Pascal Ackermannek esprint ikusgarria irabazi du Tortonan, Geoghegan Hartek Giroa utzi behar izan duen egunean
UAE Team Emirates taldeko Pascal Ackermann txirrindulari alemaniarrak 2023ko Italiako Giroaren hamaikagarren etapa irabazi du asteazkenean; izan ere, azkarrena izan da Tortonako helmugan izandako esprint ikusgarrian. Garailea eta haren atzean sailkatu diren gainerako esprinterrak, hain zuzen Jonathan Milan, Mark Cavendish eta Mads Pedersen, oso parean igaro dira helmugako pankartapetik. Bestalde, Geraint Thomasek (Ineos) maglia arrosa soinean duela jarraituko du; hori bai, sailkapen nagusirako lehian zegoen gizon batek, Tao Geoghegan Hart Thomasen taldekideak, lasterketa utzi behar izan du, erorikoa izan duelako. Hori bera gertatu zaio Movistar taldeko Oscar Rodriguez burlatarrari: nafarrak, helmugarako 63 kilometro geratzen zirela, erorikoa izan, eta Giroa utzi du, halabeharrez.
Oraingoz, 2023ko Giroan bost etapatan erabaki da irabazlea esprintean, eta beste horrenbeste garaile izan dira horietan. Ackermannek, bosgarren garailea bera, Milanen, Matthewsen, Grovesen eta Pedersenen lekukoa hartu eta denboraldiko lehen garaipena lortu du; alemaniarrak 29 urte ditu, eta Giroan eta Espainiako Vueltan izan da etapa garailea (hurrenez hurren, hiru ditu Italian, azken hau barne, eta bi Vueltan, 2020an biak). Argi dago esprintetan ere badagoela ikuskizuna aurtengo Giroan, eta, ziurrenik, espezialistek aukera gehiago izango dituzte, lasterketa amaitu aurretik.
Etapan, bi protagonista izan dira, bata ona eta bestea ez horrenbeste. Onena sei txirrindularik egin dute; Thomas Champion (Cofidis), Diego Pablo Sevilla (Eolo), Filippo Magli (Green Project), Laurenz Rex (Intermarche), Alexander Konychev (Corratec) eta Veljko Stojnic (Corratec) ia hasieratik joan dira aurretik, ihesaldian. 219 kilometro zituen etapak, aurtengo Giroko edozein etapak baino gehiago, baina aurrera egin dute sei gizon horiek; gehienez, lau minutu eta 22 segundoko aldea izan dute, eta tropelak helmugarako bost kilometro geratzen zirela harrapatu du ihesean ibilitako azken ziklista, hain zuzen Rex belgikarra.
Okerrena, beste behin, erorikoak izan dira. Batzuk, gainera, larriak izan dira. Egia esan, Giroa ezbeharrez beteta ari da izaten: alde batetik, Italiako udaberria parte-hartzaileei ematen ari zaien eguraldi makurragatik; bestetik, covid-19agatik. Hamaikagarren etapa honetan, Tao Geoghegan Hart anbulantziaz eraman behar izan dute; britainiarrak, sailkapen nagusiko hirugarrena bera, lurrera joan da 65 bat kilometro geratzen zirela. Eroriko horretan, halaber, Geraint Thomas liderrak eta Primoz Roglic bigarren sailkatuak arazoak izan dituzte, baina, azkenean, jarraitu ahal izan dute; Oscar Rodriguez nafarrak, aldiz, ezin izan du, pixka bat aurrerago izandako istripuaren ondorioz. Jonathan Lastra da orain, hortaz, Giroan dabilen euskal txirrindulari bakarra.
Amaiera, baina behin eta berriz ikusteko modukoa izan da, biziki estua izan baita. Ackermannek ospatu du garaipena, ziur aski esprinterrek irabazlea nor izan den jakiteko duten senari esker, baina Milanek ere egiten zituen poztasun keinuak helmuga zeharkatuta. Azkenean, fotofinishak argitu behar izan du nor zen podiumera igotzekoa.
Eta, ostegunean, hamabigarren etapa. Bran hasiko da lasterketa, eta Rivolin amaitu; ibilbideak 179 kilometro ditu, eta zenbait igoera eta jaitsiera daude. Gainera, biharamunean egun handia dute txirrindulariek, Crans Montanako etapa menditsua.
11. ETAPA
Etapako sailkapena
1 - ACKERMANN Pascal (UAE) 5:09:02
2 - MILAN Jonathan (Bahrain) d. b.
3 - CAVENDISH Mark (Astana) d. b.
4 - PEDERSEN Mads (Trek) d. b.
5 - OLDANI Stefano (Alpecin) d. b.
