Albiste da:

Elene Lete, Irene Paredes, Oihane Hernandez eta Maite Oroz, Munduko Txapelketarako Espainiaren lehen zerrendan

Jorge Vilda Espainiako hautatzaileak 30 jokalarik osatutako zerrenda iragarri du; behin-behineko zerrenda da. Munduko Txapelketa Australian eta Zeelanda Berrian jokatuko dute, eta uztailaren 20an hasiko da.

Maite Oroz, gol bat sartuta. Argazkia: EFE. Maite Oroz, gol bat sartuta. Argazkia: EFE.

EITB

2023/06/12 - 20:54

Azken eguneratzea

2023/06/12 - 20:54

Elene Lete Realeko atezaina, Irene Paredes (Bartzelona) eta Oihane Hernandez (Athletic) atzelariak eta Maite Oroz Real Madrileko erdilaria Espainiako selekzioak Australian eta Zeelanda Berrian jokatuko duen Munduko Txapelketarako prestatu duen lehen zerrendan daude, astelehenean Jorge Vilda hautatzaileak iragarri duenez.

Lete, Paredes, Hernandez, Oroz eta hautatutako gainerako 26 jokalariek, hortaz, aukera dute Munduko Txapelketan jokatzeko. Txapelketa uztailaren 20an hasiko da, eta abuztuaren 20an amaitu, eta Espainia C multzoan dago, Costa Ricarekin, Zambiarekin eta Japoniarekin batera.