Realak 1-3 irabazi dio Almeriari, eta Europara begira jarraitzen du

Realak 1-3ko emaitzarekin irabazi dio Almeriari Power Horse Stadiumean, larunbat arratsaldean, 2023-24 denboraldiko EA Sports Ligako hamahirugarren jardunaldian. Golegileak Oyarzabal, Carlos Fernandez (91. minutuan penaltiz) eta Martin Zubimendi (95.ean) izan dira.

Realaren nagusitasuna jokoaren lehen minutuetatik nabaritu da zelaian, eta partidaren hasiera talde bakoitzaren aldartearen isla izan da.

Hirugarren minutuan, Oyarzabalek izan du lehen gol aukera. Aihen Muñozen hegaleko sake indartsu baten ostean, kapitain txuri-urdinak baloia jaso eta jaurti egin du, baina jaurtiketa gora joan zaio. Minutu batzuk geroago, Mendesek Realaren gola saihestu du, Sadiqek (partida hasierako protagonista) indar handiz egindako jaurtiketa geldituta. Realeko aurrelariak berak zutoinera errematatu du lehen zatiko aukerarik onena.

Imanolen mutilak etengabe iritsi dira aurkariaren areara. Hala ere, minutuek aurrera egin ahala, inork ez zuen aurkariaren atea zulatzea lortzen, baina bisitariek erosoago jokatu dute Barrenetxea eta Oyarzabalekin, barruko posizioetara sartu eta nagusitasunak sortuz.

Azkenean, lehen zatia husna amaitu da Power Horse Stadiumean. Talde txuri-urdina jaun eta jabe izan da, baina ezin izan du golik sartu.

Bigarren zatia talde bisitariaren presioarekin hasi da. 57. minutuan, Turrientesek Maximiano gainditu eta gola egin du, baina epaileak baliorik gabe utzi du, jokalari txuri-urdinak baloia eskuarekin ukitu baitu. Minutu batzuk geroago, Realeko kapitainak lehen gola egin du txuri-urdinentzat. Oyarzabalek bere bolada ona berretsi du, bigarren zutoinera iritsi eta Almeriaren atea zulatuta.

Partida Realaren alde zegoela zirudienean, 75. minutuan, Arribasek berdinketaren gola sartu du etxekoentzat. Remirok baloiaren irteeran egindako akats baten ondoren, Kubok ez du kontrolatu Meleroren presioaren aurrean, baloia Lazarori iritsi zaio, jo egin du, eta atezainak urrundu, baina Arribasen oina jo ostean, Almeriako jokalariak sare barrura bidali du baloia.

Luzapeneko denboran, epaileak Realaren aldeko penaltia adierazi du, Akiemek area barruan eskuarekin ukitu duelako. Carlos Fernandez txuri-urdinak ez du barkatu, eta bisitarien bigarren gola sartu du.

3 minutu geroago, Zubimendik markagailua erabakita utzi du. Erdilariak sare barrura bidali du baloia bigarren zutoinean, Melerok ondo defendatu ez duen baloi bat ezin hobeto baliatuta.

Ligan bi jardunaldi irabazi gabe eman ondoren, Realak garaipena lortu du berriro, eta Europara begira jarraitzen du.

Fitxa teknikoa

1 - Almeria: Maximiano; Mendes, Édgar, Chumi, Akieme; Ramazani, Robertone (Melero, 71. min), Lopy (Marciano, 92. min), Embarba (Lázaro, 71. min); Arribas (Baba,  87. min) eta Baptistao.

3 - Reala: Remiro; Traore, Elustondo, Le Norman, Aihen; Zakharyan (Cho,  73. min), Turrientes (Olasagasti, 80. min), Zubimendi, Barrenetxea (Merino, 46. min); Oyarzabal (Carlos Fernández,  65. min), Sadiq (Kubo, 46. min).

Golak: 0-1, 62. min: Oyarzabal. 1-1, 76. min: Arribas. 1-2, 91. min: Carlos Fernandez, penaltiz. 1-3, 95. min: Zubimendi.

Epailea: Díaz de Mera Escuderos.