Marrazoak hirukoa osatu du
Frantziako Tourra bi hautagai nagusien arteko lehia hasi zen arren, protagonista bakarra izan du: Vincenzo Nibali (Astana). Siziliakoa 2. etapan horiz jantzi zenetik, egun bakarrean ez da lider izan: 9. egunean, Tony Gallopinek (Lotto-Belisol) kendu ziolako maillota. Chris Froome (Sky) eta Alberto Contador (Tinkoff-Saxo) lasterketan egonda ere (britainiarrak 5. etapan erretiratu zen, eta espainiarra 9.ean joan zen etxera), 'Squalo'a jaun eta jabe ibili zen Tourreko ozeanoan.
Italiarrak nagusitasun osoz eskuratu du bere lehenengo Tourra, geratzen zitzaion itzuli handi bakarra. Anquetil, Gimondi, Merckx, Hinault eta Contadorrekin batera, hiru Itzuli Handien klubean sartu da.
Lau garaipen lortu ditu Nibalik, sailkapen orokorraz gain, lasterketako lau momentu ezberdinetan gainera: Ingalaterrako irteera handia, Alpeak, Vosgeak eta Pirinioak. Borroka eta gero eta alde handiagoak irekitzeko erasoa izan dira italiarraren lehiatzeko modu bakarra.
Nibalirekin batera, beste bi txirrindulari agertu dira, poz-pozik, podiumean, eta biak frantziarrak: Jean-Christophe Peraud beteranoa (Ag2r) eta Thibaut Pinot (FDJ), gazterik onena. Romain Bardetekin (Ag2r) batera, seigarrena, Frantziako txirrindularitzak Tourrean galdutakoa berreskuratu duenaren erakusle izan dira. 30 urte pasatu dira Frantziak ez zuela horrelako emaitzarik lortzen, Fignonek eta Hinaultek podiuma elkarrekin batera zapaldu zutenean, lehenengoak 1984ko Tourra irabazi zuenean. Gallopinek, horiz jantzitako egun eta etapa garaipen banarekin, eta Ag2r-La Mondialeren sariak, frantziarren parte-hartze bikaina borobildu dute.
Peter Sagan (Cannondale) berdez jantzi da Parisen, hirugarrenez jarraian, baina ez da guztiz pozik itzuliko etxera. Saria handia da, baina Saganen garaipenerako gosea ezagututa, ez da nahikoa. Tourraren bigarrenik onenak ez du garaipenik eskuratu.
Marcel Kittel (Giant-Shimano) nagusi izan da esprintean: hiru garaipen lehenengo astean, eta Pariseko handia, bera nagusitu dela gogorarazteko. Alexander Kristoffi (Katiuxa) eman zion paso gero (bi garaipen). Andre Greipelek (Lotto-Belisol) Tourraren 6. etapa irabazi zuen, eta Matteo Trentinek (Omega Pharma-Quick Step) garaipen preziatua eskuratu zuen. Mark Cavendishek (Sky) etxera itzuli behar izan zuen, goizegi.
Berriz ere, Tony Martinek (Omega Pharma-Quick Step) munduko espezialistarik onena dela erakutsi du. Ortzadar maillotak handia egin zuen lasterketako erlojupeko bakarrenean, eta gainera, 9. etapa irabazi zuen, bakarrik ihes eginda, garaile atera zen bere buruaren kontrako beste borroka batean.
Euskal Herriko bederatzi txirrindulari
Euskaltel-Euskadi gabeko lehenengo Tourrean, Ion Izagirrek (Movistar) ondo babestu du liderra, nahiz eta Alejandro Valverdek ezin izan duen taldearen lana borobildu. Beste protagonista Mikel Nieve (Sky) izan dugu. Hasieran Richie Porteren alde lan egin behar izan zuen arren, protagonismoa berreskuratu zuen Pirinioetan. Porte eta Froome gainetik kenduta, onenekin egon zen Nieve. Hautacamen gora jotako erasoak ez zuen saririk izan, baina etapako lehiatuenaren saria lortu zuen.
Haimar Zubeldia (Trek) dago guztien gainetik. Liderrik gabe taldean, onenekin egon da beti, eta Top 10ean sartu da berriro, bosgarrenez. Tropeleko euskaldunik onena zortzigarren geratu da.
