2026ko Italiako Giroko 9. etaparen profila, ibilbidea eta ordutegia: Cervia-Corno alle Scale (184 km)

2026ko Italiako Giroko bederatzigarren etapa maiatzaren 17an jokatuko dute, igandez. 184 kilometroko jardunaldia izango da; txirrindulariak Cerviatik irtengo dira, 12:35ean, eta Corno alle Scale lehenengo mailako mendatean amaitu, 17:00etatik 17:27ra bitartean. Lasterketak, biharamunean, atseden eguna izango du, bigarrenez aurtengo ekitaldian; izan ere, maiatzaren 18an, aurreko astelehenean ere gertatu zenez, ez da etaparik izango.

Bederatzigarren honetan, ziklistek bi mendate puntuagarri igo beharko dituzte. Lehena, Querciola, hirugarren mailakoa, 167,4. kilometroan utziko dute atzean. Benetan erabakigarria izan liteke, ordea, bigarrena, Corno alle Scale, alegia, etapa amaituko den mendatea; hori lehen mailako igoera da, 10,8 kilometro ditu, batez besteko malda % 6,1ekoa du, eta maldaren bat % 15ekoa ere bada. Giroa 2004an izan zen azkenekoz mendate horretan, eta txirrindulari handi batek eskuratu zuen garaipena: Gilberto Simonik. Italiarrak bi aldiz irabazi zuen Italiako Giroko sailkapen nagusia, 2001ean eta 2003an.

Askotan ikusi dugu nola lasterketak, hiru asteko itzulietan, hurrengo egunean atsedena dagoenean, kontrolatzeko oso zailak diren; ematen du txirrindulariek nahi izaten dutela egin biharamunean ezingo duten hori. Bada, kontuan izanik, gainera, profila nolakoa den, baliteke egun horretan lehia bizia izatea sailkapen nagusiko borrokan dabiltzan ziklisten artean.