6 - ALBANESE Vincenzo (EOLO) d. b.
7 - MAYRHOFER Marius (DSM) d. b.
8 - BALLERINI Davide (Soudal) d. b.
9 - CONSONNI Simone (Cofidis) d. b.
10 - MARIT Arne (Intermarche) d. b.
Sailkapen nagusia
1 - THOMAS Geraint (INEOS) 39:26:33
2 - ROGLIC Primož (Jumbo) + 0:02
3 - ALMEIDA João (UAE) + 0:22
4 - LEKNESSUND Andreas (DSM) + 0:35
5 - CARUSO Damiano (Bahrain) + 1:28
6 - KÄMNA Lennard (BORA) + 1:52
7 - DUMBAR Eddie (Jayco) + 2:32
8 - ARENSMAN Thymen (INEOS) d. b.
9 - DE PLUS Laurence (INEOS) +2:36
10 - PARET-PEINTRE Aurelien (AG2R) + 2:48
Zure interesekoa izan daiteke
2026ko gizonezkoen eta emakumezkoen Italiako Giroko ibilbideak aurkeztu dituzte
Gizonezkoen lasterketak 40,2 kilometroko erlojupeko bat eta goi-mendiko bost etapa izango ditu; emakumezkoenak, berriz, bederatzi etapa izanen ditu, aurreko bi ekitaldietan baino bat gehiago.
2026ko Italiako Giroa Bulgariatik irtengo da
Miroslav Borshosh Bulgariako Turismo ministroak agerraldi ofizial batean iragarri duenez, 2026ko Giroko lehen hiru etapak Bulgarian izango dira.
Elisa Longo Borghini italiarrak irabazi du Giroa, eta Liane Lippertek azken etapa
Italiarrak 4. egin du azken etapan, Marlen Reusser 3.aren eta Anna van der Breggen 2.aren atzetik. Lipperten denbora beran helmugaratu da Van der Breggen, eta 8 segundora sartu dira gainerakoak.
Sarah Gigante australiarrak irabazi du Giroko 7. etapa, eta Elisa Longo jarri da lider
4:44:14ko denborarekin helmugaratu da Gigante, Longo Borghini heldu da ondoren, 45 segundora, eta Isabella Holmgren kanadarra izan da hirugarren, 1:14ra.
Lippert nagusitu da Giroko seigarren etapan, eta Reusserrek maglia arrosari eutsi dio
Lippertek hamaikagarren garaipena lortu du profesional mailan, Fenix-Deceuninck taldeko Pauliena Rooijakkers (2 segundora) eta Lidl-Trekeko Shirin van Anrooij (46 segundora) gaindituta.
Lorena Wiebesek eskuratu du Monseliceko esprinta, eta Reusserrek maglia arrosari eutsi dio, Italiako Giroan
SD Worx-Protime taldeko esprinter herbeheretarrak, hala, hamabost garaipen daramatza 2025eko denboraldian; horietako bi, Giroan. Anna van der Breggen taldekidea, gainera, sailkapen nagusiko hirugarren postura igo da.
Lorena Wiebesek irabazi du Trenton, esprintean, eta Anna Hendersonek lider jarraitzen du, Italiako Giroan
SD Worx-Protime taldeko txirrindulari herbeheretarrak bereganatu du lasterketako hirugarren etapa, eta Lidl-Trek taldeko ziklista britainiarrak sailkapen nagusiko lehen postuan segitzen du. Usoa Ostolaza mendiko sailkapeneko lider jarri da.
Anne Hendersonek irabazi du Aprican, eta maglia arrosa jantzi du, Italiako Giroan
Lidl-Trekek taldeko txirrindulari britainiarrak Dilyxine Miermont CERATIZITeko ziklista frantziarra menderatu du, eta garaipena eskuratu; gainera, sailkapen nagusiko aurreneko postuan jarri da, Movistar taldeko Marlen Reusser igandeko irabazlearen ordez.
Marlen Reusserrek indarrean hasi du Italiako Giroa
Movistar taldeko suitzarra gailendu da Giroari hasiera eman dion erlojupekoan, eta liderraren maillota jantzi du. Lotte Kopecky belgikarra eta Elisa Longo izan dira bigarren eta hirugarren, hurrenez hurren.
Ostolaza, Santesteban eta Amondarain, Laboral Kutxa-Euskadi Fundazioak Italiako Giroan izango duen taldean
Alice Arzuffi, Arianna Fidanza eta Laura Tomasi italiarrek eta Yuliia Biriukova ukrainarrak osatuko dute euskal taldeak lasterketara eramango duen zazpikotea; proba igandean hasiko da, uztailaren 6an.