Filippo Zanak Dolomitetako lehen etapa irabazi du, Pinot menderatuta, eta Thomasek ondo eutsi dio Roglici
Jayco-AlUla taldeko Filippo Zana txirrindulari italiarrak (Italiako egungo txapelduna) 2023ko Italiako Giroaren 18. etapa irabazi du ostegunean, Val di Zoldon garaile aterata, Dolomitetan jokatutako lehen jardunaldian. Zanak Groupama-FDJ taldeko Thibaut Pinot frantziarra menderatu du etapa irabazteko. Sailkapen nagusian ondoen kokatuta dauden zizklistei dagokienez, Primoz Roglic Jumbo-Vismako esloveniarrak erritmoa bizitu du taldean, azken igoeran, eta UAEko Joao Almeida portugaldarra gainditu du, sailkapen nagusiko bigarren postuan jarrita. Geraint Thomas Ineoseko galestarrak lehen postuari eutsi dio, eta maglia arrosa soinean duela jarraituko du.
Filippo Zanak betiko gordeko du Val di Zoldon erdietsitako garaipenaren argazkia: izan ere, lasterketa handi batean eskuratu duen lehen garaipena da. Gainera, Giroko etapa menditsu batean lortu du, eta, horrez gain, Italiako txapeldunaren maillota jantzita irabazi du. Jayco taldeko txirrindularia oso ondo dabil 2023ko Giroan. Orain arte, beste ihesaldi batzuetan sartu da, eta tropelaren buruan ere ibili da, taldearen alde lanean aritu denean.
Thibaut Pinot, aldiz, ez da horren pozik izango. Ihesaldiko beste txirrindulariek baino indar handiago zuela ematen zuen, bereziki igoeretan. Helmugan, baina, Zanak hobeto baliatu ditu bere aukerak. Frantziarrak iragarri duenez, denboraldi amaieran hartuko du erretiroa.
Zana eta Pinot eguneko ihesaldian izan dira, hauekin batera: Aurelien Paret-Peintre (AG2R Citroen), Marco Frigo (Israel Premier Tech), Derek Gee (Israel Premier Tech), Warren Barguil (Arkéa Samsic) eta Vadim Pronskiy (Astana Qazaqstan). Hasieran, iheslariek ezin izan dute alde handirik lortu, baina, azkenean, tropelak erabaki du ez zuela indarra erabiliko zazpikotea harrapatzeko lanetan; hala, helmugarako 50 kilometro falta zirenean, lasterketaren buruan zihoan taldeak bost minutuko aldea zuen, eta horrek argi erakusten zuen etapako irabazlea aurreko taldean zegoela.
Beste bi txirrindulari ere nabarmendu dira etapan: Sepp Kuss Jumboko estatubatuarra eta UAEko Jay Vine australiarra. Beste behin ere, argi utzi dute zein garrantzitsua den taldearentzat lan egiten duten txirrindulariak izatea. Azken kilometroetan, Jumbok, liderraren taldean erritmoa bizituz, erasoa jo duenean, Kussek errelebo bikaina egin dio Roglici, azken horrek ahalik eta segundo gehien urra zitzan Thomasekiko eta Almeidarekiko. Portugaldarrak, baina, Vineren ezinbesteko laguntza izan du, eta helmugan 21 segundo galdu ditu, azkenean; bigarren postutik hirugarrenera jaitsi da, bai, baina Giroa irabazteko aukerak ditu oraindik.
Azken tartean, lehia estua izan da: aurretik, etapa jokoan zegoela; atzetik, sailkapen nagusiko gizonak borrokan zirela. Zanak eta Roglicek jaso dituzte sari nagusiak, baina Giroa ez da amaitu, eta lehen sailkatuen arteko aldea txikia da oraindik.
Ostiraleko etapak hainbat zalantza argituko ditu. 19. etapa Longaronen hasi eta Tre Cime Di Lavaredon amaituko da, eta 183 kilometroko ibilbidea izango du. Jardunaldi oso gogorra izango da, maila handikoa. Antolatzaileek bost mendate jarri dizkiete txirrindulariei: Campolongo (2. mailakoa), Passo Valparola (1. mailakoa), Passo Giuau (1. mailakoa), Passo Tre Croci (2. mailakoa) eta Tre Cime Di Lavaredo (2023ko Giroko Coppi gaina).
18. etapako sailkapena
1 - ZANA Filippo (Jayco) 4:25:12
2 - PINOT Thibaut (Groupama) d. b.
3 - BARGUIL Warren (Arkéa) +0:50
4 - GEE Derek (Israel) +1:03
5 - PARET-PEINTRE Aurélien (AG2R) +1:24
6 - FRIGO Marco (Israel) d. b.
