Athleticek markagailua irauli du Oviedoren aurka, eta Ligan gora begira jarri da (1-2)

Athleticek 1-2 garaitu du Real Oviedo igande arratsaldean, Carlos Tartieren, 2025-2026 denboraldiko EA Sports Ligako 24. jardunaldiko partidan. Ilyas Chairak aurretik jarri du Real Oviedo 30. minutuan, Mikel Jauregizarrek sartu du 1-1ekoa 58.ean, eta Oihan Sancetek egin du 1-2koa, penaltiz, 71.ean. Garaipen horri esker, Athleticek 31 puntu ditu jada, 7 puntu azken 3 partidetan lortutakoak, eta sailkapeneko 9. postura igo da. Sailkapen nagusiko 6. sailkatua, Espanyol, 4 puntura dute zuri-gorriek, aurretik, eta 18. postuan dagoen taldea, Rayo Vallecano, behin-behinean, 9ra, atzetik.

Athleticek ez du partida ona jokatu, baina balio handiko garaipena eskuratu du. Liga honetan hirugarrenez gailendu da San Mamesetik kanpo, eta Real Oviedo urritik galdu gabe zegoen etxean. Ernesto Valverderen gizonek 3 partida jarraian daramatzate galdu gabe (azken 3 partidetan jokoan izan dituzten 9 puntuetako 7 eskuratu dituzte), eta sailkapenean gora begira hasi dira, postu arriskutsuak apur bat urrunago dituztela. Neurketak utzi duen albisterik txarrena Mikel Jauregizarren lesioa izan da. 1-1ekoa sartu duen jokaldian lesionatu da.

Lehenengo zatian, Athleticek ez du asmatu berdegunean. Yuri eta Sancet taldean zirela, Real Oviedo euskal taldea baino gehiago izan da. Etxeko taldeak 30. minutuan egin du partidako lehenengo gola, Ilyas Chairaren bidez. Jokaldi horretan, Asturiasko taldeko jokalaria Valverderen taldearen atzealdea baino azkarrago aritu da, eta Unai Simonek ezin izan du ezer egin gola saihesteko. 

Bigarren zatian, Robert Navarro Nico Serranoren ordez zelairatu da Athleticen erasoko eskuinean, eta, 58. minutuan, Mikel Jauregizarrek emaitza parekatu duen gola egin du. Bermeoko erdilariak jokaldi ederra egin du, area ertzetik jaurti, eta baloia Aaronen ate barrura bidali du. Jokaldi horretan, Jauregizar lesionatu egin da.

Golak konfiantza eman dio Athletici, eta, 71. minutuan, penaltiz, talde zuri-gorriak bigarren gola sartu du. Oihan Sancetek egin du. Baloiak David Carmo Real Oviedoko atzelariaren eskua jo du, area barruan. Aurretik, bi jokaldi eztabaidagarri izan dira: Paredesen balizko penalti bat, baloia aurretik kanpora irten den erasoko jokaldi batean, eta Iñigo Ruiz de Galarretaren esku bat; epaileak ez dio txartelik atera eibartarrari, eta Athleticeko erdilariak txartela zuen aurretik.

Bizkaiko taldeak, hala, aldeko markagailuari eutsi dio, eta garaipena eskuratu du. Azken bi jardunaldietan, beste horrenbeste garaipen lortu ditu Athleticek.

Fitxa teknikoa

1 – Real Oviedo: Aaron Escandell; Nacho Vidal (Lucas, 81. min), Bailly, Carmo, Javi Lopez; Sibo (Fonseca, 65. min), Colombatto (Fores, 81. min); Hassan (Thiago Fernandez, 56. min), Reina (Santi Cazorla, 65. min), Ilyas Chaira; Fede Viñas.

2 – Athletic: Unai Simon; Gorosabel (Areso, 66. min), Paredes, Laporte, Yuri; Ruiz de Galarreta (Vesga, 66. min), Jauregizar (Rego, 61. min); Nico Serrano (Robert Navarro, 46. min), Sancet (Unai Gomez, 90. min), Iñaki Williams; Guruzeta.

Epailea: Busquets Ferrer (Balearretako Batzordea). Real Oviedoko Colombatto, Carmo eta Thiago Fernandez, eta Athleticeko Ruiz de Galarreta, Guruzeta eta Rego zigortu ditu, txartel horia aterata.

Golak: 1-0, 30. min: Ilyas Chaira. 1-1, 58. min: Jauregizar. 1-2, 71. min: Sancet, penaltiz.

Nabarmentzekoa: 25.255 zale bildu dira Carlos Tartieren; 2.000 inguru, athleticzaleak.