Realak galdu egin du Real Madrilen aurka eta emaitza irauli beharko du Bernabeun (0-1)

Realak 0-1 galdu du Real Madrilen aurka asteazken honetan, Reale Arenan jokatu den Errege Kopako finalerdietako joaneko partidan. Txuri-urdinek partida ona egin dute, Oyarzabalen eta Takeren hainbat aukerarekin eta Remiroren geldiketekin, baina Endricken golak Bernabeun jokatuko den kanporaketari buelta ematera behartuko ditu.

Txuri-urdinek, harrera ikusgarriarekin zaleen aldetik, oso goian presionatu dute aurkaria hasieratik, baloi galerak eta partidako lehen aukerak eraginez. Barrenetxea atezaina ezustean harrapatzen saiatu da urrutitik egindako jaurtiketa batekin, eta Takek aukera argia izan du Luninek ondo gelditu duen aurrez aurrekoan.

Real Madrili kosta egin zaio baloia eroso ateratzea, beti baitzuten Realeko jokalari bat gainean. Etxekoen jokaldi on baten ondoren, Rudigerrek lurrera bota du Take area barruan eta penaltia eskatu dute, baina epaileak ez du ezer adierazi.

Reala nagusi zen, baina ezin izan du ekidin Real Madrilek markagailua irekitzea. Euskal defentsa aurreregi zela, Bellinghamek pase luzea eman dio Endricki, eta Remiroren aurrean bakarrik jarri da gola sartzeko (0-1).

Gizpuzkoako taldeak ideia berarekin jarraitu du eta baloia Real Madrilen zelaian mantendu du. Oyarzabalek aukera ona izan du taldeko jokaldi baten ondoren, baina kapitainaren jaurtiketa ahul joan da. Hurrengo jokaldian, Vinicius bigarren gola sartzeko zorian egon da, baina Remirok esku ona atera du eta gola saihestu.

Oyarzabalek, korner batean, eta Barrenetxeak, urruneko jaurtiketa batekin, markagailua berdintzeko aukerak izan dituzte azken minutuetan, baina bietan Lunin adi egon da eta baloia gelditu du. Horri esker, taldea aurretik zegoen atsedenaldian.

Bigarren zatian erritmoa motelagoa izan da, baina laster sortu zaio lehen aukera Realari, Oyarzabalen burukada on batekin, nahiz eta Luninek gelditu duen. Aldaratzea Takek hartu du jaurtiketa kargatzeko, baina, berriz ere, Luninek bere taldea salbatu du.

Real Madrilek Endricken jaurtiketa indartsu batekin erantzun du, baina langa jo du.

Bisitariek indarra hartu dute pixkanaka, min egiteko modurik aurkitzen ez zuen Realaren aurrean. Aihen saiatu da, baina bota duen jaurtiketa gurutzatua desbideratuta joan da. Imanolek freskotasuna sartu nahi izan du zelaian, Barrenetxea eta Sucicen ordez Marin eta Becker sartuz.

Oyarzabalek eta Takek ezin izan dute abagune hirukoitz bat ere aprobetxatu. Japoniarrari gora joan zaio jaurtiketa. Etxekoen hurrengo aldaketak Oskarsson, Elustondo eta Javi Lopez izan dira, Oyarzabal, Aguerd eta Aihenen ordez.

Remiro adi egon da eta Zubeldiak desbideratu duen Bellinghamen jaurtiketa gelditu du. Kornerrean, Alabaren jaurtiketa ere estali behar izan du.

Realak ez du gola sartzeko modua aurkitu eta kanporaketa irauli beharko du Santiago Bernabeun jokatuko den itzuliko partidan, apirilaren 1ean.

Fitxa teknikoa:

0 - Reala: Remiro; Aramburu, Zubeldia, Aguerd (Aritz, 77. min), Aihen (Javi Lopez, 83. min); Zubimendi, Sucic (Marin, 64. min), Brais Mendez; Kubo, Oyarzabal (Oskarsson, 77. min) eta Barrenetxea (Becker, 64. min).

1 - Real Madril: Lunin; Asencio (Lucas Vazquez, 46. min), Tchouameni, Rüdiger, Fran Garcia; Camavinga (Mendy, 88. min), Ceballos, Bellingham; Arda Güler (Rodrygo, 84. min), Endrick (Alaba, 72. min) eta Vinicius Junior (Brahim, 84. min).

Gola: 0-1, 19. min: Endrick.

Epailea: Jose Maria Sanchez Martinez. Txartel horia atera die Asencio eta Lucas Vazquez jokalariei.