7 - ROGLIC Primož (Jumbo) +1:56
8 - THOMAS Geraint (INEOS) d. b.
9 - ALMEIDA João (UAE) +2:17
10 - DUNBAR Eddie (Jayco) +2:32
Sailkapen nagusia
1 - THOMAS Geraint (INEOS) 76:25:51
2 - ROGLIC Primož (Jumbo) +0:29
3 - ALMEIDA João (UAE) +0:39
4 - DUNBAR Eddie (Jayco) +3:39
5 - CARUSO Damiano (Bahrain) +3:51
6 - KÄMNA Lennard BORA - hansgrohe +4:27
7 - PINOT Thibaut (Groupama) +4:43
8 - LEKNESSUND Andreas (DSM) +4:47
9 - ARENSMAN Thymen (INEOS) +4:53
10 - DE PLUS Laurens (INEOS) +5:52
Zure interesekoa izan daiteke
2026ko gizonezkoen eta emakumezkoen Italiako Giroko ibilbideak aurkeztu dituzte
Gizonezkoen lasterketak 40,2 kilometroko erlojupeko bat eta goi-mendiko bost etapa izango ditu; emakumezkoenak, berriz, bederatzi etapa izanen ditu, aurreko bi ekitaldietan baino bat gehiago.
2026ko Italiako Giroa Bulgariatik irtengo da
Miroslav Borshosh Bulgariako Turismo ministroak agerraldi ofizial batean iragarri duenez, 2026ko Giroko lehen hiru etapak Bulgarian izango dira.
Elisa Longo Borghini italiarrak irabazi du Giroa, eta Liane Lippertek azken etapa
Italiarrak 4. egin du azken etapan, Marlen Reusser 3.aren eta Anna van der Breggen 2.aren atzetik. Lipperten denbora beran helmugaratu da Van der Breggen, eta 8 segundora sartu dira gainerakoak.
Sarah Gigante australiarrak irabazi du Giroko 7. etapa, eta Elisa Longo jarri da lider
4:44:14ko denborarekin helmugaratu da Gigante, Longo Borghini heldu da ondoren, 45 segundora, eta Isabella Holmgren kanadarra izan da hirugarren, 1:14ra.
Lippert nagusitu da Giroko seigarren etapan, eta Reusserrek maglia arrosari eutsi dio
Lippertek hamaikagarren garaipena lortu du profesional mailan, Fenix-Deceuninck taldeko Pauliena Rooijakkers (2 segundora) eta Lidl-Trekeko Shirin van Anrooij (46 segundora) gaindituta.
Lorena Wiebesek eskuratu du Monseliceko esprinta, eta Reusserrek maglia arrosari eutsi dio, Italiako Giroan
SD Worx-Protime taldeko esprinter herbeheretarrak, hala, hamabost garaipen daramatza 2025eko denboraldian; horietako bi, Giroan. Anna van der Breggen taldekidea, gainera, sailkapen nagusiko hirugarren postura igo da.
Lorena Wiebesek irabazi du Trenton, esprintean, eta Anna Hendersonek lider jarraitzen du, Italiako Giroan
SD Worx-Protime taldeko txirrindulari herbeheretarrak bereganatu du lasterketako hirugarren etapa, eta Lidl-Trek taldeko ziklista britainiarrak sailkapen nagusiko lehen postuan segitzen du. Usoa Ostolaza mendiko sailkapeneko lider jarri da.
Anne Hendersonek irabazi du Aprican, eta maglia arrosa jantzi du, Italiako Giroan
Lidl-Trekek taldeko txirrindulari britainiarrak Dilyxine Miermont CERATIZITeko ziklista frantziarra menderatu du, eta garaipena eskuratu; gainera, sailkapen nagusiko aurreneko postuan jarri da, Movistar taldeko Marlen Reusser igandeko irabazlearen ordez.
Marlen Reusserrek indarrean hasi du Italiako Giroa
Movistar taldeko suitzarra gailendu da Giroari hasiera eman dion erlojupekoan, eta liderraren maillota jantzi du. Lotte Kopecky belgikarra eta Elisa Longo izan dira bigarren eta hirugarren, hurrenez hurren.
Ostolaza, Santesteban eta Amondarain, Laboral Kutxa-Euskadi Fundazioak Italiako Giroan izango duen taldean
Alice Arzuffi, Arianna Fidanza eta Laura Tomasi italiarrek eta Yuliia Biriukova ukrainarrak osatuko dute euskal taldeak lasterketara eramango duen zazpikotea; proba igandean hasiko da, uztailaren 6an.