Catenak eta Budimirrek Europara hurbildu dute Osasuna (2-0)
Osasunak 2-0 irabazi dio Atletico Madrili ostegun honetan Sadarren jokatu den EA Sports Ligako 36. jardunaldiko partida. Catenaren eta Budimirren golei esker, Europako postuak markatzen dituen Rayo Vallecanorekin berdinduta geratu da sailkapenean.
Madrilgo taldeak hobeto ekin dio partidari, eta berehala sortu du arriskua. Korner batean, Sorloth errematea egiteko zorian egon da area txikian, baina Catena garaiz iritsi da jaurtiketa desbideratzeko, eta baloiak Sergio Herreraren eskuetan bukatu du. Gorritxoen erantzuna Orozen oinetatik etorri da; Atleticoren akats bat aprobetxatu du Oblak proban jartzeko, baina jaurtiketa arazorik gabe gelditu du atezainak.
Hurrengo minutuak parekatuagoak izan dira, bi taldeen erasoekin, 25. minutuan Catenak markagailua mugitu duen arte. Korner batean, buruz bikain errematatu du baloia sarera bidali eta bere taldea aurretik jartzeko (1-0).
Sorloth berdinketa sartzear izan da baloia buruz errematatuz, baina Sergio Herrerak geldiketa bikaina egin du Osasuna aurretik joan zedin atsedenaldira.
Bigarren zatian, Atleticok lehen zatian galdutako nagusitasuna berreskuratu du, eta Osasunak indarra hartu du atzean, Sergio Herreraren gidaritzapean. Sorlothek arriskua sortu du berriro, zelaia utzi aurretik, baina ez du ezer positiborik atera. Simeonek sei aldaketa egin ditu partidaren gidoia aldatzen saiatzeko; Vicente Morenok, berriz, nahiago izan du itxaron, eta Ruben Peña bakarrik zelairatu du Kike Barjaren ordez.
Atleticok presioarekin jarraitu du, eta berdinketatik gertu zegoela zirudienean Budimir agertu da Osasunaren garaipena ixteko. Kroaziarrak 2-0ekoa sartu du buruz, gorritxoak Europako postuetara hurbiltzeko.
Fitxa teknikoa:
2 – Osasuna: Sergio Herrera; Areso, Catena, Boyomo, Juan Cruz (Bretones, 81. min); Pablo Ibañez (Moncayola, 71. min), Torro, Aimar (Moi Gomez, 88. min); Peña (Barja, 60. min), Budimir (Raul, 88. min), Bryan (Muñoz, 71. min).
0 – Atletico: Oblak, Llorente, Le Normand, Gimenez, Javi Galan (Azpilicueta, 46. min), Koke (Correa, 64. min), Barrios (Nahuel Molina, 52. min), De Paul, Giuliano (Lino, 46. min), Julián Alvarez (Griezmann, 63. min) eta Sorloth (Gallagher, 67. min).
Golak: Catena, 1-0 (25. min); Budimir, 2-0 (82. min).
Epailea: Mario Melero Lopez. Txartel horia atera die Pablo Ibañez gorritxoari eta De Paul koltxoneroari.
Zure interesekoa izan daiteke
Juan Cruz: “Ohorea eta harro egoteko modukoa izan da Osasunaren armarria defendatzea”
Atzelari madrildarrak Nafarroako kluba utzi du, azken sei denboraldiak Iruñean eman ostean. Agur esatean, nabarmendu du 2023ko Errege Kopako finala dela haren oroitzapenik bereziena, eta, halaber, taldekideekin eta Taxoaren egunero-egunero bizi izandakoa.
Braulio Vazquez: “Uste dut pizgarri bat behar genuela, katarsi bat"
"Ez dut barkamenik eskatuko 8 urtez lehen mailan mantentzeagatik, nortzuk garen jakin behar dugu. Ez dakit zenbat aldiz entzun dudan anbizio falta dagoela", aurpegiratu du kirol zuzendari gorritxoak denboraldi amaierako prentsaurrekoan. Bestalde, Kike Barja kapitainaren kontratu berritzea % 99ra itxitzat jo du.
Juan Cruzek ez du Osasunan jarraituko
Atzelariak sei denboraldi eman ditu Nafarroako klubean; Elxetik iritsi zen bertara. 164 partida jokatu ditu talde gorritxoan: “Bere lehen denboralditik, taldekideen eta zaleen errespetua eta maitasuna bereganatu zituen, eta balioak defendatzen jakin izan du”, nabarmendu du Iruñeko klubak.
Alessio Liscik Osasunako entrenatzailea izateari utzi dio
Nafarroako klubak astelehenean iragarri du italiarrak ez duela jarraituko taldea zuzentzen; Liscik beste urtebeterako kontratua zuen, Osasunarekin.
Catena: “Ez da izan espero genuen bezala, ezta nahi genuen bezala ere, baina Lehen Mailan gaude"
Osasunako jokalariak salbazioa lortu ondoren hitz egin du, nahiz eta Getaferen aurka galdu (1-0) EA Sports Ligako azken jardunaldian. Kritiko agertu da denboraldi amaieragatik, batez ere atzetik datozenei eragindako "sufrimenduagatik".
Osasunak galdu egin du Getaferen aurka, baina Lehen Mailan jarraituko du (1-0)
Porrotaren ondoren, aurkari zuzenen emaitzen zain geratu dira. Gironaren eta Elxeren arteko berdinketak mesede egin dio talde nafarrari, horri esker beste urtebetez Lehen Mailan jarraituko baitu.
Lisci: “Taldea zelaian hilko da”
Alessio Lisci Osasunako entrenatzaileak autokritika egin du eta adierazi du gaizki egin zutela pentsatuz 42 puntu bilduta nahikoa zela mailari eusteko. Edonola ere, taldea ondo dagoela eta Getaferen aurkako “finalean” gorritxoek dena emango dutela ziurtatu du.
Zer behar du Osasunak mailari eusteko?
Osasunak ez dauka ziurtatuta lehen mailan jarraitzea, eta Getaferen etxean jokatuko du ligako azken partida. Jose Bordalasen taldeak, berriz, Conference Ligan sartzea izango du lehian.
Ateak irekita entrenatuko du Osasunak ostiralean, Sadarren, 18:00etan, Getaferen aurkako partida erabakigarriaren aurretik
Osasunaren zaleek talde nafarrari bultzada emateko aukera izango dute, Coliseum estadioan jokatuko den partidaren bezperan; talde gorritxoak EA Sports Ligan eustea bilatuko du.
Kike Barja: “Konfiantzaz, gogoz eta motibazioz gaude"
Kike Barja Osasunaren jokalariak asteburu honetan Getaferen aurka jokatuko duten partida erabakigarriari buruz hitz egin du. Adierazpenak, gaztelaniaz.