Rafal Majkari (Tinkoff-Saxo) ere ondo etorri zaio liderrik ez izatea. Contador etxean egonda, eta lasterketarako "prest egon ez" arren, Poloniakoak bi garaipen handi eskuratu ditu mendian, baita mendiko maillota ere. Puritorentzat gehiegizkoa izan da Majka eta Nibaliren bizitasuna aldapan gora.
Lars Boom (Belkin) harbidezko etapa gogorrean, Blel Kadri (Ag2r) eta Michael Rogers (Tinkoff-Saxo) ihesaldian, eta Ramunas Navardauskas (Garmin-Sharp) ausarta izan dira beste garaileak. Guztien gainetik, Siziliako Marrazoa, berriz Frantziakoa izan den Tourrean.
Zure interesekoa izan daiteke
Frantziako Tourrak Laboral Kutxa-Euskadi 2026ko ekitaldian egonen dela baieztatu du
Abuztuaren 1etik 9ra bitartean lehiatuko den lasterketak 21 talde izanen ditu; horietatik hamalau WorldTeam mailakoak dira, eta zazpi ProTeam mailakoak, eta horien artean dago euskal taldea.
Britainia Handian hasiko dira 2027ko gizonezkoen eta emakumezkoen Frantziako Tourrak
2027ko Frantziako Tourra Britainia Handian hasiko da, gizonezkoetan zein emakumezkoetan. Tropelak Eskozia, Ingalaterra eta Gales zeharkatuko ditu gizonezkoen kasuan, eta Ingalaterra emakumezkoen proban.
Bartzelonan hasiko da 2026ko Frantziako Tourra, mendia eta Alpe d’Huezen itzulera protagonista dituela
2026ko Frantziako Tourrak badu mapa. Frantziako Tourra Bartzelonatik abiatuko da lehen aldiz, taldekako erlojupeko batekin, Montjuïcen, eta altuerako ibilbidea egingo du: bost amaiera maldan gora, hitzordu bikoitza Alpe d'Huezen, eta 3.333 kilometro guztira.
Frantziako Tourra Mont Ventoux mendatera helduko da
2026ko edizioa Lausanatik abiatuko da abuztuaren 1ean, eta hilaren 9an amaituko da, Nizan. Zazpigarren jardunaldian, Mont Ventoux mendatera igo beharko dute txirrindulariek; horrez gain, laugarren etapa 21. kilometroko erlojupekoa izango da.
Ferrand-Prevotek historia egin du Frantziako Tourra irabazita
Azkeneko etapa ere Vismako txirrindulari frantziarrak bereganatu du. Podiumean Demi Vollering herbeheretarra eta Katarzyna Niewiadoma poloniarra izan ditu ondoan.
Pauline Ferrand-Prevot frantziarrak Tourra erabakita utzi du, Madeleine mendatean erakustaldia emanda
Amaierarako etapa baten faltan, Ferrand-Prevotek 2:37ko aldea du Sara Gigante bigarren sailkatuarekin, eta 3:18koa Demi Volleringekin.
Maeva Squibanek bigarrenez jarraian irabazi du Frantziako Tourrean
Txirrindulari frantziarrak erakustaldia eman du eta bigarren egunez jarraian bakarka helmugaratu da.
Maeva Squiban gailendu da Amberten, bakarka, eta Kim Le Courtek maillot horiari eutsi dio, Frantziako Tourrean
Lasterketako 32. ekitaldiko aurreneko mendiko etapan, UAE taldeko txirrindulari frantziarrak eskuratu du garaipena; AG Insurance taldeko ziklista maurizioarrra, ordea, hirugarren tokian helmugaratu da, seigarren jardunaldian, eta sailkapen nagusian duen aldea, orain, zortzi segundo handiagoa da.
Lorena Wiebesek irabazi du Poitiersen, esprintean, eta Marianne Vosek Frantziako Tourreko lider jarraitzen du
Lasterketako 32. ekitaldiko laugarren etapan, ez da aldaketa nabarmenik izan sailkapen nagusian. Wiebesek, beste behin, erakutsi du munduko esprinterrik onenetakoa dela; astelehenean bezala, garaipena eskuratu du.
Lorena Wiebesek irabazi du Angerseko esprinta, eta Marianne Vosek maillot horia berreskuratu du, Tourrean
SD Worx-Protime taldeko txirrindulari herbeheretarra, Europako egungo txapelduna bera, aurrenekoz gailendu da 32. Frantziako Tourrean; sailkapen nagusian, Visma-Lease a Bikeko herbeheretarra larunbateko etapan eskuratutako lehen postura bueltatu da.