Surne Bilbaok finalerako sailkapena bideratu du, Hungarian Szombathely 81-98 mendean hartuta

Surne Bilbao Basketek 81-98 irabazi dio Falco Vulcano Szombathelyri Hungarian jokatu den FIBA Europe Cupeko finalerdietako joaneko partida. Horrela, Jaume Ponsarnauk zuzentzen duen taldeak hanka bat jarri du finalean, datorren astean Miribillan jokatuko den neurketan hondamendirik gertatu ezean.

Horrela, Jaume Ponsarnauk 100. garaipena lortu du Surne Bilbao taldeko entrenatzaile gisa, eta Txus Vidorretak 214 partidatan lortutako kopurua gainditu du. Aurretik, Fotis Katsikaris 'beltzezko gizonen' entrenatzaile bezala garaipen gehien lortu dituena baino ez du prestatzaile kataluniarrak. Greziarrak, guztira 105 garaipen lortu zituen 183 neurketan.

Lehen laurdena ikusita, Surne Bilbaok markagailuan goitik bukatzea miraritzat jo daiteke. Hungariako taldeak finalerdietan zergatik dagoen ederki erakutsi du, eta markagailuan 8 puntuko abantaila izatera heldu da. Hala eta guztiz ere, Ponsarnauren mutilek hortzak estutu eta balantza orekatzea lortu dute lehen atsedenaldira alde txiki batekin joateko (28-29).

Beltzezko gizonen bigarren laurdenaren hasiera partidakoa baino hobea izan da, eta norgehiagoka nabarmen aldatu da. Defentsa askoz ere zorrotzagoarekin, bilbotarrek aurrerapausoa eman dute bigarren laurdenean. Gainera, Surnek maiz zulatu du aurkariaren uztaia hiruko marratik (12/17 lehen zatian), eta atsedenaldia baino lehen abantaila areagotu du (44-56).

Aldageletatik bueltan, Ponsarnauren gizonek gehiegizko arazorik gabe kontrolatu dute partida, eta hirugarren laurdenaren erdian markagailuan alderik handiena jarri dute (+22). Ondorioz, Szombathelyko entrenatzaileak premiazko hutsartea eskatu behar izan du. Hala ere, norgehiagokaren dinamika ez da aldatu eta beltzezko gizonek hungariarren erreakzio saiakera ezer-ezean utzi dute (60-78).

Neurketako azken laurdenean , Surne Bilbaoren hasiera ez da batere ona izan, erasoan zein defentsan intentsitate falta izan du talde bilbotarrak, eta erabakiak hartzen ez du asmatu. Amaierarako sei minutu falta zirenean, Ponsarnauk hutsartea eskatu behar izan du hungariarrak tartea murrizten ari zirelako (+10). Pantzar eta Hilliard kantxan elkarrekin zirela talde bizkaitarrak kontrol handiagoa izan du kantxan, eta beltzezko gizonek norgehiagoka ixten eta finalerako ia behin betiko urratsa ematen jakin dute (81-98).