Lopez-Arosteguik eta Brizuelak EuroBasketeko finalerdietarako txartela lortu dute Espainiako selekzioarekin

Xabier Lopez-Arostegui eta Dario Brizuela euskal jokalariek EuroBasketeko finalerdiak jokatuko dituzte Espainiako selekzioarekin, final-laurdenetan Finlandia mendean hartuta, 100-90eko emaitzarekin.

Alemania izango da Espainiaren aurkaria finalaurrekoetan. Alemaniako selekzioak Greziari irabazi dio (96-107) eta finalerdietan egongo da. Grezia dominak lortzeko faboritoen artean zegoen, baina kanporatuta geratu da.

Neurketako lehen minutuetan nagusi izan da Espainia eta sei puntuko errenta lortu du (8-2). Pixkanaka, ordea, Finlandiak aldea murriztea lortu eta aurrea hartu du markagailuan (9-11). Finlandiarrak aurretik jarri ostean, nagusi izan dira, eta 11 puntuko abantaila erdietsi dute lehen hamar minutuen amaieran (19-30).

Bigarren laurdenean 15 puntuko errenta eskuratu du Finlandiak, baina Espainiako selekzioak desabantaila murriztea lortu du azken minutu onak jokatuta, eta Finlandiaren aldeko 43-52ko emaitzarekin iritsi da partida atsedenaldira.

Atsedenaldia ondo etorri zaio Espainiari eta Scariolok zuzentzen duen selekzioak bere jokoa hobetzea lortu du; ondorioz, desabantaila murriztu eta lehia parekatu du Espainiako taldeak (57-57) hirugarren laurdena amaitzeko sei minutu falta zirenean. Ondorengo minutuetan parekotasuna izan da protagonista, baina azken  txanpan nagusi izan den Espainiak sei puntuko errenta bereganatu du (73-67) azken laurdenari ekiteko.

Parekatua izan da laugarren laurdenaren hasiera eta partida Espainiako selekzioaren aldeko lau puntuko errentarekin heldu da azken bost minutuetara (84-80). Finlandia bi puntura gerturatu den arren (84-82), talde espainiarra aurkaria baino askoz gehiago izan da amaierako minutuetan eta garaipena bereganatu du (100-90).

Fitxa teknikoa:

100 - Espainia (19+24+30+27): Brown (10), Lopez-Arostegui (2), Parra (5), Pradilla (3), Willy Hernangómez (27) -hasierako taldea-, Rudy Fernandez (11), Jaime Fernandez (-), Brizuela (14), Alberto Diaz (6), Garuba (7) eta Juancho Hernangomez (15).

90 - Finlandia (30+22+15+23): Maxhuni (2), Salin (11), Jantunen (18), Huff (5), Markkanen (28) -hasierako taldea- Little (6), Koponen (3) Kantonen (-), Valtonen (4) eta Madsen (13).

Epaileak: Yonah Rosso (Frantzia), Martin Horzov eta Kerem Baki (Turkia). Madsen kanporatu dute 38. minutuan.