Gol festa San Mamesen (7-1)

Athletic aise gailendu zaio Valladolidi San Mamesen, EA Sports Ligako 25. jardunaldiko partidan. Bilboko taldea jaun eta jabe izan da, eta garaipen horri esker laugarren jarraitzen du Ligako sailkapenean, datorren denboraldian Txapeldunen Liga jokatzeko aukera ematen duten postuetan.

Zuri-gorriak erasora atera dira hasiera-hasieratik, neurketa lehenbailehen erabakitzeko helburuarekin. Valladoliden ate inguruan zenbait jokaldi arriskutsu egin ostean, Mikel Jauregizarrek aurretik jarri ditu lehoiak 10. minutuan egindako golarekin. Pasea Nico Williamsek eman dio (1-0).

18. minutuan, Jauregizarrek berak bigarrena egiteko aukera izan du, baina Hein atezainak erantzun bikaina eman dio.

33. minutuan, epaileak baliorik gabe utzi du Mamadou Syllak egindako gola, jokoz kanpokoa adierazita.

Ondorengo jokaldian, Nico Williamsek jokaldi ikusgarria egin du area barruan, parean atera zaizkion aurkari guztiak gaindituta, Athleticen bigarrena egiteko (2-0).

Zortzi minutu geroago, Maroan Sannadik bere lehen gola egin du talde zuri-gorriarekin, ezkerretik egindako jokaldi batean. Sancetek Yuriri pasatu dio, eta zarauztarrak erdiratutako baloia Valladoliden ate barruan sartu du Maroanek (3-0).

Atsedenaldiaren aurretik, beste gol bat egiteko denbora ere izan dute lehoiek. Oihan Sancetek gol ederra sartu du, Mikel Jauregizarrek emandako pasea aprobetxatuta (4-0).

Bigarren zatian, Valladolidek neurketako bere gol bakarra egin du, kontraerasoan. Etxekoak ez dira oso fin ibili defentsan, eta Mamadou Syllak Unai Simonen atean sartu du baloia (4-1).

56. minutuan, Alvaro Rubioren taldea 10 jokalarirekin geratu da, epaileak bigarren txartel horia atera diolako Jurici. 10 minutu geroago, Nico Williamsek bere bigarren gola (hori ere, bikaina) eta bilbotarren bosgarrena egin du, jaurtiketa eder baten bidez (5-1).

Seigarren gola, berriz, Gorka Guruzetak egin du, 59. minutuan (6-1).

Eta zazpigarren eta azken gola Iñaki Williamsek sartu du, Hein atezainari driblina eginda (7-1).

Txaloak De Marcosi

Williams anai zaharrenak oso gertu izan du zortzigarrena ere egitea, baina markagailua ez da gehiago mugitu. Une hunkigarri bat ere izan du norgehiagokak, Valverdek Oscar de Marcos aldatu duenean. San Mameseko publikoak txalo zaparrada beroa eskaini dio aste honetan bertan denboraldi honen amaieran erretiroa hartuko duela iragarri duen jokalariari.

Azkenean, Athleticek 7-1 menderatu du Valladolid. Ernesto Valverderen taldeak sendo jarraitzen du sailkapeneko laugarren tokian.

Fitxa teknikoa:

7 - Athletic: Unai Simon; De Marcos (Lekue, 75. min), Vivian, Paredes, Yuri; Jauregizar (Galarreta, 63. min), Vesga; Iñaki Williams, Sancet (Canales, 68. min), Nico Williams (Berenguer, 68. min); eta Sannadi (Guruzeta, 63. min).

1 - Valladolid: Karl Hein; Luis Pérez, Joseph Aidoo, Javi Sánchez (Comert, 64. min), David Torres, Candela (Machis, 46. min); Mario Martín (Grillitsch, 61. min), Juric, Chuki (Raúl Moro, 46. min); Marcos Andre (Nikitscher, 68. min) eta Sylla.

Golak: 1-0, 10. min: Jauregizar. 2-0, 34. min: Nico Williams. 3-0, 43. min: Sannadi. 4-0, 45+2. min: Sancet. 4-1, 47. min: Sylla. 5-1, 66. min: Nico Williams. 6-1, 69. min: Guruzeta. 7-1, 87. min: Iñaki Williams.

Epailea: Cesar Soto Grado (Errioxako Batzordekoa). Juric Valladolideko jokalaria kaleratu du 55. minutuan, bigarren txartel hori aterata (48. min eta 55. min). Horrez gain, txartel horia atera die Vivian (79. min) eta Galarreta (84. min) Athleticeko jokalariei, eta Mario Martin (44. min) Valladolideko jokalariari.