Eibarren atzerapausoa Burgosen (1-0)

Eibarrek 1-0 galdu du gaur Burgosen aurka El Plantio estadioan jokatu duen partida, eta, ondorioz, EA Sports Ligara igotzeko lehian sartzeko aukera galdu du. Armaginek irudi kaxkarra eman dute, eta ez dute ahalmenik izan bi hilabete garaipenik lortu gabe zeramatzan Burgos menderatzeko.

Eibarrek ez du joko ona egin lehen zatian. Burgosena izan da baloiaren jabetza, eta haren mendean aritu da Joseba Etxeberriaren taldea.

Armaginek bi jaurtiketa baino ez dituzte egin atera; etxeko taldeak, berriz, lau gol aukera garbi izan ditu. Horietako bat atsedenaldia heldu baino lehen izan da, baina Magunagoitiak geldiketa bikaina egin du, 1-0ekoa ekiditeko.  

Aldageletatik bueltan, ez da aldaketa nabarmenik izan, 67. minutura arte. Une horretan sartu du gola Burgosek, Eibarrek defentsan huts larria egin ondoren. Chemak pase txarra eman dio Magunagoitiari, baloia Alex Sancrisek berreskuratu du, eta honen asistentzia Currok aprobetxatu du bere taldea markagailuan aurretik jartzeko.

Lehena sartuta, bigarrenaren bila joan dira etxekoak, baina Magunagoitiak aukera guztiak zapaztu ditu; bera izan da Eibar taldeko onena. Joseba Etxeberriaren mutilek aurrera egin dute eta berdinketa lortzen saiatu dira, baina alferrik izan da. Nahi eta ezin. 

Azken minutuetan, tentsio handia izan da, epaileak partidaren amaiera adierazi duen arte, 94. minutuan. Eibarrek gora egiteko aukera ona galdu du; Burgosek, berriz, jaitsiera postuetatik ateratzea lortu du, behin-behinean bada ere, bi hilabeteren ondoren merezitako garaipena bereganatuta.

FITXA TEKNIKOA:

1- Burgos CF: Cantero; Pipa, Aitor Cordoba, Lisandro Lopez (David Lopez, 46. min), Florian Miguel; Atienza, Morante (Marcelo, 72. min); Alex Sancris, Curro Sanchez (Mario Cantero, 82. min), Dani Ojeda (Borja Sanchez, 64. min); eta Edu Espiau (Fer Niño, 64. min).

0- SD Eibar: Magunagoitia; Cubero, Arambarri, Chema Rodriguez, Arrillaga (Cristian, 78. min); Sergio Alvarez (Ander Madariaga, 78. min), Nolaskoain; Guruzeta (Slavy, 85. min), Jorge Pascual, Puertas; eta Jon Bautista (Alkain, 64. min).

Epailea: Gonzalez Diaz. Txartel horia atera die Morante eta Dani Ojeda Burgos taldeko jokalariei, eta Sergio Alvarez, Jorge Pascual eta Alkain Eibar taldeko jokalariei eta Joseba Etxeberria entrenatzaileari.

Golak: 1-0, 67. min: Curro.