Athletic 12 - Bartzelona 1, Ligako inoizko gol jario handienak 90 urte bete ditu
1931ko otsailaren 8a data historikoa da Espainiako futbolean. Egun hartan, duela 90 urte, Athleticek 12 eta 1 irabazi zion Bartzelonari San Mamesen, hau da, ligako txapelketan inoiz izan den gol jario handiena gertatu zen egun hartan 18.000 ikusleren aurrean. Frederick Pentland entrenatzaile ingelesak zuzentzen zuen etxeko taldeak airean ibili zuen James Bellamy bere herrikidearen talde katalana.
Norgehiagoka horretako protagonista nagusienetakoa Agustin Sauto 'Bata' izan zen; izan ere, sasoi hartan 22 urte zituen Barakaldoko aurrelariak zazpi gol sartu zituen, eta Tomas Balaguer epaileak beste bat baliogabetu zion. Marka hori Ladislao Kubalak berdindu zuen 1952an, Bartzelonak Sportingi 9 eta 0 irabazi zion neurketan.
Garaiko kronikek erakusten dutenez, partidako jokaldi garrantzitsuena 18. minutuan jazo zen. Athletic 2-1 irabazten ari zen, Bataren eta Goibururen golekin, eta Marti Bartzelonako jokalariak zelaia utzi behar izan zuen, zutoin batekin tupust egin eta eskuin besoa mindu ondoren.
Garai hartan ez zegoen aldaketarik egiteko aukerarik, eta, hortaz, Bartzelona jokalari bat gutxiagorekin geratu zen. Zuri-gorriek ez zuten alferrik galdu abantaila hori, eta atsedenaldira 6-1eko aldeko emaitzarekin iritsi ziren. Batak beste bi gol erdietsi zituen, eta ‘Bala Gorria’ ezizenez ezagutzen zen Gorostizak eta Lafuentek bana egin zituzten.
Bigarren zatian, etengabeak izan ziren bilbotarren erasoaldiak Llorensek defendatzen zuen atearen aurka, eta beste hiru gol heldu ziren bilbotarren alde Bataren eskutik. Markagailuak 10 eta 1ekoa islatzen zuen. Gerora, bisitarientzako zoritxarreko beste jokaldi bat gertatu zen, Roigek min hartu eta bederatzi jokalarirekin utzi baitzuen Bartzelona.
Sastrek bere atean sareratutako gol batek eta Iraragorrik sartutako beste batek 12-1ekoa ezarri zuten, hots, txapelketan indarrean jarraitzen duen marka zaharrena.
"Ez dut sekula ahaztuko futbol-arratsalde gogoangarri hau" zioen Excelsior Bilboko kirol egunkariaren kronikak. Kataluniako hiriburuko Mundo Deportivo egunkariak, berriz, "ahaztu ezinezko hondamendia" izan zela iritzi zion.
Mister Pentlandek zuzentzen zuen Athletic hark, klubeko lehen aurrealde historikoa zeukanak (Lafuente, Iraragorri, Bata, Chirri II.a eta Gorostiza), Liga eta Kopa irabazi zituen denboraldi hartan. Ligan, Racing Santanderrekin eta Realarekin berdinduta amaitu zuen 22 punturekin, baina aldeko gol gehiago izateagatik bereganatu zuen garaikurra.
Bilbotarrek 73 gol erdietsi zituzten 18 partidatan (batez beste, 4 gol baino gehiago partida bakoitzeko), hamar taldez osatutako txapelketan lortu zituen. Bartzelonari sartu zion dozena horrez gain, zazpi egin zizkion Racingi eta Alavesi, eta sei Real Madrili eta Realari.
Fitxa tekniko:
12 - Athletic Club: Izpizua; Castellanos, Urquizu; Garizurieta, Muguerza, Roberto; Lafuente, Iraragorri, Bata, Chirri II eta Gorostiza. Entrenatzailea: Frederick Pentland.
1 - Bartzelona: Llorens; Zabalo, Portas; Marti, Roig, Castillo; Piera, Goiburu, Sastre, Arnau eta Parera. Entrenatzailea: James Bellamy.
