Bilbao Basketek hurrengo faserako txartela eskuratu du Errumanian (68-73)
Surne Bilbao Basketek 68 eta 73 irabazi dio BC CSU Sibiu talde errumaniarrari FIBA Europa Kopako bosgarren jardunaldian, Adam Smith eta Melwin Pantzarren jardunean oinarrituta. Garaipen horri esker, bilbotarrek ziurtatu egin dute txapelketako lehen fasea B multzoko lider gisa bukatuko dutela; izan ere, toki horren lehian bere aurkari zuzena zen Caledonia Gladiatorseko eskoziarrek galdu egin dute Polonian, Anwill Wloclawek taldearen kantxan (93-72). Ondorioz, beltzezko gizonek bi garaipeneko aldea ateratzen diote Glasgowko taldeari, jardunaldi bat falta denean.
Dena den, Jaume Ponsarnauk entrenatzen dituen mutilek ez dute lan erraza ordurako aukerarik gabe zegoen aurkariaren aurrean. Errumaniarrek ez dute neurketarik irabazi orain arte, eta lan duina eginez amaitu nahi izan dute euren ikusleen aurrean.
Ia ahazteko modukoa izan den norgehiagoka batean, Smith (25 puntu) izan da une garrantzitsuetan bilbotarren alde erabaki duena. Pantzar izan du bidelagun (16 puntu), baita Tryggvi Hlinason ere (8, 7 errebote, 4 asistentzia, 2 tapoi eta 20ko balorazioa).
Bilbao Basketen hasiera ona izan da (0-5), Rabasedaren saskiratze batekin eta Pantzarren hiruko batekin, eta bazirudien partida samur joango zela, baina ez da halakorik gertatu. Sibiuk erreakzionatu egin du Barroren eta Utaren arteko barneko jokoari esker, eta 9-0eko partziala lortu du, aurretik jartzeko (9-7). Hala, lehen laurdena markagailuan agintzen amaitu dute etxekoek (18-14).
Bigarren laurdenean zazpi puntu goitik jarri dira errumaniarrak (28-21), baina Ponsarnauk bere taldea bizkor zedila lortu du. Hain zuzen ere, Hlinasonen ekarpenak bultzaturik, 0-8ko partziala eskuratu du Bilbao Basketek (28-29), eta berriro jarri da aurretik. Gerora, parekotasuna izan da nagusi atsedenaldira heldu bitartean, eta Sibiu izan da puntu bateko abantailarekin joan dena aldageletara, denbora bukatzear zegoela Gavriloaiak sartutako hirukoari esker (39-38).
Aldageletatik bueltan, indarren orekak bere horretan jarraitu du, nahiz eta Pantzar eta Smith ahalegindu diren euren taldeak ihes egin zezan (bi aldiz eskuratu dute bilbotarrek sei puntuko aldea: 53-59 eta 55-91). Alabaina, etxekoak beste hiruko bat sartzeko gai izan dira laurden bukaerako txirrina jotzear zegoela (Ivanovek kasu honetan), eta aldea hiru puntura murriztu dute (58-61). Gainera, ondoren, indartsu kantxaratu dira 5-0eko aldeko partzialarekin, eta Sibiu agintzen jarri da (63-61).
Aitzitik, bisitariek partzial berarekin erantzun diote etxekoen oldarraldiari (63-66), eta Pantzarri esker aldea bost punturaino areagotu da 3:46ren faltan (63-68). Kopuruak gora egiten jarraitu du Smithen eskutik, 10 puntuko tartea zabaldu eta norgehiagoka erabakita utzi arte (63-73). Etxekoek, azken bi minutuetan, markagailua txukundu dute (68-73).
Fitxa teknikoa
68 - BC CSU Sibiu (18+21+19+10): Pratt (16), Dragoste (4), Ivanov (9), Barro (14) eta Uta (12) -hasierako bostekoa-; Gavriloaia (3), Kuti (7) eta Banciu (3).
