Raul Garciak azken minutuetan sartutako gol bikainak garaipena eman dio Osasunari Real Madrilen aurka (2-1)

Osasunak urrezko hiru puntu lortu ditu Sadarren Real Madril mendean hartuta, EA Sports Ligako 25. Jardunaldiko partidan. 

Gorritxoek lehen zati ona egin dute eta nagusi izan dira Sadarreko berdegunean.

Partidako lehen aukera argia Ante Budimirrek izan du 28. minutuan, baina bere jaurtiketak zutoinean jo du.

Aurrelari kroaziarra protagonista izan da, eta erabakigarria, 36. minutuan, epaileak Osasunako aurrelariari egindako penaltia adierazi baitu, VARean jokaldia aztertu ostean.

Hasiera batean, txartel horia atera dio Budimirri, bere burua bota duela uste izan duelako, baina jokaldia berrikusi ondoren, atzera egin du eta penaltia adierazi du. Horrekin batera, Budimirri txartel horia kendu dio eta Courtoiseri atera dio, area barruan egindako faltagatik.

Budimirrek berak jaurti du zigorra eta baloia ate barrura bidali du, talde nafarra aurretik jarriz (1-0).  

Atsedenaldiaren atarian, Tchouameni berdinketa sartzear izan da, baina Sergio Herreraren eskuak gola eragotzi du.

Bigarren zatiaren, hasieran Arda Guler saiatu da, baina jaurtiketa gora joan zaio oso gutxigatk.

Mbappek ez du hutsik egin 70. minutuan, baina gola jokoz kanpoko posizioan sartu du eta epaileak baliorik gabe utzi du aurrelari frantziarraren jokaldia.

Banakoa hiru minutu geroago iritsi da, Viniciusek egindako golari esker. 

Eta 91. minutuan Raul Garciak gol bikaina sartu dugorritxoei garaipena emateko. Hasiera batean, epaileak baliorik gabe utzi du ustezko jokoz kanpokoagatik, baina VARean begiratuta, gola ontzat eman du azkenean.

Bukaeran, 2-1; Osasunak garaipen ederra lortu du Real Madrilen aurka.