Golak: 1-0, 2. min: Bata. 2-0, 8. min: Bata. 2-1, 10. min: 3-1, 24. min: Bata. 4-1, 27. min: Gorostiza. 5-1, 36. min: Lafuente. 6-1, 37. min: Bata. 7-1, 55. min: Garizurieta. 8-1, 57. min: Bata. 9-1, 60. min: Bata. 10-1, 68. min: Bata. 11-1, 71. min: Sastre, bere atean. 12-1, 83. min: Iraragorri.
Epailea: Tomás Balaguer García (Sevilla).
Gertaerak: 1930-31 denboraldiko ligako hamargarren jardunaldiko partidan, 18.000 zale bildu ziren San Mamesen. 10 pezeta ordaindu behar izan zituzten Tribunako toki bategatik, 5 pezeta Preferentziako bategatik eta 2,5 pezeta Generaleko bategatik.
Zure interesekoa izan daiteke
Alejandra Estefaniari ebakuntza egin diote berriro eskuineko belaunean
Erdilari zuri-gorriari artroskopia egin diote eskuin belaunean. Jokalariak larri lesionatu zen eskuin belaunean 2024ko irailean.
Athleticek Elx menderatu du, Guruzetak bi gol sartuta, eta hiru garaipen jarraian lortu ditu Ligan (2-1)
Aurrelari donostiarrak 64. minutuan egin du 1-0ekoa, Andre Da Silvak jarri du 1-1ekoa, penaltiz, eta 89.ean egin du Guruzetak Athleticen bigarrena, penaltiz. Valverderen taldeak, horrela, Ligako azken 4 partidetan jokoan izan dituen 12 puntuetatik 10 poltsikoratu ditu.
Ane Campos, berriro Ipuruan, Eibar-Athletic derbian: “Partida gogorra izango da, xehetasunek erabakiko dute”
Aurrelari gipuzkoarrak, lehen itzulian, gol bat egin zion bere talde ohiari; orain, aurrenekoz jokatuko du aurkari gisa Eibarren estadioan. Camposek EITBrekin hitz egin du, derbia aztergai; igandean izango da, 12:00etan, eta kirolakeitb.eus-ek eta ETB2k zuzenean emango dute.
Valverde: "Ez dugu sailkapenean ez gora ez behera begiratzen, gure buruari begira gaude"
Entrenatzaile zuri-gorriak baieztatu duenez, Dani Vivian jokatzeko prest izango da, giharretako arazo batengatik azken sei neurketa galdu ostean. Mikel Jauregizar, ordea, ezin izango du zelairatu, igandean Carlos Tartieren min hartu ondoren.
Unai Egiluz, Athleticeko jokalaria: "Taldearekin itzultzeko prest nago"
Unai Egiluz Athleticeko jokalaria gaur itzuli da entrenamenduetara, lesio luze baten ostean. Oso pozik agertu da prentsaurrekoan, lanerako gogoz.
Nico Williams baja izango da datozen jardunaldietan; Jauregizarren lesioa, berriz, ez da larria
Talde zuri-gorriak argitaratutako mediku-txostenaren arabera, Williamsek kanpoko espezialista batekin landuko du pubalgia. Jauregizarren kasuan, berriz, egindako probekin ikusi dute ez duela lesio larririk, ez belauneko lotailuan, ezta meniskoan ere.
Valverde: "Nico ez dago % 100ean, eta hori arazo bat da berarentzat eta guretzat"
Athleticeko entrenatzaileak Williams anai txikiak dituen arazo fisikoei buruz hitz egin du.
Oihan Sancet: "Badakigu hiru puntuak lortzea zein zaila den eta oso pozik gaude"
Valverderen taldeak Oviedoren etxean lortutako garaipen garrantzitsua izan du hizpide Athleticeko jokalariak (1-2).
Athleticek markagailua irauli du Oviedoren aurka, eta Ligan gora begira jarri da (1-2)
Ilyas Chairak Asturiasko taldea aurreratu du lehenengo zatian; bigarrenean, Athleticek hobera egin du, Mikel Jauregizarrek gol ederra sartu du 1-1ekoa jartzeko, eta Oihan Sancetek, penaltiz, 1-2koa egin du. Jauregizar lesionatu egin da gola sartu duen jokaldian.
Oguiza: "Astean zehar partida asko izan ditugu, eta hori azkenean igarri egiten da"
Irene Oguiza Athleticeko jokalariaren adierazpenak, F Ligako 20. jardunaldiko Realaren aurkako derbia 0-2 galdu ondoren.