Axel Laurance bretainiarrak Igor Arrieta nafarra gainditu du azken metroetan eta etapa irabazi du Basaurin

Axel Laurance (Ineos Grenadiers) bretainiarrak irabazi du gaur Basaurin hasi eta bukatu den Basque Country Itzuliaren hirugarren etapa. Laurancek Igor Arrieta (UAE) nafarra gainditu du esprintean, azken metroetan. Paul Seixas (Decathlon) frantziarrak lider jarraitzen du ia ezustekorik gabeko jardunaldi baten ondoren. Izar gazteak bizikleta aldatu behar izan du etapan zehar.

16 txirrindularik ihesaldia osatu dute, horien artean, Igor Arrieta nafarra eta Mikel Bizkarra eta Jonathan Lastra bizkaitarrak (Euskaltel-Euskadi). Jardunaldiko azken mendatearen jaitsieran, hirugarren mailako Sarasolan, Arrietak eta Laurancek gainerako iheskideak atzean uzti dituzte, Bikosganen eta eguneko azken zailtasun honetan gora izandako zenbait erasoren ondoren.

Txirrindulari frantziarrek jarraian lortutako hirugarren garaipena da. Laurancek 3h: 38:32ko denbora egin du helmugan, batez beste 41.9 kilometro orduko abiaduran. Hirugarren postua Natnael Tefatsion (Movistar) eritrearrarentzat izan da.

Tropela, Seixas liderrarekin, 1:02ra helmugaratu da. Sailkapen nagusian bigarren Roglic da 1:59ra, eta hirugarren Florian Lipowitz 2:08ra. Juan Ayusok (Lidl-Trek), ordea, beste egun txar bat izan du eta denbora asko galdu du berriro, etapa irabazlearengandik 13 minutura helmugaratu baita.

Arrietak Basauriko helmugan Laurancek gainditu izana deitoratu du, bere lehen garaipena eragotziz. "Pena izan da, argi zegoen Laurance faboritoa zela. Aldaparen hasieran ezustean harrapatzen saiatu naiz, baina ondo eutsi dit eta helmugatik gertu gainditu nau", azaldu du Uharte Arakileko txirrindulariak.       

Isaac del Toro (UAE) erretiratu egin da, helmugatik 81 kilometrora erorikoa izan ostean. Del Toro beste bost txirrindularirekin batera erori da, eta, lurretik altxatu ostean, Josean Fernandez Matxin taldeko zuzendariak errepidean bertan ikusi du,  txirridnulari mexikarrak eskuineko saihetsa kaltetuta zuela.

Bestalde, Mikel Landa arabarrak (Soudal Quick Step) ez du hirugarren etapa honetako irteera hartu, atzo Aralarko San Migel jaitsieran, Mendukilloko helmugatik 9,5 kilometrora, izan zuen erorikoaren ondorioz.

Landak hausturarik ez duen arren, Murgiako txirrindulariari atzo egin zizkioten azterketak kontuan hartuta, taldeak jakinarazi du erretiratzea zela erabakirik onena.

Ineos taldeko txirrindulari bretoia pozik agertu da denboraldi honetako laugarren garaipenarekin. "Oso zaila izan da, ihesaldi luze batetik gentozen, esfortzu handiarekin. Azkenean Arrietak ez du lagundu nahi izan, eta zalantzak izan ditut. Abiatu denean karranpak izan ditut, baina Igor behera etorri da, helmugatik 100 metrora itxaron dut, gainditzeko", azaldu du Laurancek helmugan.

24 urteko Calaneko txirrindulariak bi garaipen lortu ditu Coppi eta Bartali Astean eta beste bat Proventzako Tourrean. "Iaz, martxotik irailera, World Tourreko lasterketak bakarrik egin nituen, eta horietan irabaztea zaila da. Aurten estrategia aldatu dugu eta ondo datozkidan lasterketak korritzen ari naiz. Ondo aukeratu dugula ikus daiteke. Itzuliko garaipen hau oso garrantzitsua da. Oso pozik nago", erantsi du.

Ostegun honetan, laugarren etapak 167,2 kilometroko ibilbidea izango du, eta Galdakaon hasi eta bukatuko da.