Realak arnasa hartu du eta jaitsiera-postuetatik urrundu da Gironari irabazita (0-1)

Realak hiru puntu garrantzitsu lortu ditu EA Sports Ligako 10. jardunaldian Gironari 0-1 irabazita. Donostiako taldea lehen zatiaren amaieran jarri da aurretik markagailuan, eta nagusi izan da azkenean Montilivin, Mikel Oyarzabal kapitainak lehen zatiko azken minutuetan buruz sartutako golari esker. Garaipen honekin, txuri-urdinek lau postu egin dute gora sailkapenean, eta jaitsiera postuetatik aldendu dira.

Imanol Alguacilek zuzendutako taldea sailkapenean oso atzean zegoela iritsi da neurketa honetara, jaitsiera-postuetatik puntu batera. Hala, lehen minututik, Realak kontrola hartzeko asmoa erakutsi du, eta 2. minutuan eman dio lehen abisua Gironari, eskuin hegaletik Barrenetxeak egindako erdiraketa arriskutsu batekin; Oyarzabalek, baina, ez du harrapatu. Kapitainak aukera gehiago izan ditu lehen partean, baina lehen zatiko azken minutura arte ez du markagailua irekitzea lortu.

Lehen 45 minutuetan, Realak Gironaren atea setiatu du, Oyarzabalen eta Oskarssonen hainbat saiakerarekin. Etxekoak ere ez dira atzean gelditu, eta Remiro estu hartu dute; David Lopez Girona aurretik jartzeko zorian egon da 36. minutuan, boleaz egindako erremate batekin.

Lehen zatia golik gabeko berdinketa batekin amaituko zela zirudienean, Mikel Oyarzabal agertu da txuri-urdinen euforia pizteko. 44. minutuan, Barrenetxeak erdiraketa zehatza egin du ezker hegaletik, eta Realeko kapitainak buruz errematatu du, sare barrura, denboraldiko bere lehen gola egin eta Reala atsedenaldira gol bateko aldearekin eramateko.

Reala aldea handitzeko asmoarekin zelairatu da bigarren zatian. Horrela, 49. minutuan, Brais Mendezek aukera bikaina izan du falta jaurtiketa indartsu batekin, baina Gazzanigak urrundu egin du.

Kataluniako taldeak abagune argia izan du 62. minutuan, Javi Lopezen bularra jo duen Arnauren erremate batekin. Etxekoek partida berdintzeko saiakerak egin dituzte, baina txuri-urdinen defentsa sendoak eta Remiroren geldiketek ezerezean utzi dituzte guztiak, Krejcik 78. minutuan egindako errematea eta Danjumak 82.ean izandako aukera tartean.

Azken uneetan, Gironak presioa areagotu du, baina behin eta berriz egin du topo bisitarien atezainarekin. 88. minutuan, Remirok belaunean min hartu du, baina jokatzen jarraitu ahal izan du.

Kubok txuri-urdinen aldea handitzeko azken aukera izan du kontraeraso batean, baina ez du asmatu. Hala ere, Realak eutsi egin dio abantailari, eta hiru puntu eskuratu ditu Montilivin. Ondorioz, sailkapenean lau postu egin ditu gora.

Fitxa teknikoa:

0 - Girona: Gazzaniga; Frances (Minsu, 72. min), David Lopez, Krejci, Miguel; Arnau, Herrera; Van de Beek (Misehouy, 59. min), Ivan Martin, Danjuma; eta Miovski (Stuani, 59. min).

1 - Reala: Alex Remiro; Aranburu, Zubeldia, Nayef Aguerd, Sergio Gomez; Sucic, Zubimendi, Brais Mendez (Turrientes, 82. min); Oyarzabal (Becker, 80. min), Oskarsson (Take, 65. min) eta Barrene (Javi Lopez, 59. min).

Gola: 0-1, 44. min: Oyarzabal.

Epailea: Soto Grado (Errioxako Batzordekoa). Txartel horia erakutsi die Arnauri (30. min) eta Brais Mendezi (55. min).