Bera Bera vs Aula Valladolid eta Beti Onak vs Mecalia Atletico Guardes, Kopako final-laurdenetan
Hori izan da astearte honetan Donostiako Aquariumean egindako zozketaren emaitza.
Bera Bera eta Beti-Onak soilik finalean aritu litezke nor baino nor gehiago.
Super Amara Bera Berak Aula Valladolid izango du aurkari eskubaloiko Erreginaren Kopako final-laurdenetan; Replasa Beti Onakek, ostera, Mecalia Atletico Guardesen aurka jokatuko du.
Horrez gain, astearte honetan Donostiako Aquariumean egindako zozketaren arabera, honako hauek dira fasea osatzen duten beste bi norgehiagokak:
Elda Prestigio - Sporting La Rioja
Rocasa Gran Canaria - KH7 Eskubaloia Granollers
Erreginaren Koparen 47. edizioaren azken fasea maiatzaren 8tik 10era izango da, Illunben. Final laurdenak maiatzaren 8an jokatuko dituzte, finalerdiak biharamunean, eta final handia, ordea, maiatzaren 10ean.
Final laurdenetan garaile irtenez gero, Bera Berak, finalaurrekoetan, Elda Prestigio edo Sporting La Rioja izango luke aurkari; Beti-Onakek, aldiz, Rocasa Gran Canaria edo KH7 Eskubaloia Granollers izango luke aurkari gisa. Hala, bi euskal taldeen arteko finala egon liteke.