Jaitsierari ihes egiteko garaipena lortu du Alavesek Betisen aurka (2-1)

Alavesek 2-1 irabazi du Betisen aurka igande honetan Mendizorrotzan jokatu den EA Sports Ligako 21. jardunaldiko partidan. Sivera harresi bilakatu da atean, eta Carlos Vicentek eta Toni Martinezek sartu dituzte babazorroak jaitsiera postuetatik ateratzeko golak.

Partida ezin hobeto hasi dute babazorroek; izan ere, Carlos Vicentek jokaldi ona egin du Boyerekin batera, arearaino iritsi dira eskuin hegaletik, eta gola sartu du 3. minutuan (1-0).

Gola suspergarria izan da, eta gora etorri dira. Hala, Blancok eta Protesonik ere aukera argiak izan dituzte, baina baloia ez da sarera heldu. Betisek ere izan du abaguneren bat, baina Sivera aurkitu dute aurrean. Bakanmbuk berak hiru aldiz berdindu ahal izan du markagailua.

Ordu erdira, Tenagliak Abde lurrera bota du, area barruan, eta epaileak penaltia adierazi du. Baina, VARean jokaldia berrikusi ondoren, ohartu da Betisen jokalariak zapaldu duela babazorroa, eta bertan behera utzi du penaltia.

Lehen zatiko azken minutuan berdin-berdintsu aritu dira, baina euskal taldeak atsedenaldira aurretik joatea lortu du.

Bigarren zatiaren hasiera lehenengoaren kopia izan da. Lehen jokaldian, Toni Martinezek buruz errematatu du erdiraketa bat, bigarren gola igotzeko markagailura (2-0).

Mendizorrotzan jai giroa nabaria izan da, eta jokalariek behar bezala erantzun diete zaleei. Sendo ibili dira zelaian, eta Betisek ez zuen arearako bidea aurkitzen. Hala ere, Sivera pare bat aldiz gehiago agertu behar izan da, sustorik ez izateko.

Partidako azken aukerak Betisek izan ditu, eta luzapenean Abdek gola sartzea lortu du (2-1). Baina Alavesek ondo eutsi dio etxean, bost jardunaldiren ostean garaipena lortu du, eta jaitsiera postuetatik urrundu da.