Mendizorrotzaren mendeurrenaren ospakizun handia egingo du Alavesek

Alaveseko taldea Mendizorrotza futbol-zelaiaren mendeurrena ospatzeko festa handirako prestatzen ari da. Hainbat jarduera izango dira, eta apirilaren 27an Alaves eta Celtaren arteko partidarekin amaituko da.

Deportivo Alaves, "Arabako Garrasia" (animaziozko harmaila), Arabako erakundeak eta gizarte osoa batuko dira futboleko estadio zaharrenetako baten urtebetetze festa ospatzeko. Ekitaldiak ostiral honetan hasiko dira Cervantes Pasealekuan egingo den graffiti-tailerrarekin, eta apirilaren 24an, asteazkena, 'Belaunaldiz belaunaldi' hitzaldi-solasaldia egingo da.

Egun bereziaren aurreko egunean, ostiralean, beste solasaldi bat egongo da Mendizorrotzaren historiaren inguruan. Apirilaren 27 jardunaldia 11:30etan hasiko da "Fan Zone"-aren irekierarekin. Gune honetan Mendizorrotzaren 100 urteen argazki erakusketa bat egongo da, jolas puzgarrien gune bat, simulagailuak, 3x3 futbol-kantxa bat eta haurrentzako tailerrak.

Gainera, autografoak sinatzeko denbora egongo da, gizonezkoen eta emakumezkoen Deportivo Alaveseko jokalariekin. Musika animazioa eta herri-kirolen erakustaldiak izango dira bertan.

Alavesek eta Celtak jokatuko duten partidarekin batera denez ekitaldia, Arabako taldearen autobusari harrera egingo zaio Cervantes Pasealekuan, estadioaren inguruan, eta, ondoren, 'Beti gurekin, beti Mendizorrotzan' murala inauguratuko da, txalaparta, bertso eta euskal dantzekin. Partidaren atarian Arabako zaleen 'tifo' animaziozko pankarta handi bat egongo da eta aurreskua dantzatuko da. Bestalde, hurrengo asteazkenean, maiatzak 1, Mendizorrotzan emakumezkoen Alaves eta Athletic Cluben arteko lagunarteko partida bat ospatuko da 17:00etatik aurrera.

Mendizorrotzako jokalekua 1924ko apirilaren 27an inauguratu zen, Udalarena da eta gaur egun Alaves da jokalekuaren erabiltzaile bakarra.