Dario Gomezek irabazi du 2026ko Buruz Burukoa
Igandean Nafarroa Arenan jokatu duten finalean, Ezcaraykoak 6-22 menderatu du Alegiakoa. Hala, Dariok lehen aldiz jantzi du txapela Buruz Burukoan, eta profesionaletan estreinakoz gailendu da txapelketa handi batean.
Dario, txapela jantzita. Argazkia: EFE.
Dario Gomezek 2026ko Buruz Buruko Txapelketa irabazi du, igandean, Nafarroa Arenan, Iruñean. Aspeko pilotariak 6-22 menderatu Iñaki Artola finalean, eta, ondorioz, berak jantzi du txapela. 30 urteko pilotari errioxarrak lehen aldiz eskuratu du garaipena Buruz Burukoan, eta profesionaletan estreinakoz gailendu da txapelketa handi batean. Halaber, Buruz Buruko Txapelketa irabazi duen lehen pilotari errioxarra da, 1953an, duela 73 urte, Barberito I.ak lortu zuenetik.
Dariok egin du lehen sakea, eta lehen tantoa ere berak lortu du (0-1). Hurrengo laurak ere egin ditu Aspeko aurrelariak, eta 0-3koa, 0-4koa eta 0-5ekoa horma-biko ederrak eginda erdietsi ditu. Dario Artola baino hobeto sartu da finalean, eta alegiarrak 1-5ekoan egin du bere lehen tantoa, Dariori kanpora joan zaion pilotakada batean.
Pilotari errioxarrak segituan berreskuratu du sakea. Finaleko 9. tantoa gogorra izan da, eta Artolak egin du; gipuzkoarra 2-7 ari zen galtzen ordurako. Dariok gusturago zirudien kantxan, Aspekoak Baikokoak baino konfiantza handiagoa zuela ematen zuen, eta Nafarroa Arenako markagailuan ikusgai zen 2-10ekoak argi utzi du bide onetik zihoala.
Darioren 3. hutsak berriro eman dio sakea Artolari; alegiarrak jarraian egindako hainbat tanto egin behar zituen, Dario nolabait estutzeko. Pilotari errioxarrak nagusitzen jarraitu du, 12.a bereganatzeko; 4-12koa sakez egin du, ustekabean pilota zabalean jarrita.
Artolak ezin izan ditu tanto batzuk segidan egin markagailua estutzeko, eta Dario gero eta indartsuago aritu da: Ezcaraykoak horma-biko bikaina eginez lortu du 5-14koa.
6-16koan, Artolak sakea zuela, bi protagonistak botileroekin bildu dira. Dariok eskuratu du hurrengo tantoa, 6-17koa. Pilotakada oso ona emanda, errioxarrak 18. tantoa lortu du, eta txapela gertu-gertu zuen azken etenaldian.
Errioxako zaleak pozarren zeuden, Nafarroa Arenan, Dariok txapela janztear zuelako. Aspeko aurrelariak aukera baliatu du, eta, azkenean, 6-22 gailendu da, oso merezita gainera.
Finala, tantoz tanto:
0-1, 0-2, 0-3, 0-4, 0-5, 1-5, 1-6, 1-7, 2-7, 2-8, 2-9, 2-10, 3-10, 4-10, 4-11, 4-12, 5-12, 5-13, 5-14, 5-15, 5-16, 6-16, 6-17, 6-18, 6-19, 6-20, 6-21 eta 6-22.
Zure interesekoa izan daiteke
Dario Gomezek arantzaz beteriko ibilbidea izan du txapelaren loria lortu arte
Dario Gomez: “Gorriz jantzita pasako dut urte osoa, ametsik onenetan ere ez nuen halakorik aurreikusten”
2026ko Buruz Buruko Txapelketako sailkapenak, emaitzak eta egutegia
Ezkaraitarrek ongietorri beroa egin diote Dario Gomez txapeldunari
6-21ekoa, finaleko tantorik onena: Dariok pilotakada bikaina emanda amaitu du
Botileroen finala: “Oparirik ez egiteko momentua da!"
Miguel Capellan, Darioren entrenatzailea Ezcarayn: “Badakizu zer egin duen Dariok? Sinestezina da!”
Balba Gil, Darioren ama: “Niretzat, nire semea nire txapelduna da”
Dario Gomez: “Hurrengo pilotakadan baino ez nuen pentsatu nahi”
