Real Madril eta Milan Txapeldunen Ligako finalerdietara sailkatu dira Chelsea eta Napoli kanporatuta

Real Madrilek eta Milanek Txapeldunen Ligako finalerdietarako txartela lortu dute. Talde zuriak 0-2 irabazi dio Chelseari. Napolik eta Milanek Diego Armando Maradona zelaian jokatu duten norgehiagoka berdinketarekin (1-1) bukatu da. Joanekoan lortutako garaipenak eman dio Milani Europako txapelketa nagusiko hurrengo kanporaketarako txartela.

Egungo txapelduna garaipenarekin joan da Londresera egin duen bisitatik. Bertan estu ibili da bere kanpaina txarraren arrazoiak erakutsi dituen aurkariaren aurrean; Izan ere, Chelsearen erasoko arazoak nabarmendu dira. Hala ere, aukerak izan dituzte, bat batez ere Thibaut Courtoisek bertan behera utzi duen jokaldia, atsedenaldiaren atarian.

Bigarren zatian, etxekoek gehien estutu dutenean, Madrilgo taldeak hutsuneak aurkitu ditu Rodrygok lehenengo gola sartzeko (berak sartu ditu biak). Hortik aurrera, dena errazagoa izan da Carlo Ancelottiren taldearentzat. Talde zuriaren nota negatiboa, Alabaren lesioaz gain, Militaori ateratako txartel horia izan da, finalerdietako joaneko partida galtzea ekarriko baitio.

AC Milan, bere aldetik, Napoliren etxean lortutako berdinketari esker (1-1) sailkatu da, joaneko partidako 1-0ekoa baliatuta, 16 urte geroago titulurako azken-aurreko geldialdira itzultzeko, eta, aldi berean, presioaren eta lesioen ondorioz kaltetuta dagoen aurkariaren ametsa zapuzteko.

Atsedenaldiaren atarian, Olivier Giroud aurrelari frantziarraren gol batek, Rafael Leão taldekidearen jokaldiaren ostean, izoztuta utzi du Diego Armando Maradona estadioa. Hala ere, mingostasuna nagusitu da azkenean, nahiz eta Victor Osimhen aurrelari nigeriarrak partidaren amaieran markagailua parekatu duen gola egin.