Erika eta Arai, Winter Serieseko txapeldunak final zirraragarri batean (12-15, 14-15)

Erika eta Arai markinarrek irabazi dute Durangoko Winter Seriesa Maite eta Maialen mendean hartuta. Partida parekatua eta gogorra izan da. Lan asko egin behar izan dute, batez ere atzelariek eta bigarren setaren amaiera benetan zirraragarria izan da: 9-9 berdindu dutenetik beste 5 aldiz izan dira parean zuriek 14-15 irabazi duten arte.

Erika eta Arai nagusitasunez gailendu ziren Helenaren eta Eneritzen aurrean finalerdietan (15-8, 15-4). Maitek eta Maialenek, berriz, lan gehiago egin behar izan zuten Arakistain eta Frida mendean hartzeko (15-12-15-13). Hala eta guztiz ere, final estua izan da.

Gernikako Winter Seriesaren bidetik, Durangoko Ezkurdi pilotalekuan bigarrenez agortu dira sarrerak eta hurbildu diren pilotazaleek maila handiko finalaz gozatu ahal izan dute.

Lehen seta berdindua joan da. Zuriak aurreratu dira markagailuan baina gertutik jarraitu dituzte laranjek eta azkenean, 5-5 eta 7-7 berdindu eta gero, partidan lehen aldiz aurretik jarrita, 8-7 irabazten joan dira Maite eta Maialen atsedenaldira.

Itzuleran lehen tantoa zuriek egin dute eta 8-8 berdindu da norgehiagoka, lehengo lepotik burua, 11-11 eta 12-12 berdindu dute, azkenean, baina, zuriek 3 tanto jarraian egin eta lehen seta bereganatu dute Erika eta Arai markinarrek.

Bigarren seta ere benetan parekatua izan da eta bereziki gogorra. Erremate gutxiko partida izan da eta atzelariek lan handia egin dute eta pilota zail asko sartu. Atsedenaldiaren aurretik hiru aldiz berdindu dute eta 8-5ekoarekin aurretik joan dira aldageletara laranjak.

Aldageletatik itzuli direnean borroka benetan gogorra izan da. Maite eta Maialen hirugarren seta behartzeko helburuarekin eta Erika eta Arai partida irabazteko grinarekin. Gauzak horrela, 9-9, 10-10, 11-11, 12-12, 13-13 eta 14-14 berdindu dute. Amaiera zirraragarria izan du bigarren setak eta azken unera arte emozioz beterik egon da.

Azkenean, Maialenek ez du ezker paretara itsatsitako pilota bereganatzea lortu eta Erikak eta Araik eskuratu dute Durangoko Winter Serieseko txapela.

Aritz Erkiaga, buruz burukoan txapeldun

Buruz buruko finala, berriz, Aritz Erkiagak eskuratu du. Ispasterko aurrelariak bi setetan azpiratu du Barandika gernikarra (13-15, 12-15). Banakako finala ere gogorra izan da eta tanto segida handiak eskuratu dituzte bi pilotariek.

Lehen setaren hasieran nabarmen nagusitu da Erkiaga: 1-8 joan da aurretik atsedenaldira. Aldageletatik bueltan ere lehen tantoa berak egin du baina 11.a lortu duenerako, Ezkurdiko markagailuak 9-11koa erakusten zuen. Setaren bukaeran Barandika suspertu egin da eta ez dio lan erraza jarri Erkiagari. Hasieran espero zena baino emaitza estuagoa lortu du Ispasterkoak: 13-15.

Barandikak lehen setaren amaierari jarraipena eman dio eta bikain hasi du bigarrena: 6-2 aurreratu da eta 8-4 joan dira atsedenaldira. Hala ere, hutsartetik bueltan Erkiagak 4 tanto jarraian egin eta 8-8 berdindu du. Hortik aurrera 10-10 eta 11-11 berdindu dute baina Barandikak ezin izan du Erkiaga gelditu eta Ispasterkoak jantzi du buruz buruko txapela.