73 - Surne Bilbao Basket (14+24+23+12): Pantzar (16), Adam Smith (25), Rabaseda (6), Andersson (5) eta Hlinason (8) -hasierako bostekoa-; Kullamae (5), Rigo, Alex Reyes, De Ridder (6), Tsalmpuoris (2), Barandalla eta Asier Fernández.
Partzialak: 18-14, 39-38 (atsedenaldia); 58-61 eta 68-73 (finala).
Epaileak: Mehmet Karabilecen (Turkia), Tolga Edis (Turkia) eta Mladen Lucic (Montenegro). Ez dute inor kanporatu.
Zure interesekoa izan daiteke
Surne Bilbaok sendo ekin dio txapelketako bigarren faseari, Sportingi irabazita (94-79)
Jaume Ponsarnauk zuzentzen duen taldea sufritu du partidako hainbat fasetan, baina ia beti aurretik egon da markagailuan. Garaipen garrantzitsua lortu dute beltzezko gizonek.
Surne Bilbaok Sporting CPren aurka hasiko du FIBA Europa Kopako bigarren fasea, asteazkenean, Miribillan
Bigarren faseko lehen partida hau, EITBk zuzenean emanen duena, 18:30ean hasiko da. PAOK Salonika eta Prievidza izanen dira euskal taldearen multzoa osatuko duten taldeak.
Pantzarrek eta Jaworskik gidatu dute Surne Bilbaoren garaipena Kanaria Handiaren aurka (79-72)
Melwin Pantzarrek eta Justin Jaworskik gidatu dute igande honetan Miribillan Surne Bilbaoren garaipena Dreamland Kanaria Handiaren aurka (79-72). Bizkaitarrek datorren Errege Kopan parte hartzeko anbizioa dute.
Greziako PAOK, Eslovakiako Prievidza eta Portugaleko Sporting, Surne Bilbaoren aurkariak, bigarren fasean
Beltzezko gizonek Sporting Portugalen aurka jokatuz ekingo dio FIBA Europa Kopako bigarren itzuliari, abenduaren 10ean, etxean.
Surne Bilbaok Kutaisi jipoitu du Miribillan, eta multzoko buru dabilela, sailkapena lortu du (117-54)
Gainera, beltzezko gizonek klubaren historiako saskiratze-marka berriz hautsi dute.
Surne eta Bilbao Basket, elkarrekin 2031ra arte
Kontratua berrituta, taldearen izena Surne Bilbao izanen da aurrerantzean.
Surne Bilbao Basketek taldeko lehen postua ziurtatu nahi du Kutaisi 2010en aurka
Kutaisiren aurkako norgehiagoka zuzenean izango da ikusgai, 20:00etatik aurrera, bai eitb.eus-en bai ETB4n.
Bilbao Basketek galdu egin du Real Madrilen aurka, lehiakor aritu bada ere (82-70)
Surne Bilbao Basketek gogor egin dio aurre Real Madrili Movistar Arenan, baina azken laurdenean indarrak ahitu zaizkio, eta, azkenean, 82-70 galdu du.
Bilbao Basketek berriz irabazi dio Brnori (115-100), eta multzoko lehen postua lortzeko pauso bakarra behar du
Bilbotarrek aise irabazi diete txekiarrei berriro, baina Brnok bizkaitarrak zertxobait estutu ditu une batzuetan. Surne Bilbao Basketek bere saskiratze marka hautsi du berriro gaurko norgehiagokan.
Bilbao Basketek Casademont Zaragoza irentsi du Miribillan (106-75)
Surne Bilbao Basket jaun eta jabe izan da Casademont Zaragozaren aurkako partidan, hasieratik bukaeraino, eta emaitza da horren erakusgarri: 106-75. Melwin Pantzar, Darrun Hilliard eta Justin Jaworski izan dira gehien nabarmendu diren jokalariak.