Realak aurrera egin du Kopan Mallorcari irabazita (1-0)
Realak Kopan aurrera egitea lortu du Mallorcari 1-0 irabazita. Imanol Alguacilen taldeak lehen zati ona jokatuta, Robert Navarrok 6. minutuan egindako golari esker lortu du garaipena. Izan ere, bigarren zatian ezin izan diote lehen zatiko mailari eutsi.
Lehen zatian Reala nabarmen nagusitu da Mallorcaren aurrean. Bigarren minuturako txuri-urdinek lehen abagunea izan dute prestatutako jokaldi batean baina Zubimendik ez du asmatu baloia sareratzen.
Minutu batzuk beranduago, baina, Zubimendik berak pase bikaina eman dio Navarrori sakonean eta honek, Kopa honetan ohikoa bihurtzen ari den lez, partidako lehen gola sartu du eskuinaz egindako jaurtiketa gurutzatu batekin. Aurten Realak Kopan jokatu dituen 4 partidetako lehen golak berak egin ditu. Partida bakoitzeko bat.
Ez du erritmoa jaitsi Imanol Alguacilek zuzentzen duen taldeak eta 10. minutua betetzerako beste aukera bat izan dute, oraingoan Oyarzabalen eskutik, zeina lehen aldiz hasierako hamaikakoan sartu den. Eibartarrak baloia eskuineko hegalean jaso, barrurantz egin eta jaurtiketa zutoinaren ondotik kanpora joan da.
Mallorca gauzaez, bere zelaitik atera ezinda egon da. Realak bigarren gola ere egin du lehen zatian, epaileak ordea, Oyarzabalen gola baliogabetu du, jokoz kanpo zegoelako. Atsedenaldiaren aurreko azken minutuetan txuri-urdinek baloiaren jabetza mantendu dute baina ia arriskurik sortu gabe.
Bigarren zatia, berriz, oso bestelakoa izan da. Realari zaildu egin zaio baloiaren jabetza mantentzea eta lehen zatian izandako abaguneak ez baliatu izana ordaindu du. Sufritzea egokitu zaie txuri-urdinei.
Markagailuan aldea laburra zen eta jokalariak ez dira eroso egon berdegunean. Etxekoen aukera argirik gabe, lehen sustoa kanpoko taldeak eman du 60. minutuan. Grenierrek jaurtiketa gogorra egin eta langari jo ostean, Copetek jokoz kanpo jaso du aldaratzea eta jokaldia baliogabetu du epaileak. Mallorca beste behin ahalegindu da 76. minutuan berdinketa lortzen, orduan, Remirok arazorik gabe bereganatu du Grenierrek urrunetik egindako jaurtiketa.
Mallorca ez da gai izan berdinketa lortzeko eta azkenean garaipena Realarentzat izan da. Hortaz, Alguacilen taldeak final-laurdenetarako txartela bereganatu du Reale Arenan.
Fitxa teknikoa:
1- Reala: Remiro; Gorosabel (Elustondo, 60. min), Le Normand, Pacheco, Muñoz; Zubimendi, Merino (Marín, 46. min) Brais Méndez (Illarramendi, 60. min), Oyarzabal; Sorloth (Carlos Fernández, 60. min), Robert Navarro (Kubo, 69. min).
0- Real Mallorca: Greif; Copete, Valjent, Gayá (Maffeo, 77. min); Cufré (Grenier, 57. min); Bataglia, Antonio Sánchez (Dani Rodríguez, 73. min), Giovanni González, Lee, Kadewere (Prats, 57. min) eta Ángel Rodríguez (Ndaye, 73. min).
Gola: 1-0, 6. min: Robert Navarro.
Epailea: Hernández Hernández . Txartel horiak: Brais, Pacheco, Le Normand, Cufré, Copete eta Giovanni González.
Zure interesekoa izan daiteke
Sansek barkatu egin du Ceutan, eta saririk gabe geratu da (0-0)
Talde txuri-urdina nagusi izan da eta abagune onenak sortu ditu, baina ate aurrean asmatu ez izanak eta aurkariaren atezainaren lan onak eskura zirudien garaipena eragotzi dute.
Matarazzo: “Badakigu zer datorkigun, baina orain Alavesen aurkako partida da garrantzitsuena"
Pellegrino Matarazzok azpimarratu du Realak Alavesen aurka larunbat honetan jokatuko duen derbia soilik daukala buruan, Kopako finalerako astebete gelditzen bada ere.
Jon Martin: “Ongi defendatzen badugu, irabazteko aukera asko izango ditugu”
Jon Martin Realeko jokalariak datorren apirilaren 18an Atletico Madrilen aurka jokatuko duten finalaz hitz egin du elkarrizketa honetan. Partida parekatua dela iruditzen zaio Martini, eta irabazteko aukerekin ikusten du taldea.
Juanan Larrañaga: “Reala ondo dago; erakutsi zion Altletico Madrili gai dela aurre egiteko”
Errege Kopako atarian, Juanan Larrañaga Realeko jokalari ohia elkarrizketatu dugu. 87ko partidaz eta ostean bizitzakoaz aritu gara berarekin. Oraingoan, ordea, Larrañagak “beste leku batetik eta lasaiago” ikusiko du finala.
Sansek porrota jaso du Sportingen aurka, Gijonen (1-0)
Txuri-urdinek Asturiasko taldea asko estutu dute azken minutuetan, baina ezin izan dute norgehiagoka berdindu.
Aguirre: “Begirada gora izan behar da beti, eta honek indarra ematen digu"
Ibai Aguirre Realeko jokalariaren adierazpenak, EA Sports Ligako 30. jardunaldiko partidan debutatu eta Levanteren aurka 2-0 irabazi ondoren.
Realak Europarako postua sendotu du Levanteren aurka 2-0 irabazita
Jon Martinek markagailua ireki du, eta Brais Mendezek partida erabakita utzi du, Alex Remirok atea hutsean mantendu duen bitartean.
Realak “bostekoa" eman dio Alhamari (1-5)
Reala 1-0 galtzen hasi da Alhamaren aurka etxetik kanpo jokatu duen partida, baina berehala erreakzionatu du, eta nagusitasun handiarekin gailendu zaio: 1-5.
Matarazzo: “Pausoz pauso eta partidaz partida joan behar dugu"
Pellegrino Matarazzok adierazi du ulertzen duela zaleak Kopako finalean pentsatzen egotea, baina Realeko entrenatzaileak azpimarratu du aurretik Ligako bi partida jokatu behar dituztela, eta horren harian esan du taldea larunbat honetan Levanteren aurka etxean jokatuko duen partidan kontzentratuta dagoela.
Jon Ansotegi: “Partida berezia da neretako, jokalariendako eta hemen gauden guztiendako"
Jon Ansotegik prentsaurrekoa eman du ostegun honetako derbiari begira. Sanseko entrenatzaileak taldearen lan bikaina azpimarratu du, nahiz eta Almeriaren aurkako partida kaskarra izan. Partidarako eskuragarri izanen dituen jokalari guztiak ezagutzeko, lehen taldearen beharren zain daudela adierazi du Ansotegik. Gainera, derbi honen berezitasuna nabarmendu du, izan ere, Eibarreko hainbat jokalarik Realan jokatu dute iraganean.