gainsariak zeuden txirrindularien zain, eta Evenepoel (3 segundo), Daniel Felipe (2) eta Pello Bilbao pasatu dira aurretik.
Formoloren txanda heldu da orduan, eguneko azken ahalegina egiteko garaipenaren bila, eta tartea zabaldu du.
Faboritoen artean, Ion Izagirrek erritmoa aldatu du Usartzan gora, eta nahikoa izan da Evenepoel atzean uzteko. Ondoren, Vlasoven oldarraldia iritsi da, eta Pello Bilbaok pairatu du hura. Halako batean, Ion Izagirrek aurrekoaren gurpila ukitu eta lurrera erori da, eta egoera hori probestu du Vlasovek erritmoa biziki aldatzeko, hari elkartuta Daniel Felipe, Vingegaard eta Soler zeudela. Ormaiztegiarrak, baina, erakustaldia emanda, harrapatu egin ditu Usartzako aldape gogorretan, euskal zaleen animoen hauspoarekin. Bitartean, Pello Bilbao bakarrik geratu da, atzerago.
Hala, etapako garaipena bost txirrindulari horien artean jokatu dute, eta Ion Izagirre izan da azkarrena eta argiena Arrateko helmugan. Marc Solerren gurpila harrapatu du, eta azken bihurgunean aurrea hartu dio.
Horrenbestez, helmugan, Izagirre lehenengo, Vlasov bigarren, Marc Soler hirugarren eta Dani Martinez laugarren, denak denbora berarekin; podiuma, berriz, Dani Martinezek, Ion Izagirrek (11 segundora) eta Aleksandr Vlasovek (16ra) osatu dute. Azkenerako, Pello Bilbaok bosgarren tokian amaitu du, 32 segundoko atzerapenarekin, haren aurretik Remco Evenepoel izan da, 21era.
Ikusi 2022ko sailkapen guztiak
ITZULIKO 6. ETAPAKO SAILKAPENA:
ITZULIKO SAILKAPEN NAGUSIA:
Zure interesekoa izan daiteke
Euskal txirrindulariak, protagonistak etxean
Itzuliak Paul Seixasen garaipen eztabaidaezina utzi du, eta baita azpimarratzeko moduko beste irudi eta protagonista asko ere; euskal txirrindularien jarduna, esate baterako. Alex Aranburuk, Igor Arrietak, Ion Izagirrek eta Pello Bilbaok ez dute aurtengo edizioa ahaztuko.
Ion Izagirrek omenaldia jaso du Itzuliko azken etaparen amaieran
Ormaiztegiko txirrindulariak erretiroa hartuko du denboraldi honen amaieran, 17 urteko ibilbide profesionalaren ostean.
Ion Izagirre: “Itzuliak asko eman dit, eta zortekoa naiz nire azken Itzulian laugarren bukatzeagatik"
Ion Izagirre (Cofidis) Itzuliko podiumean sartzen saiatu da, baina azkenean pozik hartu duen laugarren postuarekin geratu da. Azken aldiz lehiatu du lasterketa, eta asko eman diola onartu du.
Paul Seixas: “Oso pozik nago, oso aste berezia izan da niretzat"
Paul Seixas Decathlon taldeko 19 urteko txirrindulari frantziarrak nagusitasunez irabazi du 2026ko Itzulia, aurkari guztiak lehen egunetik azkeneraino menderatuta eta hiru garaipen eskuratuta.
Andrew Augustek irabazi duen Itzuliko 6. etaparen laburpena
Andrew August (Ineos) txirrindulari estatubatuarrak garaipen handia lortu du Bergaran, 2026ko Itzuliko seigarren eta azken etapan. Euria protagonista izan den lasterketan, Paul Seixasek ez du inolako oztoporik izan sailkapen nagusian gailentzeko eta, berarekin batera, Florian Lipowitz eta Tobias Halland Johannessen izan dira podimuean. Ion Izagirrek laugarren postuan bukatu du.
Paul Seixasek nagusitasun handiz irabazi du Itzulia, eta Andrew Augustek bereganatu du azken etapa
Itzuliko azken etapa ikusgarria izan da, eguraldiak lagundu ez badu ere. Andrew August (Ineos) txirrindulari estatubatuarrak garaipen handia lortu du Bergaran. Paul Seixasekin batera, Florian Lipowitz eta Tobias Halland Johannessen izan dira podiumean. Ion Izagirrek laugarren postuan bukatu du azkenekoz lehiatu duen Itzulia.
2026ko Itzuliko 6. eta azken etapa: Goizper Antzuola-Bergara (135,4 km)
Jarraitu zuzenean Goizper-Antzuolan hasi eta Bergaran amaituko den 2026ko Itzuliaren seigarren eta azken etaparen emanaldia, 14:30ean hasita.
Javier Romo etapa lehiatzeko aukerarik gabe utzi duen erorikoa
Mantxako txirrindularia lurrera joan da Izuako igoeraren amaieran, Seixas eta Lipowitzekin bat egin eta gutxira.
Izagirre: “Saiatu naiz Paul jarraitzen, baina ez zela nire erritmoa ikusi dut"
Ion Izagirre (Cofidis) Eibarren hasi eta bukatu den Itzuliko 5. etapa lehiatzeko borrokatu da. Lipowitzi eta Seixasi jarraitzen saiatu dela baina ez dela haien erritmoari eusteko gai izan esan du. Podiuma urrun duen arren, lortzen saiatuko dela adierazi du.
Paul Seixas: “Etapa gogorra izan da, eta pozik nago taldearentzat lortutako garaipenagatik"
Paul Seixas (Decathlon CMA CGM Team) txirrindulari frantziarrak Itzuliko hirugarren garaipena lortu du Eibarren. 19 urteko txirrindulariak eta Florian Lipowitzek Izuan gora hautsi dute lasterketa, eta frantziarra gailendu da Eibarko helmugan.