Behobia-Donostia, atletismoaren jai erraldoia

30.000 korrikalari baino gehiagok osatuko dute Behobian hasi eta Donostian jarraipena izango duen atletismoaren jai erraldoia. 20 kilometroko ibilbidea aurretik eta aski ezagunak ditugun malda eta jaitsierak bitartean. Lasterketa bat baino gehiago da Behobia, zalantzarik gabe, eta aurtengo 54. edizioa ez da gutxiago izango, Iraitz Arrospide atleta gipuzkoarrak baitioen bezala "Olinpiar Jokoez baino gehiago hitz egiten da kalean Behobiaz".

Azter dezagun, beraz, lehen postuetan lehian arituko diren korrikalariak: Jaume Leiva dugu faborito nagusia aurtengo edizioan, baina ez ditu gauzak batere erraz izango, aldamenenean sasoi betean dauden Ivan Fernandez eta Iraitz Arrospide gipuzkoarra izango baititiu arerio nagusienetarikoak. Azken honek, eguraldia zein den iazko marka hobetetzen saiatuko da, berak dioen bezala, ordea, "euria eta haizearekin zailagoa izango da dena". Gainera, "inoiz baino hobeto" dagoela ziurtatu du Arrospidek, eta hurrengo Valentziako Maratoiari begira egindako preparazioak sasoi betean iristera ahalbidetuko omen duela.

Iazko edizioko garailea den Carlos Castillejok du probaren marka, zeinak 2016an 1:00:19ko denboran burutu zuen proba. Emakumezkoetan, Vanessa Veiga dugu zeinak 2014ean 1:09:58ko denboran burutu zuen lasterketa, eta ordutik, ez du inork ere lortu bere marka haustea. Ikus dezagun, bada, 2018 honetan historiako denborarik azkarrenak iristen diren edo arestian aipatutako marka hauek bere horretan jarraitzen duten.

Bestalde, emakumezkoen parte-hartzeari dagokionez, aipagarria dugu 1999. urtean %9.44koa izan zela tezbestekoa, eta edizioek aurrera egin ahala, portzentaiak gora egin du etengabe 2018. urte honetan batezbestekoa %24.48koa izan arte.

Horren harira, Oihana Kortazarrekin egon nahi izan dugu, munduko mendi lasterketaririk onenetako bat eta Behobia 2012ko garailea. "Nire kasuan, ez zan aparteko gakorik egon, denboraldi hortan asfaltoan asko nenbilen eta hurrengo astean mendi maratoi azkar bat nuen Argentinan, beraz, "entrenamendu" bezala hartu nuen Behobia eta entrenamenduak eta zortea lagun izanda, irabazi egin nuen".

Behobia-Donostia arrakastaz gainditzeko aholkuak adituen eskutik

"Azkenengo momentuan ezin da aurretik egin ez duguna egin eta hori argi izan behar dugu. Azken egun hauetan irteerek suabeak izan behar dte (%60an). Ez dira azken orduko mirariak existitzen eta tentuz hartu behar dira gauzak. Gauza arraroak edo berriak probatzen hasten baldin bagara, geure txarrerako izan daitezke eta negatiboki eragin (azken momentuko dietak, zapatila edo material berria). Egun bat lehenago, aktibazio txiki bat egin edo atsedena hartzea komeni da. Probaren egunean, ondo berotu (batez ere eguraldia ona baldin ez bada), eta geure erritmoa mantentzen saiatu behar gara. Horretan jarri arreta eta ahaztu aldamenekoek zer egiten duten, eta, batez ere, gozatu aukera eta momentua", azaldu du Iosu Fdz. De Gamboak, Jarduera Fisikoaren eta Kirolaren Zientzietan lizentziatuak eta korrikalarien entrenatzaileak.

Elikadurari dagokionez, "kirola bezala aurretik entrenatu beharreko zerbait da, beraz, proba egunean ez da komeni esperimenturik egitea, aurretik probatuta izango dugu bertan jan eta edango duguna. Bestalde, aurreko egunetan hidratazio egoki bat aurrera eramatea komeni da, atentzioa jarriz edaten dugun horri. Horrez gain, karbohidratoetan aberatsak diren elikagaiak jatea ere komeni da gure energia gordailuak beteta egon daitezen. Horretarako, arroza, pasta, patata, kuskusa… eta tankerako elikagaien kontsumoa handitu beharko da. Aurreko elikagai hauek zuriak izatea komeni da, integralak badira, zuntz kopuruak arazo gastrointestinalak eragin baititzake", azaldu digute On Ekin zentroko nutrizionistek.

"Probaren egunean, hidratazioa eta elikadura kontrolatzea ere komeni da, hau da, ura eta isotonikoa erabiliko ditugu hidratatzeko; azken hau gatz mineralak mantentzeko izango da egokia, izerdiarekin galdu egiten baitira. Elikadurari dagokionez, gelak, barritak (etxean egindakoak edota erositakoak), datilak, menbriloa, mahaspasak, platanoa… jatea aukera on bat litzateke. Hau gure gorputzeko energia mantentzeko da garrantzitsua.", azaldu dute nutriziniostek.

Azkenik, ezinbestekoa deritzote konpetizio ostean ere, hidratazio egoki bat mantentzeari eta karbohidrato eta proteinetan aberatsak dire elikagaiei; esaterako, fruta, arrautza, zerealak…