Ahazteko partida izan du Realak Betisen aurka, hiru gol eta bi txartel gorri jasota (3-0)

Realak 3-0 galdu du Betisen aurka igande honetan Benito Villamarinen jokatu den EA Sports Ligako 24. jardunaldiko partidan. Oso lehia zaila izan da txuri-urdinentzat, bi jokalari gutxiagorekin geratu baitira, Zubeldiak eta Beckerrek txartel gorri zuzenak jaso ondoren.

Partida nahiko berdinduta hasi da, txuri-urdinen zelaian baloiaren presentzia handixeagoarekin, baina bi taldeetako batek ere ez du benetako arriskurik sortu. Hori 20. minutuan aldatu da, Jesus Rodriguezek bakarrik ihes egin duenean, Zubeldia defentsa bakarra zuelarik aurrean. Aurrelaria gelditzeko ahalegin horretan lurrera bota du eta epaileak txartel gorria atera dio zuzenean azken jokalaria izateagatik.

Jokalari bat gutxiagorekin, Imanolek partida birplanteatu behar izan du eta Brais kendu du Elustondo sartzeko. Baina kalbarioa ez da hor amaitu; izan ere, ordu erdira, Aihenek Antony lurrera bota du area barruan eta epaileak penaltia adierazi du. Lo Celsok ondo jaurti du hamaika metroetatik, baina Remirok nora bota behar zuen igarri du eta penaltia gelditu du bere taldea salbatzeko.

Horrez gain, ez da aukera askoko lehen zatia izan, eta zutoinak arduratu dira markagailua inork ez irekitzeaz. Jesus Rodriguez eta Suciç urruneko jaurtiketekin saiatu dira, baina lehenengo kasuan zutoina eta bigarrenean langa tartean jarri dira.

Bigarren zatia hasi eta gutxira, Realekoak gaizki defendatutako falta batean, Antonyk aldaratzea harrapatu du eta boleaz baloia sarera bidali du (1-0).

Egoerak okertu baino ez zaio egin Realari, bat gutxiago egotea nabaritu baitu eta bere defentsan hutsuneak utzi dituelako. Rocak aprobetxatu egin du egoera hori, Jesus Rodriguezen jokaldi on baten errebotea harrapatuz eta, jada defentsarik gabe, ate barrura baloia bota du (2-0).

Handik bost minutura, Rocak berak sartu du bigarrena zutoin motzetik, ezkerkada indartsu batekin, eta Remirok ezin izan du ezer egin (3-0).

Gainera, 75. minutuan Beckerrek sarrera gogorra egin dio Ortizi. Hasiera batean epaileak txartel horia atera dio, baina, VARean berrikusi ondoren, txartel gorria atera dio, eta Reala bi gutxiagorekin utzi du.

Azken minutuak infernua izan dira Realarentzat, eta ezertarako aukerarik gabe, ahazteko moduko porrota jaso du.

Fitxa teknikoa:

3 - Betis: Adrin; Angel Ortiz (Aitor Ruibal, 75. min), Bartra, Llorente, Ricardo Rodriguez; Johnny Cardoso, Lo Celso (Marc Roca, 46. min); Antony, Isco (Vitor Roque, 82. min), Jesus Rodriguez (Chimy Avila, 73. min); Cucho Hernandez (Bakambu, 73. min).

0 - Reala: Remiro; Aramburu (Jon Martín, 59. min), Zubeldia, Aguerd, Aihen (Javi Lopez, 46. min); Sergio Gomez, Zubimendi, Brais Mendez (Elustondo, 25. min), Sucic (Zakharyan, 76. min); Becker, Oyarzabal (Pablo Marín, 59. min).

Golak: 1-0, 51. min: Antony. 2-0, 64. min: Marc Roca. 3-0, 69. min: Marc Roca.

Epailea: Jesus Gil Manzano. Zubeldia eta Becker kanporatu ditu, txartel gorriekin. Gainera, txartel horia atera die Aramburu eta Aihen jokalariei.